ਅੰਮਿ੍ਤਸਰ ਹਵਾਈ ਅੱਡੇ 'ਤੇ ਯਾਤਰੀਆਂ ਲਈ ਆਟੋਮੈਟਿਕ ਮੌਸਮ ਨਿਰੀਖਣ ਪ੍ਰਣਾਲੀ ਡਿਸਪਲੇਅ ਦਾ ਉਦਘਾਟਨ

ਰਾਜਾਸਾਂਸੀ, 22 ਦਸੰਬਰ (ਹਰਦੀਪ ਸਿੰਘ ਖੀਵਾ)-ਅੰਮਿ੍ਤਸਰ ਦੇ ਸ੍ਰੀ ਗੁਰੂ ਰਾਮਦਾਸ ਜੀ ਅੰਤਰਰਾਸ਼ਟਰੀ ਰਾਸ਼ਟਰੀ ਹਵਾਈ ਅੱਡਾ ਰਾਜਾਸਾਂਸੀ ਵਿਖੇ ਆਮ ਲੋਕਾਂ ਤੇ ਯਾਤਰੀਆਂ ਦੇ ਜਾਗਰੂਕਤਾ ਲਈ ਆਟੋਮੈਟਿਕ (ਆਪਣੇ ਆਪ) ਮੌਸਮ ਨਿਰੀਖਣ ਪ੍ਰਣਾਲੀ ਦੇ ਮੌਸਮ ਸੰਬੰਧੀ ਜਾਣਕਾਰੀ ਪ੍ਰਦਰਸ਼ਨੀ ਦਾ ਉਦਘਾਟਨ ਅੰਮਿ੍ਤਸਰ ਹਵਾਈ ਅੱਡੇ ਦੇ ਡਾਇਰੈਕਟਰ ਸ੍ਰੀ ਭੁਪੇਂਦਰ ਸਿੰਘ ਵਲੋਂ ਵੱਖ-ਵੱਖ ਅਧਿਕਾਰੀਆਂ ਦੀ ਹਾਜ਼ਰੀ 'ਚ ਕੀਤਾ ਗਿਆ | ਇਸ ਸਬੰਧੀ ਹਵਾਈ ਅੱਡੇ ਦੇ ਡਾਇਰੈਕਟਰ ਭੁਪਿੰਦਰ ਸਿੰਘ ਵਲੋਂ ਜਾਣਕਾਰੀ ਦਿੰਦੇ ਹੋਏ ਦੱਸਿਆ ਕਿ ਇਹ ਡਿਸਪਲੇ (ਵਿਖਾਵਾ ਬੋਰਡ) ਤਾਪਮਾਨ, ਨਮੀ, ਹਵਾ ਦੀ ਦਿਸ਼ਾ, ਹਵਾ ਦੀ ਗਤੀ, ਰਨਵੇ ਵਿਜ਼ੂਅਲ ਰੇਂਜ ਅਤੇ 24-ਘੰਟੇ ਬਾਰਿਸ਼ ਸਮੇਤ ਅਸਲ-ਸਮੇਂ ਦੇ ਮੌਸਮ ਸੰਬੰਧੀ ਡੇਟਾ (ਅੰਕੜੇ) ਪ੍ਰਦਾਨ ਕਰਦਾ ਹੈ, ਜਿਸ ਨਾਲ ਯਾਤਰੀਆਂ ਅਤੇ ਹਵਾਬਾਜ਼ੀ ਉਪਭੋਗਤਾਵਾਂ ਲਈ ਮੌਸਮ ਜਾਗਰੂਕਤਾ ਵਧਦੀ ਹੈ | ਉਹਨਾਂ ਕਿਹਾ ਕਿ ਅੰਮਿ੍ਤਸਰ ਹਵਾਈ ਅੱਡੇ ਦੇ ਮੌਸਮ ਵਿਭਾਗ ਦੇ ਮੁਖੀ ਸ਼੍ਰੀ ਸੰਸਾਂਕ ਵਰਮਾ ਦੇ ਅਨੁਸਾਰ ਇਸ ਪਹਿਲਕਦਮੀ ਦਾ ਉਦੇਸ਼ ਹਵਾਬਾਜ਼ੀ ਸੇਵਾਵਾਂ ਨੂੰ ਸੁਚਾਰੂ, ਸੁਰੱਖਿਅਤ ਅਤੇ ਵਧੇਰੇ ਕੁਸ਼ਲ ਬਣਾਉਣਾ ਹੈ | ਅੰਮਿ੍ਤਸਰ ਹਵਾਈ ਅੱਡਾ ਸਟੀਕ ਅਤੇ ਭਰੋਸੇਮੰਦ ਹਵਾਬਾਜ਼ੀ ਕਾਰਜਾਂ ਦਾ ਸਮਰਥਨ ਕਰਨ ਲਈ ਰਨਵੇਅ ਦੇ ਨਾਲ ਸਥਾਪਤ ਤਿੰਨ ਅਤਿ-ਆਧੁਨਿਕ (ਏ.ਡਬਲਿਊ.ਓ.ਐਸ) ਯੂਨਿਟਾਂ ਨਾਲ ਲੈਸ ਹੈ |