ਪਾਕਿ ਸੂਚਨਾ ਮੰਤਰੀ ਵਲੋਂ ਭਾਰਤ ਲਈ ਜਾਸੂਸੀ ਕਰਨ ਵਾਲੇ ਮਛੇਰੇ ਨੂੰ ਗਿ੍ਫ਼ਤਾਰ ਕਰਨ ਦਾ ਦਾਅਵਾ

ਅੰਮਿ੍ਤਸਰ, 2 ਨਵੰਬਰ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਸੰਘੀ ਸੂਚਨਾ ਮੰਤਰੀ ਅਤਾਉੱਲਾ ਤਰਾਰ ਨੇ ਦਾਅਵਾ ਕੀਤਾ ਕਿ ਪਾਕਿ ਦੇ ਇਕ ਮਛੇਰੇ ਨੂੰ ਭਾਰਤ ਲਈ ਜਾਸੂਸੀ ਕਰਨ ਦੇ ਦੋਸ਼ ਵਿਚ ਗਿ੍ਫ਼ਤਾਰ ਕੀਤਾ ਗਿਆ ਹੈ | ਪ੍ਰੈੱਸ ਕਾਨਫ਼ਰੰਸ 'ਚ ਤਰਾਰ ਨੇ ਖ਼ੁਲਾਸਾ ਕੀਤਾ ਕਿ ਇਜਾਜ਼ ਮੱਲਾਹ ਨਾਮੀ ਮਛੇਰਾ ਸਮੁੰਦਰ 'ਚ ਮੱਛੀਆਂ ਫੜਦਾ ਸੀ | ਉਸ ਨੂੰ ਸਤੰਬਰ 'ਚ ਭਾਰਤੀ ਤੱਟ ਰੱਖਿਅਕਾਂ ਨੇ ਫੜ ਲਿਆ ਸੀ ਅਤੇ ਫ਼ੌਜੀ ਵਰਦੀਆਂ, ਪਾਕਿਸਤਾਨੀ ਕਰੰਸੀ, ਸਿਗਰਟ, ਮਾਚਸ, ਲਾਈਟਰ ਅਤੇ ਸਿਮ ਕਾਰਡ ਵਰਗੀਆਂ ਚੀਜ਼ਾਂ ਇਕੱਠੀਆਂ ਕਰਨ ਲਈ ਮਜਬੂਰ ਕੀਤਾ ਸੀ | ਮੰਤਰੀ ਅਨੁਸਾਰ ਮੱਲਾਹ ਨੂੰ ਦੱਸਿਆ ਗਿਆ ਸੀ ਕਿ ਉਸ ਨੂੰ ਜਾਸੂਸੀ ਲਈ ਭੁਗਤਾਨ ਕੀਤਾ ਜਾਵੇਗਾ | ਉਕਤ ਮਛੇਰੇ ਨੂੰ ਆਖ਼ਰਕਾਰ ਰਿਹਾਅ ਕਰ ਦਿੱਤਾ ਗਿਆ ਅਤੇ ਕੁਝ ਚੀਜ਼ਾਂ ਲਿਆਉਣ ਦੇ ਕੰਮ ਨਾਲ ਪਾਕਿ ਭੇਜ ਦਿੱਤਾ ਗਿਆ | ਤਰਾਰ ਨੇ ਅੱਗੇ ਕਿਹਾ ਕਿ ਜਦੋਂ ਮਛੇਰੇ ਨੇ ਇਹ ਚੀਜ਼ਾਂ ਇਕੱਠੀਆਂ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਪਾਕਿਸਤਾਨੀ ਖ਼ੁਫ਼ੀਆ ਏਜੰਸੀਆਂ ਨੇ ਉਸ 'ਤੇ ਨਜ਼ਰ ਰੱਖਣੀ ਸ਼ੁਰੂ ਕਰ ਦਿੱਤੀ | ਉਹ ਸਾਰੀਆਂ ਚੀਜ਼ਾਂ ਲੈ ਕੇ ਭਾਰਤ ਵੱਲ ਜਾ ਰਿਹਾ ਸੀ ਤਾਂ ਉਸ ਨੂੰ ਸਮੁੰਦਰ 'ਚ ਪਾਕਿਸਤਾਨੀ ਏਜੰਸੀਆਂ ਨੇ ਫੜ ਲਿਆ |