ਪੰਜਾਬ ਰਾਜ ਸਹਿਕਾਰੀ ਮਿਲਕ ਪਲਾਂਟ ਇੰਪਲਾਈਜ਼ ਕਨਫੈਡਰੇਸ਼ਨ ਵਲੋਂ ਕਾਲੀ ਦੀਵਾਲੀ ਮਨਾਉਣ ਦਾ ਐਲਾਨ

ਬਠਿੰਡਾ, 18 ਅਕਤੂਬਰ (ਸੱਤਪਾਲ ਸਿੰਘ ਸਿਵੀਆਂ): ਮਿਲਕਫੈੱਡ ਦੇ ਪ੍ਰਬੰਧਕਾਂ ਦੀ ਵਿਤਕਰੇਬਾਜ਼ੀ ਤੋਂ ਖ਼ਫ਼ਾ ਹੋਏ ਪੰਜਾਬ ਭਰ ਦੇ ਮਿਲਕਫੈੱਡ ਦੇ ਪੱਕੇ ਕਰਮਚਾਰੀਆਂ ਨੇ ਕਾਲੀ ਦੀਵਾਲੀ ਮਨਾਉਣ ਦਾ ਐਲਾਨ ਕੀਤਾ ਹੈ | ਇਸ ਸੰਬੰਧੀ ਪੰਜਾਬ ਰਾਜ ਸਹਿਕਾਰੀ ਮਿਲਕ ਪਲਾਂਟ/ਪ੍ਰੋਜੈਕਟ ਇੰਪਲਾਈਜ਼ ਕਨਫੈਡਰੇਸ਼ਨ ਦੇ ਸੂਬਾ ਪ੍ਰਧਾਨ ਸੁਖਦੇਵ ਸਿੰਘ, ਸੂਬਾ ਜਨਰਲ ਸਕੱਤਰ ਮਹਦੀਨ ਪਟਿਆਲਾ, ਉੱਪ-ਪ੍ਰਧਾਨ ਗੁਰਸਿਮਰਨ ਸਿੰਘ ਜਲੰਧਰ ਅਤੇ ਪੁਸ਼ਪਿੰਦਰ ਸਿੰਘ ਨੇ ਦੱਸਿਆ ਕਿ ਮਿਲਕਫੈੱਡ ਦੇ ਪ੍ਰਬੰਧਕਾਂ ਵਲੋਂ ਇਸ ਸਾਲ ਦੀ ਦੀਵਾਲੀ ਦੇ ਮੌਕੇ 'ਤੇ ਰੈਗੂਲਰ ਕਰਮਚਾਰੀਆਂ ਨੂੰ ਪਿਛਲੇ ਕਈ ਸਾਲਾਂ ਤੋਂ ਮਿਲਦੀ ਆ ਰਹੀ 10,000 ਦੀ ਤਿਉਹਾਰੀਂ ਐਡਵਾਂਸ ਰਕਮ ਨਾ ਦੇਣ ਦਾ ਫ਼ੈਸਲਾ ਕੀਤਾ ਹੈ, ਜਦੋਂ ਕਿ ਇਸ ਦੇ ਉਲਟ ਨਵੇਂ ਬਣੇ ਇੰਪਲਾਈਜ਼ ਸਰਵਿਸ ਰੂਲ-2023 ਤਹਿਤ ਕੰਮ ਕਰ ਰਹੇ ਕਰਮਚਾਰੀਆਂ 25,000 ਦੀ ਰਕਮ ਜਾਰੀ ਕੀਤੀ ਗਈ ਹੈ ਤੇ ਅਜਿਹਾ ਕਰਕੇ ਮਿਲਕਫੈੱਡ ਨੇ ਪੱਕੇ ਕਰਮਚਾਰੀਆਂ ਨਾਲ ਵਿਤਕਰੇ ਭਰਿਆ ਵਿਵਹਾਰ ਕੀਤਾ ਹੈ |ਉਨ੍ਹਾਂ ਕਿਹਾ ਕਿ ਮਿਲਕਫੈੱਡ ਪ੍ਰਬੰਧਕਾਂ ਵਲੋਂ ਤਿਉਹਾਰੀਂ ਐਡਵਾਂਸ ਨੂੰ ਇਸ ਸ਼ਰਤ ਨਾਲ ਜੋੜਨਾ ਕਿ ਕਰਮਚਾਰੀ ਪਹਿਲਾਂ ਨਵੇਂ ਇੰਪਲਾਈਜ਼ ਸਰਵਿਸ ਰੂਲ- 2023 ਨੂੰ ਜੁਆਇਨ ਕਰਨ, ਇਕ ਕਿਸਮ ਦਾ ਦਬਾਅ ਬਣਾਉਣ ਵਾਲਾ ਗੈਰ-ਨਿਆਂਇਕ ਕਦਮ ਹੈ, ਜਿਸ ਦੇ ਖ਼ਿਲਾਫ਼ ਕਨਫੈਡਰੇਸ਼ਨ ਨੇ ਕਾਲੀ ਦੀਵਾਲੀ ਮਨਾਉਣ ਦਾ ਫ਼ੈਸਲਾ ਕੀਤਾ ਹੈ | ਇਸ ਦੌਰਾਨ ਸਾਰੇ ਕਰਮਚਾਰੀ ਆਪਣੇ ਮੋਢਿਆਂ 'ਤੇ ਕਾਲੇ ਬਿੱਲੇ ਲਗਾ ਕੇ ਸ਼ਾਂਤੀ, ਅਨੁਸ਼ਾਸਨ ਅਤੇ ਸੇਵਾ ਦੇ ਨਾਲ ਆਪਣੀ ਡਿਊਟੀ ਕਰਨਗੇ | ਆਗੂਆਂ ਨੇ ਕਿਹਾ ਕਿ ਫੈਡਰੇਸ਼ਨ ਦੇ ਫ਼ੈਸਲੇ ਅਨੁਸਾਰ ਕੋਈ ਕਰਮਚਾਰੀ ਮਿਲਕਫੈੱਡ ਤੋਂ ਤਿਉਹਾਰੀਂ ਤੋਹਫ਼ੇ ਜਾਂ ਮਠਿਆਈ ਵਗ਼ੈਰਾ ਵੀ ਸਵੀਕਾਰ ਨਹੀਂ ਕਰੇਗਾ | ਉਨ੍ਹਾਂ ਕਿਹਾ ਕਿ ਜਦੋਂ ਤੱਕ ਮਿਲਕਫੈੱਡ ਦੇ ਪ੍ਰਬੰਧਕਾਂ ਵਲੋਂ ਕਰਮਚਾਰੀਆਂ ਦਾ ਮਾਣ-ਸਤਿਕਾਰ ਬਹਾਲ ਨਹੀਂ ਕੀਤਾ ਜਾਂਦਾ, ਰੋਸ ਜਾਰੀ ਰਹੇਗਾ |