ਪਣਜੀ : 'ਭਾਰਤ ਦੇ ਅੰਤਰਰਾਸ਼ਟਰੀ ਫ਼ਿਲਮ ਫੈਸਟੀਵਲ 'ਚ ਪੰਜਾਬੀ ਫ਼ਿਲਮਾਂ ਦੀ ਗ਼ੈਰ ਮੌਜੂਦਗੀ ਪੰਜਾਬੀ ਫ਼ਿਲਮ ਇੰਡਸਟਰੀ ਲਈ ਵੱਡੀ ਸੋਚ ਦਾ ਵਿਸ਼ਾ ਹੈ | ਪੰਜਾਬੀ ਫ਼ਿਲਮ ਇੰਡਸਟਰੀ ਨੂੰ ਦੂਜੀਆਂ ਖੇਤਰੀ ਭਾਸ਼ਾਵਾਂ ਦੀਆਂ ਚੋਣਵੀਆਂ ਫ਼ਿਲਮਾਂ ਨੂੰ ਗਹੁ ਨਾਲ ਵੇਖਣਾ ਚਾਹੀਦਾ ਹੈ, ਤਾਂ ਜੋ ਉਹ ਪੜਚੋਲ ਕਰ ਸਕਣ ਕਿ ਕਿੱਥੇ ਅਤੇ ਕੀ ਖੁੰਝ ਰਿਹਾ ਹੈ |' ਇਹ ਮੰਨਣਾ ਹੈ ਇਸ ਫੈਸਟੀਵਲ ਲਈ ਚੁਣੀਆਂ ਗਈਆਂ ਫ਼ੀਚਰ ਫ਼ਿਲਮਾਂ ਦੇ ਜਯੂਰੀ ਮੈਂਬਰ ਅਰੁਣ ਬਖ਼ਸ਼ੀ ਦਾ | ਬਖ਼ਸ਼ੀ, ਜੋ ਖ਼ੁਦ ਪੰਜਾਬ ਨਾਲ ਤਾਅਲੁਕ ਰੱਖਦੇ ਹਨ ਅਤੇ ਕਈ ਪੰਜਾਬੀ ਫ਼ਿਲਮਾਂ ਦਾ ਹਿੱਸਾ ਰਹੇ ਹਨ, ਨੇ 'ਅਜੀਤ' ਨਾਲ ਗੱਲ ਕਰਦਿਆਂ ਕਿਹਾ ਕਿ ਹੋਰਨਾਂ ਪੰਜਾਬੀਆਂ ਵਾਂਗ ਉਨ੍ਹਾਂ ਨੂੰ ਵੀ ਇਸ ਫੈਸਟੀਵਲ 'ਚ ਕੋਈ ਪੰਜਾਬੀ ਫ਼ਿਲਮ ਨਾ ਹੋਣ 'ਤੇ ਨਿਰਾਸ਼ਾ ਹੋਈ | ਬਖ਼ਸ਼ੀ ਨੇ ਕਿਹਾ ਕਿ ਫ਼ਿਲਮਾਂ ਦੀ ਪੜਚੋਲ ਕਰਨ ਲਈ ਰਾਜਾ ਬੁੰਦੇਲਾ (ਫ਼ਿਲਮ ਅਦਾਕਾਰ) ਦੀ ਅਗਵਾਈ ਹੇਠ 13 ਮੈਂਬਰੀ ਜਯੂਰੀ ਬਣਾਈ ਗਈ ਸੀ ਅਤੇ 38 ਦਿਨਾਂ 'ਚ 175 ਤੋਂ ਵੱਧ ਫ਼ਿਲਮਾਂ ਦੀ ਸਮੀਖਿਆ ਕਰਨੀ ਉਂਝ ਇਕ ਲੰਮਾ ਕੰਮ ਸੀ |
