ਟੋਰਾਂਟੋ, 27 ਦਸੰਬਰ (ਹਰਜੀਤ ਸਿੰਘ ਬਾਜਵਾ)-ਗ੍ਰੇਟਰ ਟੋਰਾਂਟੋ ਏਰੀਆ ਅਤੇ ਆਸ-ਪਾਸ ਦੇ ਖੇਤਰਾਂ ਵਿੱਚ ਕੜਾਕੇ ਦੀ ਠੰਢ ਪੈ ਰਹੀ ਹੈ ਅਤੇ ਹਰ ਦੂਜੇ ਤੀਜੇ ਦਿਨ ਪੈ ਰਹੀ ਬਰਫਬਾਰੀ ਨਾਲ ਠੰਢ ਵਿਚ ਹੋਰ ਵੀ ਵਾਧਾ ਹੋ ਰਿਹਾ ਹੈ | ਭਾਵੇਂ ਕਈ ਖੇਤਰਾਂ ਵਿਚ ਅਜੇ ਬਰਫ ਦੇ ਵੱਡੇ ਢੇਰ ਨਹੀਂ ਲੱਗੇ ਪਰ ਫੇਰ ਵੀ ਪੈ ਰਹੀ ਭਾਰੀ ਬਰਫਬਾਰੀ ਕਾਰਨ ਲੋਕ ਕੜਾਕੇ ਦੀ ਠੰਢ ਨਾਲ ਜਰੂਰ ਕੁੰਗੜ ਰਹੇ ਹਨ | ਪਿਛਲੇ ਦੋ ਕੁ ਦਿਨਾਂ ਦੌਰਾਨ ਹੋਈ ਬਰਫਬਾਰੀ ਅਤੇ ਤਿਲਕਣਬਾਜ਼ੀ ਕਾਰਨ ਅਨੇਕਾਂ ਹੀ ਵਾਹਨ ਵੀ ਨੁਕਸਾਨੇ ਗਏ ਹਨ ਜਦੋਂਕਿ ਬਰਫਬਾਰੀ ਅਤੇ ਤਿਲਕਣਬਾਜ਼ੀ ਵਿਚ ਤੇਜ਼ ਡਰਾਈਵਿੰਗ ਕਰਨੀ ਬਹੁਤੇ ਲੋਕਾਂ ਨੂੰ ਮਹਿੰਗੀ ਪੈਂਦੀ ਹੈ | ਪ੍ਰਸ਼ਾਸਨ ਵਲੋਂ ਇਸ਼ਤਿਹਾਰਾਂ ਅਤੇ ਆਪਣੇ ਸੋਰਸਾਂ ਰਾਹੀਂ ਵੀ ਲੋਕਾਂ ਨੂੰ ਇਸ ਮੌਸਮ ਵਿਚ ਵਧੇਰੇ ਬਚਾਅ ਕਰਨ ਦੀ ਅਪੀਲ ਵੀ ਕੀਤੀ ਜਾਂਦੀ ਹੈ | ਮੌਸਮ ਵਿਭਾਗ ਵਲੋਂ ਆਉਣ ਵਾਲੇ ਦਿਨਾਂ ਵਿਚ ਵੀ ਭਾਰੀ ਬਰਫਬਾਰੀ ਦੀ ਭਵਿੱਖਬਾਣੀ ਕੀਤੀ ਜਾ ਰਹੀ ਹੈ |
