ਨਵੀਂ ਦਿੱਲੀ, 22 ਨਵੰਬਰ (ਮਿਸਰਦੀਪ ਭਾਟੀਆ)-ਸੱਭਿਆਚਾਰਕ ਆਦਾਨ-ਪ੍ਰਦਾਨ ਪ੍ਰੋਗਰਾਮ ਦੇ ਤਹਿਤ ਸਾਹਿਤ ਅਕਾਦਮੀ ਵਿਚ ਰੂਸੀ ਲੇਖਕਾਂ ਦੇ ਨਾਲ ਭਾਰਤੀ ਲੇਖਕਾਂ ਦੀ ਗੱਲਬਾਤ ਦਾ ਪ੍ਰੋਗਰਾਮ ਕਰਵਾਇਆ ਗਿਆ | ਰੂਸ ਤੋਂ ਆਏ ਪ੍ਰਸਿੱਧ ਬਾਲ ਲੇਖਕ ਦਮਿਤਰੀ ਅਲੈਗਜ਼ੈਂਡਰੋਵਿਚ ਯੇਮੇਟਸ ਨੇ ਆਪਣੀਆਂ ਲਿਖਤਾਂ ਬਾਰੇ ਵਿਸਥਾਰ ਵਿਚ ਗੱਲ ਕੀਤੀ ਅਤੇ ਮੌਜੂਦ ਲੇਖਕਾਂ ਦੇ ਸਵਾਲਾਂ ਦੇ ਜਵਾਬ ਵੀ ਦਿੱਤੇ | ਪ੍ਰੋਗਰਾਮ ਦੀ ਪ੍ਰਧਾਨਗੀ ਪ੍ਰਸਿੱਧ ਕਵੀ, ਲੇਖਕ ਅਤੇ ਅਨੁਵਾਦਕ ਉਦੈ ਨਰਾਇਣ ਸਿੰਘ ਨੇ ਕੀਤੀ | ਇਸ ਮੌਕੇ 'ਤੇ ਉੱਘੀ ਪੰਜਾਬੀ ਲੇਖਿਕਾ ਡਾ. ਵਨੀਤਾ, ਸਿੰਧੀ ਲੇਖਕ ਮੋਹਨ ਹਿਮਖਾਣੀ ਅਤੇ ਦਿੱਲੀ ਯੂਨੀਵਰਸਿਟੀ ਵਿਚ ਰੂਸੀ ਭਾਸ਼ਾ ਦੀ ਸਾਬਕਾ ਪ੍ਰੋਫ਼ੈਸਰ ਰੰਜਨਾ ਵੀ ਮੌਜੂਦ ਸੀ | ਸਾਹਿਤ ਅਕਾਦਮੀ ਦੇ ਸੰਪਾਦਕ (ਹਿੰਦੀ) ਅਨੂਪਮ ਤਿਵਾੜੀ ਅਤੇ ਡਿਪਟੀ ਸੈਕਟਰੀ ਦੇਵੇਂਦਰ ਕੁਮਾਰ ਦੇਵੇਸ਼ ਨੇ ਸਾਰਿਆਂ ਦਾ ਸਵਾਗਤ ਕੀਤਾ | ਆਪਣੇ ਸੰਬੋਧਨ ਵਿਚ ਦਮਿਤਰੀ ਅਲੈਗਜ਼ੈਂਡਰੋਵਿਚ ਯੇਮੇਟਸ ਨੇ ਕਿਹਾ ਕਿ ਉਹ ਭਾਰਤ ਦੀ ਪ੍ਰਕਿਰਤੀ ਅਤੇ ਪਰਿਵਾਰਾਂ ਨਾਲ ਬੱਚਿਆਂ ਦੀ ਮੌਜੂਦਗੀ ਤੋਂ ਬਹੁਤ ਪ੍ਰਭਾਵਿਤ ਹਨ | ਉਨ੍ਹਾਂ ਭਾਰਤ ਅਤੇ ਰੂਸ ਦੀਆਂ ਉਨ੍ਹਾਂ ਸਾਂਝੀਆਂ ਪਰੰਪਰਾਵਾਂ ਦਾ ਵੀ ਜ਼ਿਕਰ ਕੀਤਾ ਜੋ ਦੋਵਾਂ ਦੇਸ਼ਾਂ ਦੀ ਦੋਸਤੀ ਨੂੰ ਅਨਮੋਲ ਬਣਾਉਂਦੀਆਂ ਹਨ | ਉਸਨੇ ਦੱਸਿਆ ਕਿ ਉਸਦੀ ਲਿਖਤ ਰੂਸੀ ਲੋਕ ਕਹਾਣੀਆਂ ਤੋਂ ਪ੍ਰੇਰਿਤ ਹੈ | ਆਪਣੇ ਪ੍ਰਧਾਨਗੀ ਭਾਸ਼ਣ ਵਿਚ ਉਦੈ ਨਰਾਇਣ ਨਚੀਕੇਤਾ ਨੇ ਕਿਹਾ ਕਿ ਸਾਡੀ ਉਮਰ ਦੇ ਜ਼ਿਆਦਾ ਭਾਰਤੀਆਂ ਨੇ ਰੂਸੀ ਬਾਲ ਸਾਹਿਤ ਆਪਣੀਆਂ-ਆਪਣੀਆਂ ਭਾਸ਼ਾਵਾਂ ਵਿਚ ਅਨੁਵਾਦ ਦੇ ਰੂਪ ਵਿਚ ਪੜਿ੍ਹਆ ਹੈ | ਉਸ ਸਮੇਂ ਇਹ ਕਿਤਾਬਾਂ ਬਹੁਤ ਸਸਤੀਆਂ ਅਤੇ ਸੁੰਦਰ ਹੁੰਦੀਆਂ ਸਨ | ਪ੍ਰੋਗਰਾਮ ਵਿਚ ਰੂਸ ਤੋਂ ਆਈਆਂ ਬ੍ਰੋਨੇਤਸਕਾਇਆ ਗੈਲੀਨਾ ਐਡੁਆਰਡੋਵਨਾ ਅਤੇ ਐਮੇਲਿਨ ਅਲੈਕਲੀ ਅਲੈਗਜ਼ੈਂਡਰੋਵਿਚ ਵੀ ਮੌਜੂਦ ਸਨ | ਭਾਰਤੀ ਲੇਖਕਾਂ ਵਿਚ ਸੁਕ੍ਰਿਤਾ ਪਾਲ ਕੁਮਾਰ, ਕੈਲਾਸ਼ ਨਰਾਇਣ ਤਿਵਾੜੀ, ਰਫੀਕ ਮਸੂਦੀ, ਗੌਰੀ ਸ਼ੰਕਰ ਰੈਨਾ, ਸੁਮਨ ਕੁਮਾਰ ਆਦਿ ਮੌਜੂਦ ਸਨ | ਪ੍ਰੋਗਰਾਮ ਦਾ ਸੰਚਾਲਨ ਅਕਾਦਮੀ ਦੇ ਡਿਪਟੀ ਸੈਕਟਰੀ ਐਨ. ਸੁਰੇਸ਼ ਬਾਬੂ ਨੇ ਕੀਤਾ |
