ਜਲੰਧਰ

ਮਾਂ ਦੁਰਗਾ ਦੇ ਨਵਰਾਤਰੇ ਅੱਜ ਤੋਂ ਸ਼ੁਰੂ, ਲੋਕਾਂ ਨੇ ਕੀਤੀ ਖ਼ਰੀਦਦਾਰੀ

ਸੁੰਦਰ ਲਾਈਟਾਂ ਨਾਲ ਸਜਿਆ ਸ੍ਰੀ ਦੇਵੀ ਤਾਲਾਬ ਮੰਦਰ | ਤਸਵੀਰਾਂ : ਮੁਨੀਸ਼ ਅੱਜ ਤੋਂ ਸ਼ੁਰੂ ਹੋਏ ਨਰਾਤਿਆਂ ਸੰਬੰਧੀ ਬਾਜ਼ਾਰਾਂ 'ਚ ਖਰੀਦਦਾਰੀ ਕਰਦੀਆਂ ਹੋਈਆਂ ਔਰਤਾਂ | 22-09-2025

ਜਲੰਧਰ, 21 ਸਤੰਬਰ (ਸ਼ੈਲੀ)-ਮਾਂ ਦੁਰਗਾ ਦੇ ਨਵਰਾਤੇ ਅੱਜ ਤੋਂ ਸ਼ੁਰੂ ਹੋ ਰਹੇ ਹਨ | ਇਸ ਵਾਰ ਨਵਰਾਤੇ 22 ਸਤੰਬਰ ਤੋਂ 2 ਅਕਤੂਬਰ ਤੱਕ ਚੱਲਣਗੇ | ਨਵਰਾਤਿਆਂ ਦੌਰਾਨ, ਮਾਂ ਦੁਰਗਾ ਦੇ ਨੌਂ ਸਰੂਪਾਂ ਦੀ ਪੂਜਾ ਕੀਤੀ ਜਾਂਦੀ ਹੈ | ਪਹਿਲੇ ਦਿਨ ਦੇਵੀ ਸ਼ੈਲਪੁੱਤਰੀ, ਦੂਜੇ ਦਿਨ ਦੇਵੀ ਬ੍ਰਹਮਚਾਰਿਣੀ, ਤੀਜੇ ਦਿਨ ਦੇਵੀ ਚੰਦਰਘੰਟਾ, ਚੌਥੇ ਦਿਨ ਦੇਵੀ ਕੁਸ਼ਮਾਂਡਾ, ਪੰਜਵੇਂ ਦਿਨ ਦੇਵੀ ਸਕੰਦਮਾਤਾ, ਛੇਵੇਂ ਦਿਨ ਦੇਵੀ ਕਾਤਿਆਨੀ, ਸੱਤਵੇਂ ਦਿਨ ਦੇਵੀ ਕਾਲਰਾਤਰੀ, ਅੱਠਵੇਂ ਦਿਨ ਦੇਵੀ ਮਹਾਗੌਰੀ ਅਤੇ ਨੌਵੇਂ ਦਿਨ ਦੇਵੀ ਸਿੱਧੀਦਾਤਰੀ ਦੀ ਪੂਜਾ ਕੀਤੀ ਜਾਂਦੀ ਹੈ | ਨਰਾਤਿਆਂ ਨੂੰ ਲੈ ਕੇ ਸ਼ਰਧਾਲੂਆਂ ਵਿਚ ਬਹੁਤ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਹੈ | ਸ਼ਰਧਾਲੂਆਂ ਨੇ ਮਾਂ ਦੁਰਗਾ ਦੀ ਪੂਜਾ ਲਈ ਪੂਜਾ ਸਮੱਗਰੀ ਦੀ ਖ਼ਰੀਦਦਾਰੀ ਕੀਤੀ | ਨਵਰਾਤਿਆ ਨੂੰ ਲੈ ਕੇ ਸ਼ਹਿਰ ਦੇ ਮੰਦਰਾਂ ਨੂੰ ਵੀ ਰੋਸ਼ਨੀ ਨਾਲ ਸੁੰਦਰ ਢੰਗ ਨਾਲ ਸਜਾਇਆ ਗਿਆ ਹੈ | ਜਾਣਕਾਰੀ ਅਨੁਸਾਰ, ਨਵਰਾਤਿਆਂ ਦੌਰਾਨ ਸ਼ਰਧਾਲੂ ਵਰਤ ਰੱਖਦੇ ਹਨ | ਬਹੁਤ ਸਾਰੇ ਸ਼ਰਧਾਲੂ ਪੂਰੇ ਨੌਂ ਦਿਨਾਂ ਲਈ ਵਰਤ ਵੀ ਰੱਖਦੇ ਹਨ | ਇਸ ਦਿਨ ਮੰਦਰਾਂ ਵਿਚ ਸੰਕੀਰਤਨ ਹੁੰਦਾ ਹੈ | ਨਵਰਾਤਿਆਂ ਦੌਰਾਨ, ਲੋਕ ਸਵੇਰੇ-ਸਵੇਰੇ ਮੰਦਰਾਂ ਵਿਚ ਜੋਤਾਂ ਜਗਾਉਂਦੇ ਹਨ ਤੇ ਮਾਂ ਦਾ ਆਸ਼ੀਰਵਾਦ ਲੈਣ ਲਈ ਲੰਬੀਆਂ ਕਤਾਰਾਂ ਵਿਚ ਖੜ੍ਹੇ ਹੋ ਕੇ ਮੱਥਾ ਟੇਕਦੇ ਹਨ | ਨਵਰਾਤਿਆਂ ਦੇ ਵਰਤ ਦੌਰਾਨ, ਸ਼ਰਧਾਲੂ ਸਿਰਫ਼ ਫਲ, ਪਾਣੀ, ਸਿੰਘਾੜੇ ਦੇ ਆਟੇ ਦੀਆਂ ਰੋਟੀਆਂ, ਦੁੱਧ ਅਤੇ ਦਹੀਂ ਦਾ ਸੇਵਨ ਕਰਦੇ ਹਨ | ਲੋਕ ਪਹਿਲੀ ਨਰਾਤੇ 'ਤੇ ਆਪਣੇ ਘਰਾਂ ਵਿੱਚ ਕਲਸ਼ ਸਥਾਪਨ ਕਰਦੇ ਹਨ | ਹਮੇਸ਼ਾ ਵਾਂਗ, ਇਸ ਸਾਲ, ਜਿੱਥੇ ਲੋਕ ਨਵਰਾਤਿਆਂ ਲਈ ਉਤਸ਼ਾਹਿਤ ਹਨ, ਉੱਥੇ ਹੀ ਮੰਦਰਾਂ ਵਿੱ ਵੀ ਤਿਆਰੀਆਂ ਕੀਤੀਆਂ ਗਈਆਂ ਹਨ | ਇਸ ਦੌਰਾਨ, ਜਲੰਧਰ ਦੇ ਸ੍ਰੀ ਦੇਵੀ ਤਲਾਬ ਮੰਦਰ ਨੂੰ ਸੁੰਦਰ ਰੋਸ਼ਨੀ ਨਾਲ ਸਜਾਇਆ ਗਿਆ ਹੈ | ਮੰਦਰ ਪ੍ਰਬੰਧਨ ਕਮੇਟੀ ਦੇ ਜਨਰਲ ਸਕੱਤਰ ਰਾਜੇਸ਼ ਵਿਜ ਨੇ ਦੱਸਿਆ ਕਿ ਮੰਦਰ ਵਿੱਚ ਨਰਾਤਿਆਂ ਸਬੰਧੀ ਤਿਆਰੀਆਂ ਪੂਰੀਆਂ ਹੋ ਗਈਆਂ ਹਨ | ਨਰਾਤਿਆਂ ਦੇ ਪਹਿਲੇ ਦਿਨ ਸਵੇਰੇ 5 ਵਜੇ ਮੂਰਤੀ ਨੂੰ ਇਸ਼ਨਾਨ ਤੇ ਪੂਜਾ ਕੀਤੀ ਜਾਵੇਗੀ | ਉਨ੍ਹਾਂ ਅੱਗੇ ਕਿਹਾ ਕਿ ਇਸ ਦੌਰਾਨ, ਮੰਦਰ ਵਿੱਚ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਵਰਤ ਦੌਰਾਨ ਖਾਣ ਵਾਲੀਆਂ ਵਸਤਾਂ ਦਾ ਪ੍ਰਸਾਦ ਦਿੱਤਾ ਜਾਵੇਗਾ | ਉਨ੍ਹਾਂ ਕਿਹਾ ਕਿ ਐਤਵਾਰ, 28 ਸਤੰਬਰ ਨੂੰ ਮੰਦਰ ਵਿਚ ਜੋਤਾਂ ਜਗਾਉਣ ਤੋਂ ਬਾਅਦ ਵੱਡੀ ਗਿਣਤੀ ਵਿਚ ਔਰਤਾਂ ਸ੍ਰੀ ਦੁਰਗਾ ਸਤੂਤੀ ਦਾ ਪਾਠ ਕਰਨਗੀਆਂ ਅਤੇ ਉਨ੍ਹਾਂ ਲਈ ਨਵਰਾਤਿਆਂ ਦੇ ਭੋਜਨ ਦਾ ਪ੍ਰਬੰਧ ਹੋਵੇਗਾ | ਉਨ੍ਹਾਂ ਇਹ ਵੀ ਕਿਹਾ ਕਿ ਮੰਦਰ ਵਿਚ ਰੋਜ਼ਾਨਾ ਸ਼ਾਮ ਨੂੰ ਭਜਨ ਸੰਧਿਆ ਕਰਵਾਈ ਜਾਵੇਗੀ | ਇਸੇ ਤਰ੍ਹਾਂ, ਸ੍ਰੀ ਗੀਤਾ ਮੰਦਰ ਮਾਡਲ ਟਾਊਨ ਦੇ ਪ੍ਰਧਾਨ ਵਿਜੇ ਖੁੱਲਰ ਨੇ ਕਿਹਾ ਕਿ ਮੰਦਰ ਨੂੰ ਸੁੰਦਰ ਢੰਗ ਨਾਲ ਸਜਾਇਆ ਗਿਆ ਹੈ | ਉਨ੍ਹਾਂ ਕਿਹਾ ਕਿ ਮੰਦਰ ਵਿਚ ਸਵੇਰੇ 8 ਵਜੇ ਨਵਗ੍ਰਹਿ ਪੂਜਾ ਕੀਤੀ ਜਾਵੇਗੀ, ਜਿਸ ਤੋਂ ਬਾਅਦ ਕਲਸ਼ ਸਥਾਪਨਾ ਕੀਤੀ ਜਾਵੇਗੀ, ਜਿਸ ਤੋਂ ਬਾਅਦ ਭਜਨ ਤੇ ਆਰਤੀ ਕੀਤੀ ਜਾਵੇਗੀ | ਮਾਂ ਬਗਲਾ ਮੁਖੀ ਧਾਮ ਗੁਲਮੋਹਰ ਸਿਟੀ ਦੇ ਸੰਸਥਾਪਕ ਨਵਜੀਤ ਭਾਰਦਵਾਜ ਨੇ ਕਿਹਾ ਨਵਰਾਤਿਆਂ ਦੌਰਾਨ ਮੰਦਰ ਨੂੰ ਸੁੰਦਰ ਢੰਗ ਨਾਲ ਸਜਾਇਆ ਗਿਆ ਹੈ | ਉਨ੍ਹਾਂ ਕਿਹਾ ਕਿ ਇਸ ਦੌਰਾਨ ਮੰਦਿਰ ਵਿਚ ਰੋਜ਼ਾਨਾ ਹਵਨ ਕੀਤਾ ਜਾਵੇਗਾ | ਮੰਦਰ ਵਿਚ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਨਰਾਤਿਆਂ ਨਰਾਤਿਆਂ ਵਿਚ ਖਾਣ ਵਾਲੀਆਂ ਵਸਤਾਂ ਦਾ ਪ੍ਰਸ਼ਾਦ ਵੰਡਿਆ ਜਾਵੇਗਾ |