ਹਲਵਾਰਾ, 9 ਮਈ (ਮਨਦੀਪ ਸਿੰਘ ਉੱਭੀ)-ਹਲਵਾਰਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੋਂ 15 ਮਈ ਨੂੰ ਉਡਾਣਾਂ ਸ਼ੁਰੂ ਹੋਣ ਜਾ ਰਹੀਆਂ ਹਨ ਹਨ | ਯਾਤਰੀਆਂ ਦੀ ਸੁਵਿਧਾ ਲਈ ਪੌੜੀਆਂ ਵਾਲੇ ਟਰੱਕ ਅਤੇ ਬੱਸਾਂ ਹਵਾਈ ਅੱਡੇ 'ਤੇ ਪਹੁੰਚ ਗਈਆ ਹਨ | ਯਾਤਰੀ ਪੌੜੀਆਂ ਵਾਲੇ ਟਰੱਕਾਂ ਨੂੰ ਹਵਾਈ ਜਹਾਜ਼ ਵਿੱਚ ਚੜਨ ਲਈ ਵਰਤਿਆ ਜਾਵੇਗਾ | ਉਨ੍ਹਾਂ ਦਾ ਮੁੱਖ ਕੰਮ ਯਾਤਰੀਆਂ ਅਤੇ ਚਾਲਕ ਦਲ ਨੂੰ ਜ਼ਮੀਨ ਤੋਂ ਹਵਾਈ ਜਹਾਜ਼ ਦੇ ਦਰਵਾਜ਼ਿਆਂ ਤੱਕ ਸੁਰੱਖਿਅਤ ਪਹੁੰਚ ਪ੍ਰਦਾਨ ਕਰਨਾ ਹੈ | ਇਹ ਉੱਚ-ਤਕਨੀਕੀ ਟਰੱਕ ਇੱਕ ਹਾਈਡਰੌਲਿਕ ਸਿਸਟਮ ਨਾਲ ਲੈਸ ਹੈ, ਜਿਸ ਨਾਲ ਵੱਖ-ਵੱਖ ਕਿਸਮਾਂ ਦੇ ਜਹਾਜ਼ਾਂ ਦੇ ਗੇਟ ਦੀ ਉਚਾਈ ਨੂੰ ਅਨੁਕੂਲ ਕਰਨ ਲਈ ਪੌੜੀਆਂ ਨੂੰ ਉੱਚਾ ਜਾਂ ਨੀਵਾ ਕੀਤਾ ਜਾ ਸਕਦਾ ਹੈ | ਇਸ ਤੋਂ ਇਲਾਵਾ, ਏਅਰ ਇੰਡੀਆ ਦੀਆਂ ਯਾਤਰੀ ਬੱਸਾਂ ਵੀ ਹਵਾਈ ਅੱਡੇ ਦੇ ਕੰਪਲੈਕਸ 'ਤੇ ਪਹੁੰਚ ਗਈਆਂ ਹਨ | ਟਰਮੀਨਲ ਇਮਾਰਤ ਵਿੱਚ ਏਅਰ ਇੰਡੀਆ ਬੋਰਡਿੰਗ ਕਾਊਾਟਰ ਤੋਂ ਪਾਸ ਪ੍ਰਾਪਤ ਕਰਨ ਤੋਂ ਬਾਅਦ ਯਾਤਰੀਆਂ ਦੀ ਸੁਰੱਖਿਆ ਜਾਂਚ ਕੀਤੀ ਜਾਵੇਗੀ | ਯਾਤਰੀ ਇਨ੍ਹਾਂ ਬੱਸਾਂ ਵਿੱਚ ਟਰਮੀਨਲ ਇਮਾਰਤ ਤੋਂ ਐਪਰਨ ਤੱਕ ਲਗਭਗ ਇੱਕ ਕਿਲੋਮੀਟਰ ਦੀ ਦੂਰੀ ਤੈਅ ਕਰਨਗੇ | ਇਹ ਧਿਆਨ ਦੇਣ ਯੋਗ ਹੈ ਕਿ ਲੁਧਿਆਣਾ ਦੇ ਪੇਂਡੂ ਖੇਤਰ ਦੇ ਐਤੀਆਣਾ ਪਿੰਡ ਦੀ 162 ਏਕੜ ਜ਼ਮੀਨ ਵਿਚ ਬਣੇ ਹਲਵਾਰਾ ਅੰਤਰਰਾਸ਼ਟਰੀ ਹਵਾਈ ਅੱਡੇ ਲਈ ਏਅਰ ਫੋਰਸ ਸਟੇਸ਼ਨ ਹਲਵਾਰਾ ਦੇ ਰਨਵੇਅ ਅਤੇ ਏਅਰ ਟਰੈਫਿਕ ਕੰਟਰੋਲ ਦੀ ਵਰਤੋਂ ਕੀਤੀ ਜਾਵੇਗੀ | ਯਾਤਰੀ ਬੱਸਾਂ ਰਾਹੀਂ ਐਪਰਨ ਤੱਕ ਪਹੁੰਚਣਗੇ ਅਤੇ ਫਿਰ ਯਾਤਰੀ ਪੌੜੀਆਂ ਵਾਲੇ ਟਰੱਕਾਂ ਦੀ ਮਦਦ ਨਾਲ ਜਹਾਜ਼ ਵਿੱਚ ਚੜ੍ਹਨਗੇ ਅਤੇ ਇੰਟਰਲਿੰਕ ਟੈਕਸੀਵੇਅ ਰਾਹੀਂ ਏਅਰ ਫੋਰਸ ਰਨਵੇਅ ਤੋਂ ਉਡਾਣ ਭਰਨਗੇ | ਇਲਾਕੇ ਦੇ ਵਸਨੀਕ ਦਹਾਕਿਆਂ ਤੋਂ ਹਵਾਈ ਅੱਡੇ ਦੀ ਉਡੀਕ ਕਰ ਰਹੇ ਹਨ ਅਤੇ 15 ਮਈ ਨੂੰ ਹਰ ਕਿਸੇ ਦਾ ਸੁਪਨਾ ਸਾਕਾਰ ਹੋਣ ਜਾ ਰਿਹਾ ਹੈ | ਸਾਲ 2007 ਵਿੱਚ ਤਤਕਾਲੀ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਨੇ ਹਲਵਾਰਾ ਵਿੱਚ ਸਿਵਲ ਹਵਾਈ ਅੱਡੇ ਦੇ ਪ੍ਰੋਜੈਕਟ ਨੂੰ ਮਨਜ਼ੂਰੀ ਦਿੱਤੀ ਸੀ | ਲਗਭਗ 20 ਸਾਲਾਂ ਬਾਅਦ, ਇਸ ਹਵਾਈ ਅੱਡੇ ਤੋਂ ਉਡਾਣਾਂ ਲਈ ਰਾਹ ਸਾਫ਼ ਹੋ ਗਿਆ ਹੈ |
