ਔੜ, 4 ਅਪ੍ਰੈਲ (ਗੁਰਨਾਮ ਸਿੰਘ ਸੈਣੀ) - ਥਾਣਾ ਔੜ ਦੀ ਪੁਲਿਸ ਪਾਰਟੀ ਵਲੋਂ 3.66 ਗ੍ਰਾਮ ਹੈਰੋਇਨ ਸਮੇਤ ਇੱਕ ਨੌਜਵਾਨ ਨੂੰ ਕਾਬੂ ਕਰਨ ਵਿੱਚ ਸਫਲਤਾ ਪ੍ਰਾਪਤ ਕੀਤੀ ਹੈ | ਜਿਸ ਸਬੰਧੀ ਜਾਣਕਾਰੀ ਦਿੰਦਿਆ ਐਸ.ਐਚ.ਓ. ਸਬ ਇੰਸਪੈਕਟਰ ਸੁਖਪਾਲ ਸਿੰਘ ਨੇ ਦੱਸਿਆ ਕਿ ਮੈਂ ਆਪਣੀ ਪੁਲਿਸ ਪਾਰਟੀ ਨਾਲ ਦੋਰਾਨੇ ਗਸ਼ਤ ਸਰਕਾਰੀ ਗੱਡੀ 'ਤੇ ਪਿੰਡ ਮੱਲਾ ਬੇਦੀਆਂ ਤੋਂ ਨਹਿਰ ਦੇ ਨਾਲ-ਨਾਲ ਪਿੰਡ ਬੁਹਾਰਾ ਵੱਲ ਨੂੰ ਜਾ ਰਹੇ ਸੀ | ਜਦੋਂ ਸਾਡੀ ਪੁਲਿਸ ਪਾਰਟੀ ਨਹਿਰ ਸੂਆ ਪਿੰਡ ਮੀਰਪੁਰ ਲੱਖਾ ਨਹਿਰ ਦੇ ਪੁੱਲ ਦੇ ਨਜ਼ਦੀਕ ਪੁੱਜੀ ਤਾਂ ਵਕਤ ਕਰੀਬ 3 ਵਜੇ ਸ਼ਾਮ ਦਾ ਹੋਵੇਗਾ, ਨਹਿਰ ਦੀ ਛੋਟੀ ਪੁਲੀ 'ਤੇ ਇਕ ਨੌਜਵਾਨ ਬੈਠਾ ਦਿਖਾਈ ਦਿੱਤਾ | ਜਿਸ ਨੇ ਪੁਲਿਸ ਦੀ ਗੱਡੀ ਨੂੰ ਦੇਖ ਕੇ ਘਬਰਾ ਕੇ ਕਾਹਲੀ ਨਾਲ ਆਪਣੇ ਹੱਥ ਵਿੱਚ ਫੜ੍ਹੀ ਕੋਈ ਚੀਜ਼ ਨਜ਼ਦੀਕ ਹੀ ਹੇਠਾਂ ਸੁੱਟ ਦਿੱਤੀ ਤੇ ਆਪ ਲੰਗੜਾ ਕੇ ਅੱਗੇ ਨੂੰ ਸੂਆ ਦੇ ਨਾਲ-ਨਾਲ ਤੁਰਨ ਲੱਗਾ | ਮੈਂ ਗੱਡੀ ਰੋਕ ਕੇ ਆਪਣੇ ਸਾਥੀ ਪੁਲਿਸ ਕਰਮਚਾਰੀਆਂ ਦੀ ਮਦਦ ਨਾਲ ਉਸ ਨੂੰ ਕਾਬੂ ਕਰਕੇ ਉਸ ਨੌਜਵਾਨ ਦਾ ਨਾਮ ਪਤਾ ਪੁੱਛਿਆ ਜਿਸਨੇ ਆਪਣਾ ਨਾਮ ਬਲਿਹਾਰ ਸਿੰਘ ਉਰਫ ਬੱਲੀ ਪੁੱਤਰ ਗੁਰਮੇਲ ਸਿੰਘ ਵਾਸੀ ਮਹਿਰਮਪੁਰ ਥਾਣਾ ਔੜ (ਸ਼ਭਸ.ਨਗਰ) ਦੱਸਿਆ ਤੇ ਬਲਿਹਾਰ ਸਿੰਘ ਉਰਫ ਬੱਲੀ ਵਲੋਂ ਹੇਠਾ ਸੁੱਟੀ ਹੋਈ ਚੀਜ਼ ਬਾਰੇ ਪੁੱਛਿਆਂ ਜਿਸ ਨੇ ਦੱਸਿਆ ਕਿ ਮੇਰੇ ਵਲੋਂ ਸੁੱਟੀ ਹੋਈ ਪਾਰਦਰਸ਼ੀ ਲਫਾਫੀ ਵਿੱਚ ਹੈਰੋਇਨ ਹੈ ਜਿਸ ਨੂੰ ਚੈੱਕ ਕਰਨ ਤੇ ਉਸ ਵਿੱਚੋਂ 3.66 ਗ੍ਰਾਮ ਹੈਰੋਇਨ ਬਰਾਮਦ ਹੋਈ | ਕਾਬੂ ਕੀਤੇ ਬਲਿਹਾਰ ਸਿੰਘ ਉਰਫ ਬੱਲੀ ਪਿੰਡ ਮਹਿਰਮਪੁਰ ਦੇ ਖਿਲਾਫ ਧਾਰਾ 21 ਐਨ.ਡੀ.ਪੀ.ਐਸ ਐਕਟ 1985 ਤਹਿਤ ਪੁਲਿਸ ਥਾਣਾ ਔੜ ਵਿਖੇ ਕੇਸ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ |
