ਬਟਾਲਾ, 8 ਜੁਲਾਈ (ਰਾਕੇਸ਼ ਰੇਖੀ)-ਬੈਂਕ ਤੋਂ ਪੈਸੇ ਕਢਵਾ ਕੇ ਘਰ ਜਾ ਰਹੀ ਨੂੰਹ ਸੱਸ ਤੋਂ ਮੋਟਰਸਾਇਕਲ ਸਵਾਰ 25 ਹਜ਼ਾਰ ਰੁਪਏ ਖੋਹ ਕੇ ਫਰਾਰ ਹੋ ਗਏ। ਥਾਣਾ ਕਿਲ੍ਹਾ ਲਾਲ ਸਿੰਘ ਦੇ ਏ.ਐਸ.ਆਈ. ਮੰਗਲ ਸਿੰਘ ਨੇ ਦੱਸਿਆ ਕਿ ਪਿੰਡ ਮਿਰਜ਼ਾਜਾਨ ਦੀ ਰਹਿਣ ਵਾਲੀ ਦਲਬੀਰ ਕੌਰ ਪਤਨੀ ਕਸ਼ਮੀਰ ਸਿੰਘ ਨੇ ਸ਼ਿਕਾਇਤ ਦਰਜ ਕਰਵਾਈ ਕਿ ਬੀਤੇ ਦਿਨੀਂ ਉਹ ਆਪਣੀ ਨੂੰਹ ਨੀਲਮ ਨਾਲ ਪੰਜਾਬ ਐਂਡ ਸਿੰਧ ਬੈਂਕ ਦੀ ਕਿਲ੍ਹਾ ਲਾਲ ਸਿੰਘ ਬ੍ਰਾਂਚ ’ਚੋਂ ਪੈਸੇ ਕਢਵਾਉਣ ਗਈ ਸੀ। ਉਸ ਨੇ ਬੈਂਕ ਤੋਂ 25 ਹਜ਼ਾਰ ਰੁਪਏ ਕਢਵਾ ਕੇ ਇਕ ਲਿਫਾਫੇ ਵਿਚ ਪਾ ਲਏ। ਉਹ ਦੋਵੇਂ ਜਣੀਆਂ ਘਰ ਜਾਣ ਲਈ ਬੱਸ ਫੜ੍ਹਣ ਵਾਸਤੇ ਪੈਦਲ ਕਿਲ੍ਹਾ ਲਾਲ ਸਿੰਘ ਦੇ ਬੱਸ ਸਟੈਂਡ ਵੱਲ ਆ ਰਹੀਆਂ ਸੀ। ਦਲਬੀਰ ਕੌਰ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸ ਦੀ ਨੂੰਹ ਉਸ ਤੋਂ ਅੱਗੇ ਜਾ ਰਹੀ ਸੀ ਤੇ ਉਹ ਪੈਸਿਆਂ ਵਾਲਾ ਲਿਫਾਫਾ ਫੜੀ ਪਿੱਛੇ ਚਲ ਰਹੀ ਸੀ। ਕਰੀਬ 10:30 ਵਜੇ ਡੇਰਾ ਬਾਬਾ ਨਾਨਕ ਵਲੋਂ ਮੋਟਰਸਾਇਕਲ ’ਤੇ ਆਏ ਦੋ ਅਣਪਛਾਤੇ ਵਿਅਕਤੀਆਂ ਨੇ ੳਸਦੇ ਹੱਥੋਂ ਪੈਸਿਆਂ ਵਾਲਾ ਲਿਫਾਫਾ ਖੋਹ ਕੇ ਫਰਾਰ ਹੋ ਗਏ। ਲਿਫਾਫੇ ਵਿਚ 25 ਹਜ਼ਾਰ ਰੁਪਏ ਤੋਂ ਇਲਾਵਾ ਉਸ ਦਾ ਮੋਬਾਇਲ ਫੋਨ, ਆਧਾਰ ਕਾਰਡ ਤੇ ਬੈਂਕ ਦੀ ਪਾਸਬੁੱਕ ਵੀ ਸੀ। ਪੁਲਿਸ ਨੇ ਅਣਪਛਾਤਿਆਂ ਦੇ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ।
