ਖਰੜ, 27 ਮਈ (ਜੰਡਪੁਰੀ)-ਅੱਜ ਕਿਸਾਨ ਯੂਨੀਅਨ ਲੱਖੋਵਾਲ ਦੇ ਵਫ਼ਦ ਵਲੋਂ ਜ਼ਿਲ੍ਹਾ ਪ੍ਰਧਾਨ ਦਵਿੰਦਰ ਸਿੰਘ ਦੇਹਕਲਾਂ ਦੀ ਅਗਵਾਈ ਹੇਠ ਖਰੜ ਦੀਆਂ ਸਮੱਸਿਆਵਾਂ ਸੰਬੰਧੀ ਐਸ. ਡੀ. ਐਮ. ਨੂੰ ਇਕ ਮੰਗ-ਪੱਤਰ ਸੌਂਪਿਆ ਗਿਆ | ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਦਵਿੰਦਰ ਸਿੰਘ ਦੇਹਕਲਾਂ ਨੇ ਕਿਹਾ ਕਿ ਮੰਗ-ਪੱਤਰ 'ਚ ਦੇਹਕਲਾਂ ਤੋਂ ਚੋਲਟਾ-ਪੰਨੂਆਂ ਸੜਕ, ਰੁੜਕੀ-ਪੀਰ ਸੁਹਾਣਾ-ਸਿੰਬਲ ਮਾਜਰਾ ਸੜਕ, ਬਡਾਲਾ ਰੋਡ ਖਰੜ ਤੋਂ ਖੇੜੀ ਚੌਕ ਸਿੰਬਲ ਮਾਜਰਾ, ਬਜਹੇੜੀ, ਦੇਹਕਲਾਂ, ਨਿਆਮੀਆਂ ਤੋਂ ਪੰਨੂਆਂ-ਦੇਹਕਲਾਂ-ਬਜਹੇੜੀ ਆਦਿ ਸੜਕਾਂ ਦੀ ਮੁਰੰਮਤ ਕਰਵਾਉਣ ਅਤੇ ਘੜੂੰਆਂ ਮਾਸਟਰ ਪਲਾਨ ਨੂੰ ਲਾਗੂ ਕਰਨ ਸੰਬੰਧੀ ਮੰਗ ਕੀਤੀ ਗਈ | ਮੰਗ ਪੱਤਰ 'ਚ ਇਹ ਵੀ ਕਿਹਾ ਗਿਆ ਕਿ ਰੇਲਵੇ ਵਿਭਾਗ ਵਲੋਂ ਐਕਵਾਇਰ ਕੀਤੀ ਗਈ ਜ਼ਮੀਨ ਦੇ ਮੁਆਵਜ਼ੇ ਦੀ ਰਕਮ 'ਤੇ ਜੋ ਵਿਆਜ ਰੋਕਿਆ ਗਿਆ, ਉਸ ਨੂੰ ਅਦਾਲਤ ਦੇ ਫ਼ੈਸਲੇ ਅਨੁਸਾਰ ਤੁਰੰਤ ਕਿਸਾਨਾਂ 'ਚ ਵੰਡਿਆ ਜਾਵੇ | ਉਨ੍ਹਾਂ ਕਿਹਾ ਕਿ ਉਕਤ ਮੰਗਾਂ ਨੂੰ ਐਸ. ਡੀ. ਐਮ. ਨੇ 29 ਮਈ ਤੱਕ ਹੱਲ ਕਰਨ ਦਾ ਭਰੋਸਾ ਦਿੱਤਾ ਹੈ | ਵਫ਼ਦ 'ਚ ਚਰਨਜੀਤ ਸਿੰਘ ਸਿੰਬਲ ਮਾਜਰਾ, ਕੁਲਵੰਤ ਸਿੰਘ ਰੁੜਕੀ, ਸਰਬਜੀਤ ਸਿੰਘ ਲਹਿਰਾ, ਮਲਕੀਤ ਸਿੰਘ ਧਾਲੀਵਾਲ, ਸਲਵਿੰਦਰ ਸਿੰਘ ਘੋਗਾ, ਗੁਰਿੰਦਰ ਸਿੰਘ ਅਤੇ ਸੇਵਕ ਸਿੰਘ ਘੜੂੰਆਂ ਸਮੇਤ ਅਵਤਾਰ ਸਿੰਘ ਬਜਹੇੜੀ ਆਦਿ ਸ਼ਾਮਿਲ ਸਨ |
