ਖਾਣ ਵਾਲੇ ਤੇਲਾਂ ਦੀਆਂ ਕੀਮਤਾਂ 'ਚ ਤੇਜ਼ੀ ਨੇ ਰਸੋਈ ਦਾ ਬਜਟ ਹਿਲਾਇਆ <br/>

ਜਲੰਧਰ, 27 ਜਨਵਰੀ (ਸ਼ਿਵ)-ਕਈ ਦੇਸ਼ਾਂ 'ਤੇ ਲੱਗ ਰਹੇ ਟੈਰਿਫ਼ ਕਰਕੇ ਚੀਜ਼ਾਂ ਦੀਆਂ ਕੀਮਤਾਂ ਵਿਚ ਤੇਜ਼ੀ ਦਰਜ ਕੀਤੀ ਜਾ ਰਹੀ ਹੈ | ਇਸ ਦੇ ਚਲਦਿਆਂ ਕੁਝ ਦਿਨਾਂ ਵਿਚ ਹੀ ਸਾਰੇ ਖਾਣ ਵਾਲੇ ਤੇਲਾਂ ਵਿਚ ਕਰੀਬ 10 ਰੁਪਏ ਕਿੱਲੋ ਦੀ ਤੇਜ਼ੀ ਆਈ ਹੈ | ਤੇਲ ਕਾਰੋਬਾਰੀਆਂ ਦਾ ਕਹਿਣਾ ਹੈ ਕਿ ਇਹ ਤੇਜ਼ੀ ਜਨਵਰੀ ਤੋਂ ਲੈ ਕੇ ਮਾਰਚ ਮਹੀਨੇ ਤੱਕ ਬਣੇ ਰਹਿਣ ਦੇ ਆਸਾਰ ਹਨ | ਇਸ ਤੇਜ਼ੀ ਨੇ ਸਰੋਂ੍ਹ ਦੇ ਤੇਲ ਵਿਚ ਵੀ ਤੇਜ਼ੀ ਲੈ ਆਂਦੀ ਹੈ, ਕਿਉਂਕਿ ਕਣਕ ਦੇ ਨਾਲ ਹੀ ਸਰੋਂ੍ਹ ਦੀ ਫ਼ਸਲ ਬਾਜ਼ਾਰ ਵਿਚ ਆਉਂਦੀ ਹੈ | ਨਵੀਂ ਫ਼ਸਲ ਆਉਣ ਦੀ ਸੰਭਾਵਨਾ ਕਰਕੇ ਸਰੋਂ੍ਹ ਦੇ ਤੇਲ ਵਿਚ 5 ਰੁਪਏ ਕਿੱਲੋ ਦੀ ਕਮੀ ਆਈ ਸੀ ਪਰ ਖਾਣ ਵਾਲੇ ਹੋਰ ਤੇਲਾਂ ਦੀਆਂ ਕੀਮਤਾਂ ਵਿਚ ਆਈ ਤੇਜ਼ੀ ਨਾਲ ਸਰੋਂ੍ਹ ਦੇ ਤੇਲ ਦੀਆਂ ਕੀਮਤਾਂ ਫਿਰ ਵਧ ਗਈਆਂ ਹਨ, ਜੇਕਰ ਇਸ ਵਾਰ ਸਰੋਂ੍ਹ ਦੀ ਫ਼ਸਲ ਦੀ ਆਮਦ ਵਿਚ ਕਮੀ ਹੋਈ ਤਾਂ ਸਰੋਂ੍ਹ ਦੇ ਤੇਲ ਦੀਆਂ ਕੀਮਤਾਂ 'ਚ ਹੋਰ ਤੇਜ਼ੀ ਬਣਨ ਦੀ ਸੰਭਾਵਨਾ ਹੈ | ਜ਼ਿਕਰਯੋਗ ਹੈ ਕਿ ਸੋਇਆ, ਪਾਮ ਤੇ ਹੋਰ ਖਾਣ ਵਾਲੇ ਤੇਲ ਵਿਦੇਸ਼ਾਂ ਤੋਂ ਆਉਂਦੇ ਹਨ |