ਸੜਕ ਹਾਦਸੇ ਦੇ ਪੀੜਤ ਨੂੰ 24 ਸਾਲਾਂ ਬਾਅਦ ਮਿਲਿਆ ਇਨਸਾਫ਼

ਹਾਈ ਕੋਰਟ ਨੇ ਮੁਆਵਜ਼ਾ ਰਾਸ਼ੀ 52 ਲੱਖ ਰੁਪਏ ਤੋਂ ਵਧਾ ਕੇ 9.16 ਕਰੋੜ ਰੁਪਏ ਕੀਤੀ
ਚੰਡੀਗੜ੍ਹ, 27 ਜਨਵਰੀ (ਸੰਦੀਪ ਕੁਮਾਰ ਮਾਹਨਾ)–ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਨੇ ਸੜਕ ਹਾਦਸੇ ਦੇ ਇਕ ਮਾਮਲੇ 'ਚ ਮਾਨਵਤਾਵਾਦੀ ਪਹੁੰਚ ਅਪਣਾਉਂਦੇ ਹੋਏ ਪੀੜਤ ਨੂੰ ਦਿੱਤੇ ਜਾਣ ਵਾਲੇ ਮੁਆਵਜ਼ੇ ਵਿਚ ਬੇਮਿਸਾਲ ਵਾਧਾ ਕੀਤਾ ਹੈ | ਜਸਟਿਸ ਸੁਦੀਪਤੀ ਸ਼ਰਮਾ ਦੇ ਸਿੰਗਲ ਬੈਂਚ ਨੇ ਜਲੰਧਰ ਦੇ ਵਕੀਲ ਨਰਿੰਦਰ ਪਾਲ ਸਿੰਘ ਨੂੰ ਮੋਟਰ ਐਕਸੀਡੈਂਟ ਕਲੇਮਜ਼ ਟਿ੍ਬਿਊਨਲ ਵਲੋਂ 2008 'ਚ ਦਿੱਤੇ ਗਏ 52 ਲੱਖ ਰੁਪਏ ਦੇ ਮੁਆਵਜ਼ੇ ਨੂੰ ਵਧਾ ਕੇ 9, 16, 81, 844 ਰੁਪਏ (ਲਗਭਗ 9.16 ਕਰੋੜ ਰੁਪਏ) ਕਰ ਦਿੱਤਾ | ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਪੀੜਤ ਜੋ ਦੋ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਨਰਕ ਭਰੀ ਜ਼ਿੰਦਗੀ ਜੀਅ ਰਿਹਾ ਹੈ, ਲਈ ਇਹ ਰਕਮ ਸਿਰਫ਼ ਇੱਕ ਗਿਣਤੀ ਨਹੀਂ ਹੈ, ਸਗੋਂ ਉਸ ਦੀ ਇੱਜ਼ਤ ਤੇ ਭਵਿੱਖ ਦੇ ਇਲਾਜ ਲਈ ਇੱਕ ਜ਼ਰੂਰੀ ਸਹਾਇਤਾ ਹੈ | ਇਹ ਮਾਮਲਾ 13 ਅਕਤੂਬਰ, 2002 ਦਾ ਹੈ, ਜਦੋਂ ਜਲੰਧਰ 'ਚ ਇਕ ਤੇਜ਼ ਰਫ਼ਤਾਰ ਮਾਰੂਤੀ ਜ਼ੈਨ ਕਾਰ ਨੇ ਗਲਤ ਸਾਈਡ ਤੋਂ ਆ ਕੇ ਨਰਿੰਦਰ ਪਾਲ ਸਿੰਘ ਦੇ ਸਕੂਟਰ ਨੂੰ ਟੱਕਰ ਮਾਰ ਦਿੱਤੀ | ਉਸ ਸਮੇਂ ਪੀੜਤ 26 ਸਾਲਾਂ ਦਾ ਸੀ ਅਤੇ ਉਹ ਇਕ ਉੱਭਰਦਾ ਵਕੀਲ ਸੀ | ਇਸ ਹਾਦਸੇ ਦੌਰਾਨ ਉਸ ਦੇ ਸਿਰ ਅਤੇ ਮੋਢੇ 'ਤੇ ਗੰਭੀਰ ਸੱਟਾਂ ਲੱਗੀਆਂ, ਜਿਸ ਦੇ ਨਤੀਜੇ ਵਜੋਂ 100 ਫ਼ੀਸਦੀ ਸਥਾਈ ਅਪੰਗਤਾ ਦੇ ਸ਼ਿਕਾਰ ਹੋ ਗਿਆ | ਅਦਾਲਤ ਵਿਚ ਪੇਸ਼ ਕੀਤੀਆਂ ਗਈਆਂ ਮੈਡੀਕਲ ਰਿਪੋਰਟਾਂ ਦੇ ਅਨੁਸਾਰ ਨਰਿੰਦਰ ਪਾਲ ਸਿੰਘ ਅੱਜ ਵੀ ਦੋਵੇਂ ਕੰਨਾਂ ਤੋਂ ਪੂਰੀ ਤਰਾਂ ਨਾਲ ਸੁਣਨ ਤੋਂ ਅਸਮੱਰਥ ਹੈ ਤੇ ਉਸ ਦੇ ਦਿਮਾਗ ਦੀਆਂ ਨਸਾਂ ਨੂੰ ਸਥਾਈ ਤੌਰ 'ਤੇ ਨੁਕਸਾਨ ਹੋਇਆ ਹੈ | ਉਹ ਲਗਾਤਾਰ ਕੰਨਾਂ ਵਿਚ ਵੱਜਣ ਵਾਲੀਆਂ ਆਵਾਜ਼ਾਂ, ਚੱਕਰ ਆਉਣ, ਨੀਂਦ ਨਾ ਆਉਣਾ ਅਤੇ ਗੰਭੀਰ ਡਿਪਰੈਸ਼ਨ ਦੀ ਸਮੱਸਿਆ ਨਾਲ ਜੂਝ ਰਿਹਾ ਹੈ | ਅਦਾਲਤ ਨੇ ਪਾਇਆ ਕਿ ਭਾਰਤ ਦੇ ਕਈ ਵੱਕਾਰੀ ਹਸਪਤਾਲਾਂ 'ਚ ਇਲਾਜ ਦੇ ਬਾਵਜੂਦ ਉਨ੍ਹਾਂ ਦੀ ਹਾਲਤ ਵਿਚ ਕੋਈ ਸੁਧਾਰ ਨਹੀਂ ਹੋਇਆ | ਪੀ. ਜੀ. ਆਈ. ਚੰਡੀਗੜ੍ਹ ਅਤੇ ਹੋਰ ਮਾਹਰਾਂ ਨੇ ਰਾਏ ਦਿੱਤੀ ਕਿ ਉਨ੍ਹਾਂ ਦੀ ਗੁੰਝਲਦਾਰ ਨਿਊਰੋ-ਬ੍ਰੇਨ ਸਰਜਰੀ ਅਤੇ ਕੋਕਲੀਅਰ ਇਮਪਲਾਂਟ ਲਈ ਸੰਯੁਕਤ ਰਾਜ ਅਮਰੀਕਾ ਦੇ ਮੇਓ ਕਲੀਨਿਕ ਵਰਗੇ ਅਦਾਰਿਆਂ ਵਿਚ ਉੱਨਤ ਦੇਖਭਾਲ ਦੀ ਲੋੜ ਹੈ | ਹਾਈ ਕੋਰਟ ਨੇ ਵਾਧੂ ਸਬੂਤਾਂ ਦੇ ਆਧਾਰ 'ਤੇ ਮੰਨਿਆ ਕਿ ਭਵਿੱਖ 'ਚ ਵਿਦੇਸ਼ੀ ਇਲਾਜ ਲਈ ਭਾਰੀ ਖਰਚੇ ਅਟੱਲ ਹਨ, ਜਿਸ ਨੂੰ ਦੇਖਦਿਆਂ ਹੋਏ ਸਿਰਫ਼ ਵਿਦੇਸ਼ੀ ਇਲਾਜ ਦੇ ਸਿਰਲੇਖ ਹੇਠ ਸਿਰਫ਼ 6 ਕਰੋੜ ਰੁਪਏ ਦੀ ਰਕਮ ਨਿਰਧਾਰਤ ਕੀਤੀ ਗਈ ਹੈ | ਅਦਾਲਤ ਵਲੋਂ ਸੋਧੇ ਗਏ 9.16 ਕਰੋੜ ਦੇ ਮੁਆਵਜ਼ੇ ਵਿਚ ਕਈ ਚੀਜ਼ਾਂ ਸ਼ਾਮਿਲ ਹਨ |