ਨਵੀਂ ਦਿੱਲੀ, 15 ਜੂਨ (ਜਗਤਾਰ ਸਿੰਘ)-ਵਣਜ ਅਤੇ ਉਦਯੋਗ ਮੰਤਰਾਲੇ ਦੇ 'ਡਿਪਾਰਟਮੈਂਟ ਫ਼ਾਰ ਪ੍ਰਮੋਸ਼ਨ ਆਫ਼ ਇੰਡਸਟਰੀ ਐਂਡ ਇੰਟਰਨਲ ਟ੍ਰੇਡ' (ਡੀ.ਪੀ.ਆਈ.ਆਈ.ਟੀ.) ਨੇ ਥੋਕ ਮੁੱਲ ਸੂਚਕ ਅੰਕ ਦੇ ਅੰਕੜੇ ਜਾਰੀ ਕੀਤੇ ਹਨ | ਮਈ 2026 'ਚ ਥੋਕ ਮਹਿੰਗਾਈ ਪਿਛਲੇ ਮਹੀਨੇ ਦੀ ਤੁਲਨਾ ਵਿਚ ਵਧ ਕੇ 9.68 ਫ਼ੀਸਦੀ ਹੋ ਗਈ ਹੈ, ਜੋ ਕਿ ਅਪ੍ਰੈਲ 'ਚ 8.26 ਫ਼ੀਸਦੀ ਦਰਜ ਕੀਤੀ ਗਈ ਸੀ | ਮੁੱਖ ਤੌਰ 'ਤੇ ਬਾਲਣ ਅਤੇ ਬਿਜਲੀ, ਨਿਰਮਿਤ ਉਤਪਾਦਾਂ ਅਤੇ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ 'ਚ ਤੇਜ਼ੀ ਨਾਲ ਵਾਧਾ ਇਸ ਦਾ ਮੁੱਖ ਕਾਰਨ ਹੈ | ਵਣਜ ਅਤੇ ਉਦਯੋਗ ਮੰਤਰਾਲੇ ਨੇ 2011-12 ਤੋਂ 2022-23 ਤੱਕ ਦੇ ਆਧਾਰ ਸਾਲ ਨੂੰ ਸੋਧਣ ਤੋਂ ਬਾਅਦ ਸੋਮਵਾਰ ਨੂੰ ਥੋਕ ਮੁੱਲ ਸੂਚਕ ਅੰਕ ਆਧਾਰਿਤ ਮਹਿੰਗਾਈ ਅੰਕੜੇ ਜਾਰੀ ਕੀਤੇ | ਬਾਲਣ ਅਤੇ ਬਿਜਲੀ ਸ਼੍ਰੇਣੀ ਵਿਚ ਥੋਕ ਮਹਿੰਗਾਈ ਮਈ ਵਿਚ ਵਧ ਕੇ 30.33 ਫ਼ੀਸਦੀ ਹੋ ਗਈ, ਜੋ ਅਪ੍ਰੈਲ ਵਿਚ 24.89 ਫ਼ੀਸਦੀ ਸੀ, ਕੱਚੇ ਪੈਟਰੋਲੀਅਮ ਦੀ ਮਹਿੰਗਾਈ ਮਈ 'ਚ ਵਧ ਕੇ 61.51 ਫ਼ੀਸਦੀ ਹੋ ਗਈ, ਜੋ ਅਪ੍ਰੈਲ 'ਚ 56.31 ਫ਼ੀਸਦੀ ਸੀ | ਥੋਕ ਮਹਿੰਗਾਈ 'ਚ ਇਹ ਤੇਜ਼ ਵਾਧਾ ਪੱਛਮੀ ਏਸ਼ੀਆ ਸੰਕਟ ਅਤੇ ਹੋਰਮੁਜ਼ ਜਲਡਮਰੂ ਦੀ ਰੁਕਾਵਟ ਕਾਰਨ ਹੋਇਆ, ਜਿਥੋਂ ਭਾਰਤ ਆਪਣਾ ਜ਼ਿਆਦਾਤਰ ਕੱਚਾ ਤੇਲ ਮੰਗਵਾਉਂਦਾ ਹੈ | ਇਸ ਨੇ ਭੋਜਨ ਦੀਆਂ ਕੀਮਤਾਂ 'ਤੇ ਵੀ ਪ੍ਰਭਾਵ ਪਾਇਆ ਹੈ | ਮਈ 'ਚ ਖੁਰਾਕੀ ਵਸਤਾਂ ਵਿਚ ਮਹਿੰਗਾਈ 3.60 ਫ਼ੀਸਦੀ ਹੋ ਗਈ, ਜੋ ਅਪ੍ਰੈਲ ਵਿਚ 2.43 ਫ਼ੀਸਦੀ ਸੀ, ਨਿਰਮਿਤ ਉਤਪਾਦਾਂ 'ਚ ਮਹਿੰਗਾਈ ਵਧ ਕੇ 7.48 ਫ਼ੀਸਦੀ ਹੋ ਗਈ, ਜੋ ਅਪ੍ਰੈਲ ਵਿਚ 6.68 ਫ਼ੀਸਦੀ ਸੀ | ਮਈ ਵਿਚ ਪਰਚੂਨ ਮਹਿੰਗਾਈ ਵੀ 16 ਮਹੀਨਿਆਂ ਦੇ ਉਚ ਪੱਧਰ 3.93 ਫ਼ੀਸਦੀ 'ਤੇ ਪਹੁੰਚ ਗਈ, ਜੋ ਅਪ੍ਰੈਲ ਵਿਚ 3.48 ਫ਼ੀਸਦੀ ਸੀ |
