ਸੰਗਰੂਰ, 27 ਜੂਨ (ਅਮਨਦੀਪ ਸਿੰਘ ਬਿੱਟਾ)– ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਸੀਨੀਅਰ ਆਗੂ ਸ੍ਰੀਮਤੀ ਰਜਿੰਦਰ ਕੌਰ ਮੀਮਸਾ ਦੇ ਸਪੁੱਤਰ ਇੰਜੀਨੀਅਰ ਹਰਿੰਦਰਜੀਤ ਸਿੰਘ ਵੜੈਚ ਮੀਮਸਾ ਜਿਨ੍ਹਾਂ ਵਿਧਾਨ ਸਭਾ ਹਲਕਾ ਭਦੌੜ ਦੇ ਮੀਤ ਪ੍ਰਧਾਨ ਵਜੋਂ ਯੂਥ ਕਾਂਗਰਸ ਦੀ ਚੋਣ ਜਿੱਤੀ ਹੈ, ਨੂੰ ਇੱਕ ਵਿਸ਼ੇਸ਼ ਸਮਾਗਮ ਦੌਰਾਨ ਸਾਬਕਾ ਕੈਬਨਿਟ ਮੰਤਰੀ ਵਿਜੈਇੰਦਰ ਸਿੰਗਲਾ ਵੱਲੋਂ ਸਨਮਾਨਿਤ ਕੀਤਾ ਗਿਆ । ਜ਼ਿਕਰਯੋਗ ਹੈ ਕਿ ਕਾਂਗਰਸ ਪਾਰਟੀ ਵਿਚ ਮਹਿਲਾਵਾਂ ਨੂੰ ਜਥੇਬੰਦ ਕਰਨ ਅਤੇ ਵੱਖ-ਵੱਖ ਰਾਜਨੀਤਕ ਘੋਲਾਂ ਦੌਰਾਨ ਸਰਗਰਮ ਮੋਹਰੀ ਰੋਲ ਨਿਭਾਉਂਦੇ ਆ ਰਹੇ ਸ੍ਰੀਮਤੀ ਮੀਮਸਾ ਦੇ ਸਪੁੱਤਰ ਹਰਿੰਦਰਜੀਤ ਸਿੰਘ ਵੜੈਚ ਨੇ ਯੂਥ ’ਚ ਮੀਮਸਾ ਪਰਿਵਾਰ ਦੀ ਪੈਂਠ ਨੂੰ ਬਰਕਰਾਰ ਰੱਖਦਿਆਂ ਇਹ ਚੋਂਣ ਜਿੱਤਣ ਉਪਰੰਤ ਗੱਲਬਾਤ ਕਰਦਿਆਂ ਕਿਹਾ ਕਿ ਸੰਗਰੂਰ, ਭਦੌੜ ਸਮੇਤ ਲੋਕ ਸਭਾ ਹਲਕਾ ਸੰਗਰੂਰ ਵਿੱਚ ਕਾਂਗਰਸ ਪਾਰਟੀ ਨੂੰ ਮਜਬੂਤ ਕਰਨਾ ਮੁੱਖ ਪਹਿਲ ਰਹੇਗੀ। ਵਿਜੈਇੰਦਰ ਸਿੰਗਲਾ ਨੇ ਇੰਜੀਨੀਅਰ ਹਰਿੰਦਰਜੀਤ ਸਿੰਘ ਵੜੈਚ (ਮੀਮਸਾ) ਦੀ ਪਿੱਛ ਥਾਪੜਦਿਆਂ ਕਿਹਾ ਕਿ ਕਾਂਗਰਸ ਪਾਰਟੀ ਨੂੰ ਅਜਿਹੇ ਨੌਜਵਾਨਾਂ ’ਤੇ ਵੱਡਾ ਮਾਣ ਹੈ ਜੋ ਪਾਰਟੀ ਨੂੰ ਮਜਬੂਤ ਕਰ ਰਹੇ ਹਨ ।
