ਭਾਰਤ ਦੇ ਖੇਡ ਇਤਿਹਾਸ ਵਿਚ ਇਕ ਨਵਾਂ ਅਧਿਆਏ ਲਿਖਿਆ ਜਾ ਰਿਹਾ ਹੈ। ਕਦੇ ਸਿਰਫ਼ ਕ੍ਰਿਕਟ ਲਈ ਜਾਣਿਆ ਜਾਣ ਵਾਲਾ ਦੇਸ਼ ਹੁਣ ਦੁਨੀਆ ਦੇ ਸਭ ਤੋਂ ਵੱਡੇ ਖੇਡ ਸਮਾਗਮਾਂ ਦੀ ਮੇਜ਼ਬਾਨੀ ਵੱਲ ਮਜ਼ਬੂਤੀ ਨਾਲ ਵਧ ਰਿਹਾ ਹੈ। ਗੁਜਰਾਤ ਦਾ ਅਹਿਮਦਾਬਾਦ ਅੱਜ ਇਸ ਨਵੇਂ ਭਾਰਤ ਦੀ ਖੇਡ ਕ੍ਰਾਂਤੀ ਦਾ ਕੇਂਦਰ ਬਣ ਚੁੱਕਾ ਹੈ, ਜਿੱਥੇ ਸਾਲ 2030 ਦੀਆਂ ਰਾਸ਼ਟਰਮੰਡਲ ਖੇਡਾਂ ਲਈ ਜੰਗੀ ਪੱਧਰ 'ਤੇ ਤਿਆਰੀਆਂ ਚੱਲ ਰਹੀਆਂ ਹਨ। ਇਹ ਸਿਰਫ਼ ਇਕ ਖੇਡ ਟੂਰਨਾਮੈਂਟ ਦੀ ਤਿਆਰੀ ਨਹੀਂ, ਸਗੋਂ ਭਾਰਤ ਦੇ ਉਲੰਪਿਕ ਸੁਪਨੇ ਦੀ ਬੁਨਿਆਦ ਹੈ। ਦੇਸ਼ ਹੁਣ ਦੁਨੀਆ ਨੂੰ ਇਹ ਸੰਦੇਸ਼ ਦੇਣਾ ਚਾਹੁੰਦਾ ਹੈ ਕਿ ਭਾਰਤ ਕੋਲ ਸਿਰਫ਼ ਖਿਡਾਰੀ ਨਹੀਂ, ਸਗੋਂ ਵਿਸ਼ਵ-ਪੱਧਰੀ ਖੇਡ ਢਾਂਚਾ, ਆਧੁਨਿਕ ਤਕਨਾਲੋਜੀ ਤੇ ਭਵਿੱਖ ਦੀ ਸੋਚ ਵੀ ਮੌਜੂਦ ਹੈ। ਦੁਨੀਆ ਦੇ ਸਭ ਤੋਂ ਵੱਡੇ ਕ੍ਰਿਕਟ ਮੈਦਾਨਾਂ 'ਚ ਸ਼ਾਮਿਲ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਨੂੰ ਰਾਸ਼ਟਰਮੰਡਲ ਖੇਡਾਂ ਦੀ ਸ਼ੁਰੂਆਤ ਤੇ ਸਮਾਪਤੀ ਸਮਾਰੋਹ ਲਈ ਤਿਆਰ ਕੀਤਾ ਜਾ ਰਿਹਾ ਹੈ। ਸਰਕਾਰ ਇਸ ਸਟੇਡੀਅਮ ਨੂੰ ਗਲੋਬਲ ਸਪੋਰਟਸ ਆਇਕਨ ਵਜੋਂ ਦੁਨੀਆ ਅੱਗੇ ਪੇਸ਼ ਕਰਨ ਦੀ ਯੋਜਨਾ 'ਤੇ ਕੰਮ ਕਰ ਰਹੀ ਹੈ।
ਅਹਿਮਦਾਬਾਦ ਵਿਚ ਬਣ ਰਿਹਾ ਸਰਦਾਰ ਪਟੇਲ ਸਪੋਰਟਸ ਇਨਕਲੇਵ ਭਾਰਤ ਦੇ ਸਭ ਤੋਂ ਵੱਡੇ ਸਪੋਰਟਸ ਪ੍ਰੋਜੈਕਟਾਂ 'ਚੋਂ ਇਕ ਬਣ ਚੁੱਕਾ ਹੈ। ਸਾਬਰਮਤੀ ਦਰਿਆ ਦੇ ਕੰਢੇ ਫੈਲੇ ਸੈਂਕੜੇ ਏਕੜ ਵਿਚ 20 ਤੋਂ ਵੱਧ ਉਲੰਪਿਕ ਖੇਡਾਂ ਲਈ ਅੰਤਰਰਾਸ਼ਟਰੀ ਪੱਧਰ ਦੇ ਸਟੇਡੀਅਮ ਤਿਆਰ ਕੀਤੇ ਜਾ ਰਹੇ ਹਨ। ਇੱਥੇ ਬਣ ਰਹੇ ਇਕਵਾਟਿਕ ਸੈਂਟਰ, ਟੈਨਿਸ ਸੈਂਟਰ, ਅਥਲੈਟਿਕਸ ਸਟੇਡੀਅਮ ਤੇ ਮਲਟੀਪਰਪਜ਼ ਇਨਡੋਰ ਅਰੀਨਾ ਭਵਿੱਖ ਦੇ ਵਿਸ਼ਵ ਖੇਡ ਕੇਂਦਰਾਂ ਵਾਂਗ ਤਿਆਰ ਹੋ ਰਹੇ ਹਨ। 24 ਹਜ਼ਾਰ ਦਰਸ਼ਕਾਂ ਵਾਲਾ ਟੈਨਿਸ ਸੈਂਟਰ, 50 ਹਜ਼ਾਰ ਦਰਸ਼ਕਾਂ ਦੀ ਸਮਰੱਥਾ ਵਾਲਾ ਅਥਲੈਟਿਕਸ ਸਟੇਡੀਅਮ ਅਤੇ ਹਜ਼ਾਰਾਂ ਖੇਡ ਪ੍ਰੇਮੀਆਂ ਲਈ ਬਣ ਰਹੀਆਂ ਆਧੁਨਿਕ ਸਹੂਲਤਾਂ ਇਹ ਸਾਬਤ ਕਰ ਰਹੀਆਂ ਹਨ ਕਿ ਭਾਰਤ ਹੁਣ ਸਿਰਫ਼ ਖੇਡਾਂ ਖੇਡਣਾ ਨਹੀਂ, ਸਗੋਂ ਖੇਡਾਂ ਦੀ ਦੁਨੀਆ ਦੀ ਅਗਵਾਈ ਕਰਨਾ ਚਾਹੁੰਦਾ ਹੈ।
ਅੱਜ ਦਾ ਖੇਡ ਖੇਤਰ ਸਿਰਫ਼ ਮੈਦਾਨੀ ਮਿਹਨਤ ਤੱਕ ਸੀਮਤ ਨਹੀਂ ਰਿਹਾ, ਇਸ ਵਿਚ ਹੁਣ ਏ.ਆਈ. (ਆਰਟੀਫਿਸ਼ਲ ਇੰਟੈਲੀਜੈਂਸ) ਵੀ ਮਹੱਤਵਪੂਰਨ ਹਿੱਸਾ ਬਣ ਚੁੱਕੀ ਹੈ। ਵਿਜੇ ਭਾਰਤ ਫਾਊਂਡੇਸ਼ਨ ਵਰਗੀਆਂ ਸੰਸਥਾਵਾਂ ਖਿਡਾਰੀਆਂ ਦੇ ਬਾਡੀ ਮੂਵਮੈਂਟ, ਫਿਟਨੈੱਸ ਡਾਟਾ ਤੇ ਹਾਰਟ ਰੇਟ ਦੀ ਲਗਾਤਾਰ ਮਾਨੀਟਰਿੰਗ ਕਰ ਰਹੀਆਂ ਹਨ। ਏ.ਆਈ. ਸਿਸਟਮ ਇਹ ਡਾਟਾ ਵਿਸ਼ਲੇਸ਼ਣ ਕਰਕੇ ਖਿਡਾਰੀਆਂ ਲਈ ਵਿਅਕਤੀਗਤ ਸਿਖਲਾਈ ਯੋਜਨਾ ਤਿਆਰ ਕਰਦਾ ਹੈ। ਇਸ ਨਾਲ ਨਾ ਸਿਰਫ਼ ਪ੍ਰਦਰਸ਼ਨ 'ਚ ਸੁਧਾਰ ਹੁੰਦਾ ਹੈ, ਸਗੋਂ ਸੱਟਾਂ ਦਾ ਖ਼ਤਰਾ ਵੀ ਘਟ ਰਿਹਾ ਹੈ।
ਭਾਰਤ ਵਿਚ 'ਖੇਲੋ ਇੰਡੀਆ' ਵਰਗੀਆਂ ਯੋਜਨਾਵਾਂ ਨੇ ਪਿੰਡਾਂ ਤੇ ਛੋਟੇ ਸ਼ਹਿਰਾਂ ਦੇ ਬੱਚਿਆਂ ਨੂੰ ਨਵੀਂ ਉਮੀਦ ਦਿੱਤੀ ਹੈ। ਹੁਣ ਛੋਟੀ ਉਮਰ ਤੋਂ ਹੀ ਖਿਡਾਰੀਆਂ ਦਾ ਹੁਨਰ ਪਛਾਣ ਕੇ ਵਿਗਿਆਨਕ ਤਰੀਕੇ ਨਾਲ ਸਿਖਲਾਈ ਦਿੱਤੀ ਜਾ ਰਹੀ ਹੈ। ਹੁਣ 9 ਤੋਂ 18 ਸਾਲ ਦੀ ਉਮਰ ਦੇ ਬੱਚਿਆਂ ਅੰਦਰ ਲੁਕੇ ਖੇਡ ਹੁਨਰ ਨੂੰ ਵਿਗਿਆਨਕ ਤਰੀਕੇ ਨਾਲ ਪਛਾਣਿਆ ਜਾ ਰਿਹਾ ਹੈ। ਇਹ ਸਾਬਤ ਕਰਦਾ ਹੈ ਕਿ ਭਾਰਤ ਹੁਣ ਸਿਰਫ਼ ਟੈਲੰਟ 'ਤੇ ਨਹੀਂ, ਸਗੋਂ ਯੋਜਨਾਬੱਧ ਤੇ ਵਿਗਿਆਨਕ ਤਿਆਰੀ 'ਤੇ ਵੀ ਵਿਸ਼ਵਾਸ ਕਰ ਰਿਹਾ ਹੈ।
ਭਾਰਤ ਦੀ ਖੇਡ ਕ੍ਰਾਂਤੀ 'ਚ ਪੰਜਾਬ ਦਾ ਯੋਗਦਾਨ ਹਮੇਸ਼ਾ ਸ਼ਾਨਦਾਰ ਰਿਹਾ ਹੈ। ਹਾਕੀ, ਅਥਲੈਟਿਕਸ, ਕੁਸ਼ਤੀ, ਕਬੱਡੀ ਤੇ ਬਾਸਕਟਬਾਲ ਵਿਚ ਪੰਜਾਬ ਨੇ ਦੇਸ਼ ਨੂੰ ਅਨੇਕਾਂ ਮਹਾਨ ਖਿਡਾਰੀ ਦਿੱਤੇ ਹਨ। ਅਹਿਮਦਾਬਾਦ ਵਿਚ ਬਣ ਰਹੇ ਇਹ ਵਿਸ਼ਵ-ਪੱਧਰੀ ਖੇਡ ਕੇਂਦਰ ਪੰਜਾਬ ਦੇ ਨੌਜਵਾਨਾਂ ਲਈ ਵੀ ਨਵੀਂ ਪ੍ਰੇਰਨਾ ਹਨ। ਜੇ ਪੰਜਾਬ ਦੇ ਨੌਜਵਾਨਾਂ ਦੇ ਹੁਨਰ ਨੂੰ ਵੀ ਆਧੁਨਿਕ ਸਹੂਲਤਾਂ ਤੇ ਏ.ਆਈ. ਆਧਾਰਿਤ ਸਿਖਲਾਈ ਮਿਲੇ ਤਾਂ ਆਉਣ ਵਾਲੇ ਸਾਲਾਂ 'ਚ ਭਾਰਤ ਲਈ ਹੋਰ ਉਲੰਪਿਕ ਤਗਮੇ ਜਿੱਤਣਾ ਅਸੰਭਵ ਨਹੀਂ ਰਹੇਗਾ।
ਅੱਜ ਅਹਿਮਦਾਬਾਦ 'ਚ ਸਿਰਫ਼ ਸਟੇਡੀਅਮਾਂ ਦੀ ਨੀਂਹ ਹੀ ਨਹੀਂ ਰੱਖੀ ਜਾ ਰਹੀ, ਸਗੋਂ ਭਾਰਤ ਦੇ ਨਵੇਂ ਖੇਡ ਭਵਿੱਖ ਦੀ ਨੀਂਹ ਰੱਖੀ ਜਾ ਰਹੀ ਹੈ। ਇਹ ਸਿਰਫ਼ ਕੰਕਰੀਟ ਦੇ ਢਾਂਚੇ ਨਹੀਂ, ਸਗੋਂ ਕਰੋੜਾਂ ਨੌਜਵਾਨਾਂ ਦੇ ਸੁਪਨੇ ਹਨ। ਉਹ ਸੁਪਨੇ ਜੋ ਇਕ ਦਿਨ ਭਾਰਤ ਨੂੰ ਉਲੰਪਿਕ ਮੇਜ਼ਬਾਨੀ ਤੱਕ ਲੈ ਕੇ ਜਾ ਸਕਦੇ ਹਨ। ਜੇ ਇਹ ਯਾਤਰਾ ਇਸੇ ਰਫ਼ਤਾਰ ਨਾਲ ਜਾਰੀ ਰਹੀ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਦੁਨੀਆ ਕਹੇਗੀ ਕਿ ਭਾਰਤ ਹੁਣ ਸਿਰਫ਼ ਖੇਡਦਾ ਨਹੀਂ, ਸਗੋਂ ਦੁਨੀਆ ਨੂੰ ਖੇਡਾਂ ਦਾ ਭਵਿੱਖ ਦਿਖਾਉਂਦਾ ਹੈ।
-ਮੋਬਾਈਲ : 98729-78781
