ਹਰਮਨਪ੍ਰੀਤ ਕੌਰ ਦੀ ਕਪਤਾਨੀ ਨੇ ਰਚਿਆ ਨਵਾਂ ਇਤਿਹਾਸ

ਕ੍ਰਿਕਟ ਦੇ ਮੈਦਾਨ ਵਿਚ ਕੁਝ ਪਲ ਅਜਿਹੇ ਹੁੰਦੇ ਹਨ, ਜੋ ਸਿਰਫ਼ ਇਕ ਮੈਚ ਦੀ ਜਿੱਤ ਜਾਂ ਹਾਰ ਤੱਕ ਸੀਮਤ ਨਹੀਂ ਰਹਿੰਦੇ, ਸਗੋਂ ਇਤਿਹਾਸ ਦਾ ਹਿੱਸਾ ਬਣ ਜਾਂਦੇ ਹਨ | ਭਾਰਤੀ ਮਹਿਲਾ ਕ੍ਰਿਕਟ ਦੀ ਕਪਤਾਨ ਹਰਮਨਪ੍ਰੀਤ ਕੌਰ ਨੇ ਅਜਿਹਾ ਹੀ ਇਕ ਇਤਿਹਾਸਕ ਪਲ ਆਪਣੇ ਨਾਂਅ ਕੀਤਾ ਹੈ | 5 ਸਤੰਬਰ 2026 ਨੂੰ  ਦੁਬਈ 'ਚ ਭਾਰਤ-ਪਾਕਿਸਤਾਨ ਵਿਚਾਲੇ ਖੇਡੇ ਗਏ ਮਹਿਲਾ ਏਸ਼ੀਆ ਕੱਪ ਦੇ ਮੁਕਾਬਲੇ 'ਚ ਮੈਦਾਨ 'ਤੇ ਉਤਰਦਿਆਂ ਹੀ ਹਰਮਨਪ੍ਰੀਤ 150 ਟੀ-20 ਕੌਮਾਂਤਰੀ ਮੈਚਾਂ ਵਿਚ ਕਪਤਾਨੀ ਕਰਨ ਵਾਲੀ ਪਹਿਲੀ ਕ੍ਰਿਕਟਰ ਬਣ ਗਈ | ਇਹ ਰਿਕਾਰਡ ਮਹਿਲਾ ਤੇ ਪੁਰਸ਼ ਦੋਵਾਂ ਦੀ ਕੌਮਾਂਤਰੀ ਟੀ-20 ਕ੍ਰਿਕਟ ਨੂੰ  ਮਿਲਾ ਕੇ ਹੈ | ਇਹ ਉਪਲਬਧੀ ਅਚਾਨਕ ਨਹੀਂ ਮਿਲੀ, ਇਸ ਦੇ ਪਿੱਛੇ ਹਰਮਨਪ੍ਰੀਤ ਦਾ ਲੰਮਾ ਕ੍ਰਿਕਟ ਸਫ਼ਰ, ਸਾਲਾਂ ਦੀ ਮਿਹਨਤ, ਲਗਾਤਾਰ ਅਭਿਆਸ ਤੇ ਟੀਮ ਦੀ ਜ਼ਿੰਮੇਵਾਰੀ ਨਿਭਾਉਣ ਦਾ ਜਜ਼ਬਾ ਹੈ | ਉਸ ਨੇ 2009 'ਚ ਆਪਣਾ ਟੀ-20 ਕੌਮਾਂਤਰੀ ਸਫ਼ਰ ਸ਼ੁਰੂ ਕੀਤਾ ਸੀ | ਜੂਨ 2026 'ਚ ਉਹ 200 ਟੀ-20 ਕੌਮਾਂਤਰੀ ਮੈਚ ਖੇਡਣ ਵਾਲੀ ਦੁਨੀਆ ਦੀ ਪਹਿਲੀ ਕ੍ਰਿਕਟਰ ਵੀ ਬਣੀ ਸੀ |
ਉਸ ਦੀ ਕਪਤਾਨੀ ਦਾ ਸਫ਼ਰ ਦਿਲਚਸਪ ਹੈ | ਉਸ ਨੇ ਪਹਿਲੀ ਵਾਰ 2012 'ਚ ਪਾਕਿਸਤਾਨ ਵਿਰੁੱਧ ਮਹਿਲਾ ਏਸ਼ੀਆ ਕੱਪ ਦੇ ਮੈਚ ਵਿਚ ਭਾਰਤੀ ਟੀਮ ਦੀ ਕਪਤਾਨੀ ਕੀਤੀ ਸੀ | ਉਸ ਸਮੇਂ ਕਪਤਾਨ ਮਿਤਾਲੀ ਰਾਜ ਤੇ ਉਪ-ਕਪਤਾਨ ਝੂਲਨ ਗੋਸਵਾਮੀ ਦੀ ਗ਼ੈਰ-ਹਾਜ਼ਰੀ 'ਚ ਉਸ ਨੂੰ  ਟੀਮ ਦੀ ਅਗਵਾਈ ਕਰਨ ਦੀ ਜ਼ਿੰਮੇਵਾਰੀ ਮਿਲੀ | ਲਗਭਗ ਡੇਢ ਦਹਾਕੇ ਬਾਅਦ ਉਸੇ ਪਾਕਿਸਤਾਨੀ ਟੀਮ ਵਿਰੁੱਧ 150 ਟੀ-20 ਮੈਚਾਂ ਦੀ ਕਪਤਾਨੀ ਦਾ ਮੁਕਾਮ ਹਾਸਲ ਕਰਨਾ ਉਸ ਦੇ ਸਫ਼ਰ ਨੂੰ  ਹੋਰ ਵੀ ਖ਼ਾਸ ਬਣਾਉਂਦਾ ਹੈ | ਕਪਤਾਨ ਬਣਨਾ ਸਿਰਫ਼ ਮੈਦਾਨ ਵਿਚ ਟਾਸ ਕਰਨ ਜਾਂ ਟੀਮ ਦੀ ਅਗਵਾਈ ਕਰਨ ਦਾ ਨਾਂਅ ਹੀ ਨਹੀਂ, ਇਕ ਕਪਤਾਨ ਨੂੰ  ਹਰ ਮੈਚ ਵਿਚ ਹਾਲਾਤ ਅਨੁਸਾਰ ਫ਼ੈਸਲੇ ਲੈਣੇ ਪੈਂਦੇ ਹਨ | ਕਦੇ ਗੇਂਦਬਾਜ਼ 'ਤੇ ਭਰੋਸਾ ਕਰਨਾ ਪੈਂਦਾ ਹੈ, ਕਦੇ ਨੌਜਵਾਨ ਖਿਡਾਰੀਆਂ ਨੂੰ  ਮੌਕਾ ਦੇਣਾ ਪੈਂਦਾ ਹੈ ਤੇ ਕਈ ਵਾਰ ਮੁਸ਼ਕਿਲ ਹਾਲਾਤ ਵਿਚ ਟੀਮ ਦਾ ਹੌਸਲਾ ਕਾਇਮ ਰੱਖਣਾ ਪੈਂਦਾ ਹੈ | ਹਰਮਨਪ੍ਰੀਤ ਨੇ ਲੰਮੇ ਸਮੇਂ ਤੱਕ ਇਹ ਜ਼ਿੰਮੇਵਾਰੀ ਨਿਭਾਅ ਕੇ ਆਪਣੀ ਅਗਵਾਈ ਦੀ ਸਮਰੱਥਾ ਸਾਬਤ ਕੀਤੀ ਹੈ | ਹਰਮਨਪ੍ਰੀਤ ਦੀ 150ਵੀਂ ਕਪਤਾਨੀ ਵਾਲਾ ਮੁਕਾਬਲਾ ਭਾਰਤ ਲਈ ਯਾਦਗਾਰ ਰਿਹਾ | ਇਸ ਮੈਚ ਵਿਚ ਪਾਕਿਸਤਾਨ ਨੇ ਪਹਿਲਾਂ ਬੱਲੇਬਾਜ਼ੀ ਕੀਤੀ | ਭਾਰਤੀ ਗੇਂਦਬਾਜ਼ਾਂ ਨੇ ਸ਼ੁਰੂ ਤੋਂ ਹੀ ਪਾਕਿਸਤਾਨੀ ਬੱਲੇਬਾਜ਼ੀ 'ਤੇ ਦਬਾਅ ਬਣਾਇਆ | ਪਾਕਿਸਤਾਨ ਦੀ ਪੂਰੀ ਟੀਮ 55 ਦੌੜਾਂ 'ਤੇ ਢੇਰ ਹੋ ਗਈ | ਇਹ ਪਾਕਿਸਤਾਨੀ ਮਹਿਲਾ ਟੀਮ ਦਾ ਟੀ-20 ਕੌਮਾਂਤਰੀ ਕ੍ਰਿਕਟ 'ਚ ਸਭ ਤੋਂ ਘੱਟ ਸਕੋਰ ਸੀ | ਭਾਰਤ ਨੂੰ  ਜਿੱਤ ਲਈ ਸਿਰਫ਼ 56 ਦੌੜਾਂ ਦਾ ਟੀਚਾ ਮਿਲਿਆ | ਭਾਰਤੀ ਟੀਮ ਨੇ ਤਿੰਨ ਵਿਕਟਾਂ ਗੁਆ ਕੇ ਇਹ ਟੀਚਾ 8.4 ਓਵਰਾਂ 'ਚ ਹਾਸਲ ਕਰ ਲਿਆ | ਹਰਮਨਪ੍ਰੀਤ ਨੇ ਆਪਣੀ 150ਵੀਂ ਕਪਤਾਨੀ ਵਾਲੇ ਮੈਚ ਨੂੰ  ਜਿੱਤ ਨਾਲ ਯਾਦਗਾਰ ਬਣਾਇਆ ਤੇ ਮੈਚ ਦੀ ਸਮਾਪਤੀ ਵੀ ਉਸ ਦੇ ਛੱਕੇ ਨਾਲ ਹੋਈ | 150ਵੇਂ ਮੈਚ ਦੀ ਕਪਤਾਨੀ ਤੋਂ ਪਹਿਲਾਂ ਹਰਮਨਪ੍ਰੀਤ ਦੀ ਅਗਵਾਈ 'ਚ ਭਾਰਤ ਨੇ 149 ਟੀ-20 ਕੌਮਾਂਤਰੀ ਮੈਚਾਂ 'ਚ 86 ਜਿੱਤਾਂ ਦਰਜ ਕੀਤੀਆਂ ਸਨ ਤੇ 57 ਮੈਚਾਂ 'ਚ ਹਾਰ ਮਿਲੀ, ਇਕ ਮੈਚ ਬਰਾਬਰ ਰਿਹਾ ਤੇ ਪੰਜ ਮੈਚਾਂ ਦਾ ਕੋਈ ਨਤੀਜਾ ਨਹੀਂ ਨਿਕਲਿਆ | ਉਸ ਦੀ ਇਹ ਪ੍ਰਾਪਤੀ ਇਸ ਲਈ ਵੀ ਖ਼ਾਸ ਹੈ ਕਿਉਂਕਿ ਇਸ ਤੋਂ ਪਹਿਲਾਂ ਕਿਸੇ ਵੀ ਕ੍ਰਿਕਟਰ ਨੇ ਚਾਹੇ ਉਹ ਪੁਰਸ਼ ਹੋਵੇ ਜਾਂ ਮਹਿਲਾ, 150 ਟੀ-20 ਕੌਮਾਂਤਰੀ ਮੈਚਾਂ ਵਿਚ ਕਪਤਾਨੀ ਨਹੀਂ ਕੀਤੀ | ਹਰਮਨਪ੍ਰੀਤ ਨੇ ਆਪਣੇ ਨਾਂਅ ਇਕ ਅਜਿਹਾ ਰਿਕਾਰਡ ਕਰ ਲਿਆ ਹੈ, ਜਿਸ ਨੂੰ  ਹਾਸਿਲ ਕਰਨਾ ਅਸਾਨ ਨਹੀਂ ਹੋਵੇਗਾ | ਹਰਮਨਪ੍ਰੀਤ ਦੀ ਕਾਮਯਾਬੀ ਪੰਜਾਬ ਤੇ ਭਾਰਤ ਦੀਆਂ ਉਨ੍ਹਾਂ ਧੀਆਂ ਲਈ ਵੀ ਵੱਡਾ ਸੁਨੇਹਾ ਹੈ, ਜੋ ਖੇਡ ਖੇਤਰ ਵਿਚ ਆਪਣਾ ਭਵਿੱਖ ਬਣਾਉਣਾ ਚਾਹੁੰਦੀਆਂ ਹਨ | ਉਸ ਦੀ ਕਹਾਣੀ ਦੱਸਦੀ ਹੈ ਕਿ ਕਿਸੇ ਵੀ ਖੇਤਰ ਵਿਚ ਵੱਡੀ ਮੰਜ਼ਿਲ ਹਾਸਲ ਕਰਨ ਲਈ ਹੌਸਲਾ ਤੇ ਮਿਹਨਤ ਸਭ ਤੋਂ ਵੱਡੇ ਹਥਿਆਰ ਹਨ |
-ਬਰਨਾਲਾ | ਮੋਬਾਈਲ : 9417163426