ਦੱਖਣੀ ਅਫਰੀਕਾ ਨੇ ਚੈੱਕ ਗਣਰਾਜ ਨੂੰ ਡਰਾਅ ’ਤੇ ਰੋਕਿਆ

ਅਟਲਾਂਟਾ, 18 ਜੂਨ (ਏਜੰਸੀ)-ਤੇਬੋਹੋ ਮੋਕੋਏਨਾ ਨੇ ਵੀਰਵਾਰ ਨੂੰ ਪੈਨਲਟੀ ਗੋਲ ਕਰਕੇ ਦੱਖਣੀ ਅਫਰੀਕਾ ਨੂੰ ਲਗਾਤਾਰ ਦੂਜੀ ਹਾਰ ਤੋਂ ਬਚਾਇਆ। ਮੋਕੋਏਨਾ ਦੇ 83ਵੇਂ ਮਿੰਟ ਦੇ ਗੋਲ ਨੇ ਚੈੱਕ ਗਣਰਾਜ ਦੀਆਂ ਜਿੱਤ ਦੀਆਂ ਉਮੀਦਾਂ ਨੂੰ ਚਕਨਾਚੂਰ ਕਰ ਦਿੱਤਾ ਤੇ ਦੱਖਣੀ ਅਫਰੀਕਾ ਲਈ 1-1 ਨਾਲ ਡਰਾਅ ਕਰਵਾ ਦਿੱਤਾ। ਮਿਕਲ ਸਾਦਿਲੇਕ ਨੇ ਮੈਚ ਦੇ ਪੰਜਵੇਂ ਮਿੰਟ ‘ਚ ਗੋਲ ਕਰਕੇ ਚੈੱਕ ਗਣਰਾਜ ਨੂੰ ਲੀਡ ਦਿਵਾਈ ਸੀ। ਇਹ ਮੌਜੂਦਾ ਵਿਸ਼ਵ ਕੱਪ ਦਾ ਸਭ ਤੋਂ ਤੇਜ਼ ਗੋਲ ਸੀ। ਇਹ ਮਿਕਲ ਦਾ ਪਹਿਲਾ ਵਿਸ਼ਵ ਕੱਪ ਗੋਲ ਤੇ ਕੁੱਲ ਮਿਲਾ ਕੇ ਉਸਦਾ ਦੂਜਾ ਅੰਤਰਰਾਸ਼ਟਰੀ ਗੋਲ ਸੀ। ਉਸਨੇ ਤਿੰਨ ਸਾਲਾਂ ਦੇ ਅੰਤਰਾਲ ਤੋਂ ਬਾਅਦ ਰਾਸ਼ਟਰੀ ਟੀਮ ਲਈ ਗੋਲ ਕੀਤਾ ਸੀ। ਉਸਦਾ ਪਿਛਲਾ ਗੋਲ ਜੂਨ 2023 ਵਿਚ ਮੋਂਟੇਨੇਗਰੋ ਵਿਰੁੱਧ ਇਕ ਦੋਸਤਾਨਾ ਮੈਚ ‘ਚ ਆਇਆ ਸੀ। ਚੈੱਕ ਗਣਰਾਜ ਦੀ ਟੀਮ 20 ਸਾਲਾਂ ਦੇ ਅੰਤਰਾਲ ਤੋਂ ਬਾਅਦ ਇਸ ਗਲੋਬਲ ਟੂਰਨਾਮੈਂਟ ‘ਚ ਹਿੱਸਾ ਲੈ ਰਹੀ ਹੈ, ਆਖਰੀ ਵਾਰ 2006 ‘ਚ ਖੇਡੀ ਸੀ। ਉਨ੍ਹਾਂ ਨੇ ਹਮਲਾਵਰ ਸ਼ੁਰੂਆਤ ਕੀਤੀ, ਜਿਸਦਾ ਫਲ ਛੇਵੇਂ ਮਿੰਟ ਵਿੱਚ ਮਿਲਿਆ ਜਦੋਂ ਮਿਕਲ ਨੇ ਇੱਕ ਸੁੰਦਰ ਗੋਲ ਕੀਤਾ। ਉਨ੍ਹਾਂ ਨੇ ਇਹ ਲੀਡ 82ਵੇਂ ਮਿੰਟ ਤੱਕ ਬਣਾਈ ਰੱਖੀ, ਜਦੋਂ ਮੋਕੋਏਨਾ ਨੇ ਦੱਖਣੀ ਅਫਰੀਕਾ ਲਈ ਬਰਾਬਰੀ ਦਾ ਗੋਲ ਕੀਤਾ। ਚੈੱਕ ਗਣਰਾਜ ਦੇ 12 ਸ਼ਾਟਾਂ ‘ਚੋਂ ਤਿੰਨ ਟਾਰਗੇਟ ‘ਤੇ ਸਨ, ਜਿਸਦੇ ਨਤੀਜੇ ਵਜੋਂ ਇੱਕ ਗੋਲ ਹੋਇਆ। ਇਸ ਦੌਰਾਨ, ਦੱਖਣੀ ਅਫਰੀਕਾ ਨੇ 17 ਕੋਸ਼ਿਸ਼ਾਂ ‘ਚੋਂ ਪੰਜ ਸ਼ਾਟ ਟਾਰਗੇਟ ’ਤੇ ਕੀਤੇ, ਇਕ ਨੂੰ ਗੋਲ ਵਿੱਚ ਬਦਲਿਆ।