ਵੈਨਕੂਵਰ, 3 ਜੁਲਾਈ (ਮਲਕੀਤ ਸਿੰਘ)-ਵੈਨਕੂਵਰ ’ਚ ਖੇਡੇ ਗਏ ਵਿਸ਼ਵ ਕੱਪ ਦੇ ਰਾਊਂਡ ਆਫ਼-32 ਦੇ ਮੁਕਾਬਲੇ ’ਚ ਸਵਿਟਜ਼ਰਲੈਂਡ ਨੇ ਆਪਣੀ ਕਾਮਯਾਬੀ ਦਾ ਝੰਡਾ ਗੱਡਦਿਆਂ ਅਲਜੀਰੀਆ ਨੂੰ 2-0 ਨਾਲ ਹਰਾ ਕੇ ਸ਼ਾਨਦਾਰ ਜਿੱਤ ਪ੍ਰਾਪਤ ਕਰਨ ਦੇ ਨਾਲ ਨਾਲ ਰਾਊਂਡ ਆਫ਼-16 ’ਚ ਆਪਣੀ ਥਾਂ ਪੱਕੀ ਕਰ ਲਈ ਹੈ। ਜਦਕਿ ਅਲਜੀਰੀਆ ਦੀ ਹਾਰ ਨਾਲ ਉਸਦੀ ਵਿਸ਼ਵ ਕੱਪ ਮੁਹਿੰਮ ਸਮਾਪਤ ਹੋ ਗਈ ਹੈ। ਕੈਨੇਡਾ ਦੇ ਸਥਾਨਕ ਸਮੇਂ ਮੁਤਾਬਿਕ ਰਾਤ 8 ਵਜੇ ਸ਼ੁਰੂ ਹੋਏ ਇਸ ਮੈਚ ਦੀ ਆਰੰਭਤਾ ਤੋਂ ਹੀ ਸਵਿਟਜ਼ਰਲੈਂਡ ਨੇ ਹਮਲਾਵਰ ਰੁਖ਼ ਅਪਣਾਉਦਿਆਂ ਅਲਜੀਰੀਆ ’ਤੇ ਲਗਾਤਾਰ ਦਬਾਅ ਬਣਾਈ ਰੱਖਿਆ। ਇਸ ਦਾ ਨਤੀਜਾ ਪਹਿਲੇ ਅੱਧ ’ਚ ਉਸ ਵੇਲੇ ਨਿਕਲਿਆ ਜਦੋਂ ਬ੍ਰੀਲ ਐਮਬੋਲੋ ਨੇ ਸ਼ਾਨਦਾਰ ਗੋਲ ਕਰਕੇ ਆਪਣੀ ਟੀਮ ਨੂੰ 1-0 ਦੀ ਬੜ੍ਹਤ ਦਿਵਾਈ। ਪਹਿਲੇ ਅੱਧ ਵਿਚ ਅਲਜੀਰੀਆ ਨੇ ਬਰਾਬਰੀ ਲਈ ਕਈ ਯਤਨ ਕੀਤੇ, ਪਰ ਸਵਿਟਜ਼ਰਲੈਂਡ ਦੀ ਮਜ਼ਬੂਤ ਰੱਖਿਅਕਾਂ ਅਤੇ ਗੋਲਕੀਪਰ ਨੇ ਹਰ ਕੋਸ਼ਿਸ਼ ਨੂੰ ਨਾਕਾਮ ਕਰ ਦਿੱਤਾ। ਦੂਜੇ ਅੱਧ ’ਚ ਵੀ ਸਵਿਟਜ਼ਰਲੈਂਡ ਨੇ ਆਪਣੀ ਪਕੜ ਢਿੱਲੀ ਨਹੀਂ ਪੈਣ ਦਿੱਤੀ। ਡੈਨ ਐਨਡੋਏ ਨੇ ਦੂਜਾ ਗੋਲ ਕਰਕੇ ਸਕੋਰ 2-0 ਕਰ ਦਿੱਤਾ, ਜਿਸ ਤੋਂ ਬਾਅਦ ਅਲਜੀਰੀਆ ਲਈ ਵਾਪਸੀ ਕਰਨਾ ਔਖਾ ਹੋ ਗਿਆ। ਅਖੀਰਲੇ ਮਿੰਟਾਂ ’ਚ ਅਲਜੀਰੀਆ ਨੇ ਹਮਲੇ ਤੇਜ਼ ਕੀਤੇ, ਪਰ ਉਸ ਨੂੰ ਕੋਈ ਸਫ਼ਲਤਾ ਨਹੀਂ ਮਿਲੀ। ਵਰ੍ਹਦੇ ਮੀਂਹ ਦੇ ਬਾਵਜੂਦ ਹੱਥਾਂ ’ਚ ਸਵਿਟਜ਼ਰਲੈਂਡ ਦੇ ਰਾਸ਼ਟਰੀ ਝੰਡੇ ਫੜੀ ਸੈਂਕੜੇ ਸਮਰਥਕ ਸਟੇਡੀਅਮ ਦੇ ਬਾਹਰ ਤੇ ਆਲੇ-ਦੁਆਲੇ ਦੀਆਂ ਸੜਕਾਂ ’ਤੇ ਖੁਸ਼ੀ ਦਾ ਇਜ਼ਹਾਰ ਕਰਦੇ ਨਜ਼ਰ ਆਏ। ਵੈਨਕੂਵਰ ’ਚ ਦੇਰ ਰਾਤ ਤੱਕ ਚਹਿਲ ਪਹਿਲ ਲੱਗੀ ਰਹੀ।
