ਭਾਰਤੀ ਮੂਲ ਦੀ ਕ੍ਰਿਸ਼ਮਾ ਨੇ ਯੂ.ਕੇ. ਦਾ ਰਿਐਲਿਟੀ ਸ਼ੋਅ 'ਦ ਅਪ੍ਰੈਂਟਿਸ' ਜਿੱਤਿਆ

ਅ

ਅਜੀਤ ਡੈਸਕ 18-04-2026

ਲੰਡਨ, 17 ਅਪ੍ਰੈਲ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਲੰਡਨ ਨੇੜਲੇ ਇਲਾਕੇ ਐਸ਼ਫੋਰਡ ਦੀ ਰਹਿਣ ਵਾਲੀ ਭਾਰਤੀ ਮੂਲ ਦੀ ਉੱਦਮੀ ਕਿ੍ਸ਼ਮਾ ਵਿਜੇ ਨੇ ਯੂ.ਕੇ. ਰਿਐਲਿਟੀ ਸ਼ੋਅ 'ਦ ਅਪ੍ਰੈਂਟਿਸ' 2026 ਐਡੀਸ਼ਨ ਜਿੱਤ ਕੇ ਆਪਣੇ ਕਾਰੋਬਾਰ ਲਈ ਲਾਰਡ ਐਲਨ ਸ਼ੂਗਰ ਦਾ 250,000 ਪੌਂਡ ਦਾ ਨਿਵੇਸ਼ ਸੁਰੱਖਿਅਤ ਕੀਤਾ ਹੈ | 'ਦ ਅਪ੍ਰੈਂਟਿਸ' ਇਕ ਬੀ.ਬੀ.ਸੀ. ਕਾਰੋਬਾਰੀ ਰਿਐਲਿਟੀ ਸ਼ੋਅ ਹੈ ਜਿੱਥੇ ਪ੍ਰਤੀਯੋਗੀ ਕਈ ਹਫ਼ਤਿਆਂ ਤੱਕ ਸਖ਼ਤ ਕਾਰੋਬਾਰੀ ਕੰਮਾਂ ਰਾਹੀਂ ਮੁਕਾਬਲਾ ਕਰਦੇ ਹਨ ਅਤੇ ਇਕ ਬਿ੍ਟਿਸ਼ ਕਾਰੋਬਾਰੀ ਲਾਰਡ ਸ਼ੂਗਰ ਤੋਂ ਨਿਵੇਸ਼ ਲਈ ਪੈਸਾ ਜਿੱਤਦੇ ਹਨ | ਲਾਰਡ ਸ਼ੂਗਰ 2005 ਤੋਂ ਇਸ ਦੇ ਮੁੱਖ ਜੱਜ ਹਨ | 28 ਸਾਲਾ ਕਰਿਸ਼ਮਾ ਵਿਜੇ ਲੰਡਨ ਦੇ ਇਲਾਕੇ ਐਸ਼ਫੋਰਡ ਦੀ ਜੰਮਪਲ ਹੈ, ਉਸ ਨੇ ਪਾਸਚਾ ਮਾਈਹਿਲ ਨੂੰ ਹਰਾ ਕੇ ਸ਼ੋਅ ਜਿੱਤਿਆ ਹੈ | ਜਿੱਤ ਤੋਂ ਬਾਅਦ ਵਿਜੇ ਨੇ ਕਿਹਾ ਕਿ ਪ੍ਰਤੀਯੋਗੀਆਂ ਨੂੰ ਨਤੀਜਾ ਜਾਣਨ ਲਈ ਮਹੀਨਿਆਂ ਤੱਕ ਉਡੀਕ ਕਰਨੀ ਪੈਂਦੀ ਹੈ | ਮੈਂ ਨਤੀਜੇ ਤੋਂ ਖੁਸ਼ ਹਾਂ, ਇਸ ਨਾਲ ਮੇਰੀ ਜ਼ਿੰਦਗੀ ਬਦਲ ਗਈ ਹੈ | ਉਸਦੀ ਪ੍ਰਾਪਤੀ ਉਸਦੇ ਪਰਿਵਾਰ ਲਈ ਬਹੁਤ ਮਾਇਨੇ ਰੱਖਦੀ ਸੀ | ਵਿਜੇ ਨੇ ਜ਼ਿਕਰ ਕੀਤਾ ਕਿ ਕਿਵੇਂ ਉਸਦਾ ਪਾਲਣ-ਪੋਸ਼ਣ ਇਕ ਰਵਾਇਤੀ ਭਾਰਤੀ ਘਰ ਵਿਚ ਉਸਦੇ ਪਿਤਾ ਵਲੋਂ ਕੀਤਾ ਗਿਆ |