ਨਵੀਂ ਦਿੱਲੀ, 10 ਜੂਨ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਵਿਚ ਬਦਮਾਸ਼ ਪੂਰੀ ਤਰ੍ਹਾਂ ਨਾਲ ਸਰਗਰਮ ਹਨ ਅਤੇ ਉਹ ਮੌਕਾ ਵੇਖ ਕੇ ਆਪਣਾ ਕੰਮ ਕਰਨ ਤੋਂ ਪਿੱਛੇ ਨਹੀਂ ਰਹਿੰਦੇ | ਬੀਤੀ ਰਾਤ ਦਿੱਲੀ ਪੁਲਿਸ ਦੀ ਏ. ਏ. ਟੀ. ਐਸ. ਟੀਮ ਅਤੇ ਅਪਰਾਧੀ ਵਿਚ ਮੁੱਠਭੇੜ ਹੋਈ ਜੋ ਕਿ ਮੂਲ ਚੰਦ ਮੈਟਰੋ ਸਟੇਸ਼ਨ ਦੇ ਕੋਲ ਲੇਡੀ ਸ੍ਰੀ ਰਾਮ ਕਾਲਜ ਦੇ ਪਿੱਛੇ ਵਾਪਰੀ | ਇਸ ਮੁੱਠਭੇੜ ਵਿਚ ਅਪਰਾਧੀ ਸੋਨੂੰ ਸ਼ਾਮਿਲ ਸੀ | ਉਸ ਨੇ ਪੁਲਿਸ 'ਤੇ ਗੋਲੀਆਂ ਚਲਾ ਕੇ ਭੱਜਣ ਦੀ ਕੋਸ਼ਿਸ਼ ਤਾਂ ਕੀਤੀ, ਪ੍ਰੰਤੂ ਪੁਲਿਸ ਨੇ ਆਪਣੀ ਜਵਾਬੀ ਕਾਰਵਾਈ ਕੀਤੀ ਅਤੇ ਇਕ ਗੋਲੀ ਸੋਨੂੰ ਦੇ ਪੈਰ ਵਿਚ ਲੱਗਣ 'ਤੇ ਉਹ ਜ਼ਖ਼ਮੀ ਹੋ ਗਿਆ | ਪੁਲਿਸ ਨੇ ਇਸ ਨੂੰ ਕਾਬੂ ਕਰ ਲਿਆ ਅਤੇ ਹਸਪਤਾਲ ਵਿਖ਼ੇ ਦਾਖਲ ਕਰਵਾਇਆ | ਫੜੇ ਗਏ ਸੋਨੂੰ ਵਿਰੁੱਧ ਪਹਿਲਾਂ ਹੀ ਪੁਲਿਸ ਕੋਲ ਚੋਰੀ, ਡਕੈਤੀ ਜਿਹੇ ਅਪਰਾਧ ਦੇ ਮਾਮਲੇ ਦਰਜ ਹਨ, ਜਿਸ ਕਰਕੇ ਪੁੁਲਿਸ ਇਸ ਨੂੰ ਪਿਛਲੇ ਸਮੇਂ ਤੋਂ ਤਲਾਸ਼ ਕਰ ਰਹੀ ਸੀ | ਗੋਬਿੰਦਪੁਰੀ ਥਾਣੇ ਦੀ ਪੁਲਿਸ ਨੇ ਸੋਨੂੰ ਦੇ ਕੋਲੋਂ ਹਥਿਆਰ ਵੀ ਬਰਾਮਦ ਕਰ ਲਏ ਹਨ | ਪੁਲਿਸ ਕਾਰਵਾਈ ਕਰਦੇ ਹੋਏ ਸੋਨੂੰ ਤੋਂ ਉਸ ਦੇ ਸਾਥੀਆਂ ਬਾਰੇ ਪੁੱਛਗਿੱਛ ਕਰ ਰਹੀ ਹੈ |
