ਨਵੀਂ ਦਿੱਲੀ, 13 ਜੂਨ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਟਰਾਂਸਪੋਰਟ ਨਿਗਮ ਵਲੋਂ ਬੱਸਾਂ ਵਿਚ ਮੁਫਤ ਯਾਤਰਾ ਕਰਨ ਲਈ ਪਿੰਕ ਸਹੇਲੀ ਸਮਾਰਟ ਕਾਰਡ 3 ਮਾਰਚ 2026 ਤੋਂ ਬਣਾਉਣੇ ਸ਼ੁਰੂ ਕੀਤੇ ਗਏ ਸਨ ਅਤੇ ਇਸ ਸਮੇਂ ਤਕਰੀਬਨ 70 ਕੇਂਦਰਾਂ 'ਤੇ ਇਹ ਸਮਾਰਟ ਕਾਰਡ ਬਣਾਏ ਜਾ ਰਹੇ ਹਨ | ਹਰ ਕੇਂਦਰ 'ਤੇ ਔਰਤਾਂ ਆਪਣੇ ਪਿੰਕ ਸਹੇਲੀ ਸਮਾਰਟ ਕਾਰਡ ਬਣਵਾ ਰਹੀਆਂ ਹਨ, ਜਿਸ ਕਰਕੇ ਅਕਸਰ ਇਨ੍ਹਾਂ ਖੇਤਰਾਂ 'ਤੇ ਭੀੜ ਰਹਿੰਦੀ ਹੈ | ਸਮਾਰਟ ਕਾਰਡ ਵਾਲੇ ਕਰਮਚਾਰੀਆਂ ਨੂੰ ਹੁਣ ਹਰ ਸੋਮਵਾਰ ਛੁੱਟੀ ਮਿਲੇਗੀ, ਜਿਸ ਕਰਕੇ ਇਸ ਦਿਨ ਸਾਰੇ ਕੇਂਦਰਾਂ 'ਤੇ ਸਮਾਰਟ ਕਾਰਡ ਛੁੱਟੀ ਵਾਲੇ ਦਿਨ ਨਹੀਂ ਬਣਨਗੇ | ਹੁਣ ਤੱਕ 10 ਲੱਖ ਤੋਂ ਜ਼ਿਆਦਾ ਪਿੰਕ ਸਹੇਲੀ ਸਮਾਰਟ ਕਾਰਡ ਬਣ ਚੁੱਕੇ ਹਨ | ਇਹ ਸਮਾਰਟ ਕਾਰਡ ਉਨ੍ਹਾਂ ਔਰਤਾਂ ਦੇ ਹੀ ਬਣਾਏ ਜਾ ਰਹੇ ਹਨ ਜਿਨ੍ਹਾਂ ਕੋਲ ਕੇਵਲ ਦਿੱਲੀ ਦਾ ਆਧਾਰ ਕਾਰਡ ਹੋਵੇਗਾ | ਜਿਨ੍ਹਾਂ ਔਰਤਾਂ ਕੋਲ ਇਹ ਕਾਰਡ ਨਹੀਂ ਹੋਵੇਗਾ ਉਨ੍ਹਾਂ ਨੂੰ ਟਿਕਟ ਲਈ ਪੈਸੇ ਖਰਚਣੇ ਪੈਣਗੇ | ਅਜਿਹੀਆਂ ਔਰਤਾਂ ਦੀ ਕਾਫੀ ਗਿਣਤੀ ਦਿੱਲੀ ਵਿਚ ਹੈ ਜੋ ਕਿ ਬਾਹਰਲੇ ਰਾਜਾਂ ਦੀਆਂ ਹਨ ਪਰੰਤੂ ਉਨ੍ਹਾਂ ਕੋਲ ਦਿੱਲੀ ਦਾ ਆਧਾਰ ਕਾਰਡ ਨਹੀਂ ਹੈ | ਇਹ ਪ੍ਰੇਸ਼ਾਨੀ ਜ਼ਿਆਦਾ ਉਸ ਸਮੇਂ ਸਾਹਮਣੇ ਆਵੇਗੀ ਜਦੋਂ ਇਸ ਕਾਰਡ ਰਾਹੀਂ ਔਰਤਾਂ ਦੀ ਬੱਸਾਂ ਵਿਚ ਆਵਾਜ਼ਾਈ ਸ਼ੁਰੂ ਹੋਵੇਗੀ |
