ਮਯੂਰ ਵਿਹਾਰ ’ਚ ਲੱਗਾ ਨੈਤਿਕ ਸਿੱਖਿਆ ਪ੍ਰਤੀ ਕੈਂਪ

ਨਵੀਂ ਦਿੱਲੀ, 30 ਜੂਨ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਦੇ ਮਯੂਰ ਵਿਹਾਰ ਵਿਖੇ ਸ੍ਰੀ ਦਿਗੰਬਰ ਜੈਨ ਨੈਤਿਕ ਸਿੱਖਿਆ ਸਮਿਤੀ ਵਲੋਂ ਨੈਤਿਕ ਸਿੱਖਿਆ ਪ੍ਰਤੀ ਬੱਚਿਆਂ ਦਾ ਇਕ ਕੈਂਪ ਲਗਾਇਆ ਗਿਆ। ਇਸ ਮੌਕੇ ’ਤੇ ਅਚਾਰੀਆ ਸਰਿਤ ਸਾਗਰ ਮਹਾਰਾਜ ਨੇ ਬੱਚਿਆਂ ਨੂੰ ਕਿਹਾ ਕਿ ਜੀਵਨ ਵਿਚ ਸੰਸਕਾਰਾਂ ਦਾ ਹੋਣਾ ਜ਼ਰੂਰੀ ਹੈ, ਜਿਸ ਕਰਕੇ ਬੱਚਿਆਂ ਨੂੰ ਸੰਸਕਾਰ ਜ਼ਰੂਰ ਅਪਣਾਉਣੇ ਚਾਹੀਦੇ ਹਨ। ਅਚਾਰੀਆ ਹੋਰਾਂ ਇਹ ਵੀ ਕਿਹਾ ਕਿ ਜੇਕਰ ਬੱਚਿਆਂ ਵਿਚ ਸੰਸਕਾਰ ਹੋਣਗੇ ਤਾਂ ਉਹ ਆਪਣੇ ਜੀਵਨ ਵਿਚ ਅੱਗੇ ਵਧਦੇ ਹੋਏ ਮੰਜ਼ਿਲ ’ਤੇ ਪੁੱਜਣਗੇ। ਉਨ੍ਹਾਂ ਇਹ ਵੀ ਕਿਹਾ ਇਮਾਨਦਾਰੀ ਵੀ ਜ਼ਰੂਰ ਅਪਣਾਉਣੀ ਚਾਹੀਦੀ ਹੈ। ਸਮਿਤੀ ਦੇ ਸਕੱਤਰ ਅਸ਼ੋਕ ਜੈਨ ਨੇ ਇਸ ਮੌਕੇ ’ਤੇ ਦੱਸਿਆ ਕਿ ਸਮਿਤੀ ਵਲੋਂ ਪਿਛਲੇ 40 ਸਾਲਾਂ ਤੋਂ ਨੈਤਿਕ ਸਿੱਖਿਆ ਦੇ ਕੈਂਪ ਲਗਾਏ ਜਾ ਰਹੇ ਹਨ ਅਤੇ ਇਸ ਸਾਲ ਵਿਚ 75 ਕੈਂਪ ਲਗਾਏ ਜਾਣੇ ਹਨ। ਇਸ ਕੈਂਪ ਵਿਚ ਸਮਿਤੀ ਦੇ ਅਹੁਦੇਦਾਰ ਅਲੋਕ ਜੈਨ, ਵਰਿੰਦਰ ਜੈਨ, ਵਿਜੈ ਕੁਮਾਰ ਜੈਨ, ਅਰਵਿੰਦ ਜੈਨ, ਅੰਜੂ ਜੈਨ, ਰੇਨੂ ਜੈਨ ਅਤੇ ਹੋਰ ਸ਼ਖ਼ਸੀਅਤ ਸ਼ਾਮਿਲ ਸਨ।