ਮਲੋਟ, 12 ਜੂਨ (ਪਾਟਿਲ)-ਸਾਹਿਤ ਤੇ ਰਚਨਾਤਮਕ ਲਿਖਤ ਵਿਚ ਰੁਚੀ ਰੱਖਣ ਵਾਲੇ ਨੌਜਵਾਨਾਂ, ਵਿਦਿਆਰਥੀਆਂ ਤੇ ਸਾਹਿਤ ਪ੍ਰੇਮੀਆਂ ਲਈ ਵਿਸ਼ੇਸ਼ ਉਪਰਾਲਾ ਕੀਤਾ ਗਿਆ ਹੈ | ਪ੍ਰਸਿੱਧ ਸਾਹਿਤ ਪ੍ਰੇਮੀ ਤੇ ਪ੍ਰਸ਼ਿਕਸ਼ਕ ਸੰਜੀਵ ਸਿੰਘ ਬਾਵਾ ਵਲੋਂ ਫ਼ਿਲਮੀ ਗਾਣੇ, ਕਵਿਤਾ, ਗ਼ਜ਼ਲ ਤੇ ਸ਼ੇਅਰ ਲਿਖਣ ਦੀ ਕਲਾ ਸਿਖਾਉਣ ਲਈ ਮੁਫ਼ਤ ਆਨਲਾਈਨ ਜ਼ੂਮ ਕਲਾਸਾਂ ਲਗਾਈਆਂ ਜਾ ਰਹੀਆਂ ਹਨ | ਪ੍ਰਬੰਧਕਾਂ ਅਨੁਸਾਰ ਇਹ ਕਲਾਸਾਂ 13 ਜੂਨ ਤੋਂ ਸ਼ੁਰੂ ਹੋਣਗੀਆਂ ਅਤੇ ਹਰ ਨਿਰਧਾਰਤ ਦਿਨ ਸ਼ਾਮ 7 ਵਜੇ ਤੋਂ 8 ਵਜੇ ਤੱਕ ਮੁਫ਼ਤ ਆਨਲਾਈਨ ਜ਼ੂਮ ਰਾਹੀਂ ਸੱਤ ਦਿਨਾਂ ਲਈ ਲਗਾਈਆਂ ਜਾਣਗੀਆਂ | ਕਲਾਸਾਂ ਦੌਰਾਨ ਭਾਗੀਦਾਰਾਂ ਨੂੰ ਕਾਵਿ-ਵਿਧਾਵਾਂ ਦੀ ਬੁਨਿਆਦੀ ਸਮਝ, ਬਹਿਰ ਤੇ ਵਜ਼ਨ, ਮਤਲਾ ਤੇ ਮਕਤਾ, ਤਕਨੀਕੀ ਪੱਖ, ਕਾਫੀਆ ਤੇ ਰਦੀਫ਼ ਦੀ ਵਰਤੋਂ, ਗੀਤ, ਗ਼ਜ਼ਲ ਅਤੇ ਕਵਿਤਾ ਲਿਖਣ ਦੇ ਅਸੂਲਾਂ ਬਾਰੇ ਜਾਣਕਾਰੀ ਦਿੱਤੀ ਜਾਵੇਗੀ | ਸੰਜੀਵ ਸਿੰਘ ਬਾਵਾ ਨੇ ਦੱਸਿਆ ਕਿ ਇਸ ਉਪਰਾਲੇ ਦਾ ਉਦੇਸ਼ ਨਵੇਂ ਲਿਖਾਰੀਆਂ ਨੂੰ ਸਹੀ ਦਿਸ਼ਾ ਤੇ ਮੰਚ ਪ੍ਰਦਾਨ ਕਰਨਾ ਹੈ, ਤਾਂ ਜੋ ਉਹ ਆਪਣੀ ਸਾਹਿਤਕ ਯੋਗਤਾ ਨੂੰ ਨਿਖਾਰ ਸਕਣ | ਉਨ੍ਹਾਂ ਕਿਹਾ ਕਿ ਕਲਾਸਾਂ ਪੂਰੀ ਤਰ੍ਹਾਂ ਹਰ ਵਰਗ ਲਈ ਮੁਫ਼ਤ ਹਨ ਅਤੇ ਕੋਈ ਵੀ ਸਾਹਿਤਕ ਰੁਚੀ ਰੱਖਣ ਵਾਲਾ ਵਿਅਕਤੀ ਇਸ ਵਿਚ ਸ਼ਾਮਿਲ ਹੋ ਸਕਦਾ ਹੈ |
