ਖਰੜ, 9 ਅਗਸਤ (ਮਾਨ)-ਬਲਾਕ ਖਰੜ ਤਹਿਤ ਪੈਂਦੇ ਪਿੰਡ ਰਸਨਹੇੜੀ ਦੇ ਵਸਨੀਕਾਂ ਨੂੰ ਪਿਛਲੇ 5 ਦਿਨਾ ਤੋਂ ਪੀਣ ਵਾਲੇ ਪਾਣੀ ਦੀ ਸਪਲਾਈ ਨਹੀਂ ਮਿਲ ਰਹੀ | ਪਿੰਡ ਨਿਵਾਸੀ ਭਜਨ ਸਿੰਘ, ਮੁਲਾਜ਼ਮ ਆਗੂ ਜਨਕ ਸਿੰਘ, ਰਣਜੀਤ ਸਿੰਘ, ਪਿਆਰਾ ਸਿੰਘ, ਜਰਨੈਲ ਸਿੰਘ, ਹਰਬੰਸ ਸਿੰਘ, ਕਰਮ ਸਿੰਘ, ਅਮਰੀਕ ਸਿੰਘ ਫ਼ੌਜੀ, ਕਮਲਜੀਤ ਸਿੰਘ ਸਮੇਤ ਹੋਰਨਾਂ ਨੇ ਨਿਗਰਾਨ ਇੰਜੀਨੀਅਰ ਵਾਟਰ ਸਪਲਾਈ ਨੂੰ ਮਿਲ ਕੇ ਪਾਣੀ ਦੀ ਸਪਲਾਈ ਬਹਾਲ ਕਰਨ ਦੀ ਮੰਗ ਕੀਤੀ ਹੈ | ਉਨ੍ਹਾਂ ਦੱਸਿਆ ਕਿ ਪਿੰਡ ਦੇ ਟਿਊਬਵੈੱਲ 'ਤੇ ਲੱਗੀ ਮੋਟਰ ਸੜ੍ਹ ਗਈ, ਜਿਸ ਕਾਰਨ ਪਾਣੀ ਦੀ ਸਪਲਾਈ ਬੰਦ ਪਈ ਹੈ | ਉਨ੍ਹਾਂ ਕਥਿਤ ਤੌਰ 'ਤੇ ਡਿਊਟੀ ਕਰਮਚਾਰੀ 'ਤੇ ਨਸ਼ੇ ਵਿਚ ਟੱਲੀ ਰਹਿਣ ਦੇ ਵੀ ਦੋਸ਼ ਲਾਏ | ਇਸ ਦੌਰਾਨ ਪਿੰਡ ਵਾਸੀਆਂ ਵਲੋਂ ਖਾਲੀ ਭਾਂਡੇ ਲੈ ਕੇ ਟੈਂਕੀ 'ਤੇ ਪਹੁੰਚ ਕੇ ਰੋਸ ਪ੍ਰਗਟ ਕੀਤਾ ਗਿਆ | ਪਿੰਡ ਨਿਵਾਸੀਆਂ ਨੇ ਮੰਗ ਕੀਤੀ ਕਿ ਪਾਣੀ ਦੀ ਸਪਲਾਈ ਬਹਾਲ ਕੀਤੀ ਜਾਵੇ ਅਤੇ ਟੈਂਕੀ 'ਤੇ ਤਾਇਨਾਤ ਕਰਮਚਾਰੀ ਦੀ ਬਦਲੀ ਕੀਤੀ ਜਾਵੇ |
