ਉੱਚ ਵਿਕਾਸ ਤੇ ਘੱਟ ਮਹਿੰਗਾਈ ਵਾਲਾ ਮਾਡਲ ਹੈ ਭਾਰਤ-ਮੋਦੀ

ਕਿਹਾ, ਦੇਸ਼ ਬਣ ਰਿਹੈ ਵਿਸ਼ਵ ਅਰਥਵਿਵਸਥਾ ਦਾ ਵਿਕਾਸ ਚਾਲਕ
ਨਵੀਂ ਦਿੱਲੀ, 6 ਦਸੰਬਰ (ਏਜੰਸੀ)-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਭਾਰਤ ਉੱਚ ਵਿਕਾਸ ਅਤੇ ਘੱਟ ਮਹਿੰਗਾਈ ਵਾਲਾ ਇਕ ਮਾਡਲ ਹੈ | ਉਨ੍ਹਾਂ ਕਿਹਾ ਕਿ ਇਸ ਵਿੱਤੀ ਸਾਲ ਦੀ ਦੂਜੀ ਤਿਮਾਹੀ 'ਚ ਦੇਸ਼ ਦੀ 8.2 ਪ੍ਰਤੀਸ਼ਤ ਵਿਕਾਸ ਦਰ ਦਰਸਾਉਂਦੀ ਹੈ ਕਿ ਇਹ ਵਿਸ਼ਵ ਅਰਥਵਿਵਸਥਾ ਦਾ ਵਿਕਾਸ ਚਾਲਕ ਬਣ ਰਿਹਾ ਹੈ | ਉਨ੍ਹਾਂ ਇਹ ਵੀ ਕਿਹਾ ਕਿ ਭਾਰਤ ਦਾ ਆਤਮਵਿਸ਼ਵਾਸ 'ਬਸਤੀਵਾਦ ਦੀ ਮਾਨਸਿਕਤਾ' ਨੇ ਹਿੱਲਾ ਦਿੱਤਾ ਸੀ ਪਰ ਹੁਣ ਅਸੀਂ ਇਸ ਤੋਂ ਅੱਗੇ ਵਧ ਰਹੇ ਹਾਂ | ਇਕ ਸਮੇਂ ਜਦੋਂ ਦੁਨੀਆ ਅਨਿਸ਼ਚਿਤਤਾਵਾਂ ਨਾਲ ਭਰੀ ਹੋਈ ਹੈ, ਭਾਰਤ ਨੂੰ ਇਕ ਵੱਖਰੇ ਵਰਗ 'ਚ ਦੇਖਿਆ ਜਾ ਰਿਹਾ ਹੈ | ਹਿੰਦੁਸਤਾਨ ਟਾਈਮਜ਼ ਲੀਡਰਸ਼ਿਪ ਸੰਮੇਲਨ ਨੂੰ ਸੰਬੋਧਨ ਕਰਦੇ ਹੋਏ ਉਨ੍ਹਾਂ ਕਿਹਾ ਕਿ ਭਾਰਤ 'ਚ ਹੋ ਰਹੀਆਂ ਤਬਦੀਲੀਆਂ ਸਿਰਫ਼ ਸੰਭਾਵਨਾਵਾਂ ਬਾਰੇ ਨਹੀਂ ਹਨ ਬਲਕਿ ਸੋਚ ਤੇ ਦਿਸ਼ਾ ਬਦਲਣ ਦੀ ਗਾਥਾ ਹਨ | ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਇਕ ਅਜਿਹੇ ਮੋੜ 'ਤੇ ਖੜ੍ਹੇ ਹਾਂ ਜਿਥੇ 21ਵੀਂ ਸਦੀ ਦਾ ਇਕ ਚੌਥਾਈ ਹਿੱਸਾ ਬੀਤ ਚੁੱਕਾ ਹੈ | ਦੁਨੀਆ ਨੇ ਬਹੁਤ ਸਾਰੇ ਉਤਰਾਅ-ਚੜ੍ਹਾਅ ਦੇਖੇ ਹਨ: ਵਿੱਤੀ ਸੰਕਟ, ਵਿਸ਼ਵ ਮਹਾਂਮਾਰੀ, ਤਕਨੀਕੀ ਰੁਕਾਵਟਾਂ, ਦੁਨੀਆ ਟੁੱਟ ਰਹੀ ਹੈ, ਅਸੀਂ ਜੰਗਾਂ ਦੇਖ ਰਹੇ ਹਾਂ, ਇਹ ਸਥਿਤੀਆਂ ਕਿਸੇ ਨਾ ਕਿਸੇ ਤਰੀਕੇ ਨਾਲ ਦੁਨੀਆ ਨੂੰ ਚੁਣੌਤੀ ਦੇ ਰਹੀਆਂ ਹਨ | ਉਨ੍ਹਾਂ ਨੇ ਕਿਹਾ ਕਿ ਭਾਰਤ ਆਤਮਵਿਸ਼ਵਾਸ ਨਾਲ ਭਰਿਆ ਹੋਇਆ ਹੈ, ਜਦੋਂ ਮੰਦੀ ਦੀ ਗੱਲ ਹੁੰਦੀ ਹੈ, ਤਾਂ ਭਾਰਤ ਵਿਕਾਸ ਦੀ ਕਹਾਣੀ ਲਿਖਦਾ ਹੈ, ਜਦੋਂ ਦੁਨੀਆ 'ਚ ਵਿਸ਼ਵਾਸ ਦੀ ਘਾਟ ਹੁੰਦੀ ਹੈ, ਭਾਰਤ ਵਿਸ਼ਵਾਸ ਦਾ ਥੰਮ੍ਹ ਬਣ ਰਿਹਾ ਹੈ, ਜਦੋਂ ਦੁਨੀਆ ਖੰਡਨ ਵੱਲ ਵਧ ਰਹੀ ਹੈ, ਭਾਰਤ ਇਕ ਪੁਲ ਬਣਾਉਣ ਵਾਲਾ ਬਣ ਰਿਹਾ ਹੈ |