ਲੰਡਨ 4 ਨਵੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਇੰਗਲੈਂਡ ਦੇ ਸ਼ਹਿਰ ਡਰਬੀ ਵਾਸੀ ਪੰਜਾਬੀ ਮੂਲ ਦੇ ਗੁਰਵਿੰਦਰ ਸਿੰਘ ਜੌਹਲ ਦੇ ਕਾਤਲ ਸੋਮਾਲੀਅਨ ਨਾਗਰਿਕ ਹੇਬੇ ਕੈਬਦੀਰਕਸ਼ਮਾਨ ਨੂਰ ਨੂੰ ਅਦਾਲਤ ਨੇ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ | ਗੁਰਵਿੰਦਰ ਸਿੰਘ ਦਾ ਕਤਲ ਉਸ ਸਮੇਂ ਕੀਤਾ ਜਦੋਂ ਉਹ ਬੈਂਕ ਵਿਚੋਂ ਆਪਣੇ ਕਾਮਿਆਂ ਨੂੰ ਤਨਖਾਹ ਦੇਣ ਲਈ ਪੈਸੇ ਕਢਵਾ ਰਿਹਾ ਸੀ | ਗੁਰਵਿੰਦਰ ਜਿਸ ਨੂੰ ਡੈਨੀ ਵਜੋਂ ਜਾਣਿਆ ਜਾਂਦਾ ਸੀ, ਬਰਮਿੰਘਮ ਦੇ ਵੈਸਟ ਬ੍ਰਾਮਿਚ ਵਿਚ ਆਪਣੀ ਪਤਨੀ ਅਤੇ ਪੰਜ, ਤਿੰਨ ਅਤੇ ਇੱਕ ਸਾਲ ਦੇ ਬੱਚਿਆਂ ਨਾਲ ਰਹਿ ਰਿਹਾ ਸੀ | ਜੋ ਰੈਸਟੋਰੈਂਟ ਸਮੇਤ ਕਈ ਕਾਰੋਬਾਰਾਂ ਦਾ ਮਾਲਕ ਸੀ | ਡਰਬੀ ਕਰਾਊਨ ਕੋਰਟ 'ਚ ਜੱਜ ਸ਼ੌਨ ਸਮਿੱਥ ਕੇ.ਸੀ. ਨੇ ਦੋਸ਼ੀ ਨੂਰ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਉਂਦਿਆਂ 25 ਸਾਲ ਜੇਲ੍ਹ ਵਿਚ ਰੱਖਣ ਦੇ ਹੁਕਮ ਦਿੱਤੇ | ਉਨ੍ਹਾਂ ਕਿਹਾ ਕਿ ਇਹ ਬੇਰਹਿਮ ਕਤਲ ਸੀ, ਜੋ ਆਪਣੇ ਕਾਮਿਆਂ ਨੂੰ ਤਨਖਾਹ ਦੇਣ ਲਈ ਬੈਂਕ ਤੋਂ ਪੈਸੇ ਕਢਵਾਉਣ ਤੋਂ ਇਲਾਵਾ ਕੁਝ ਨਹੀਂ ਕਰ ਰਿਹਾ ਸੀ | ਸਰਕਾਰੀ ਵਕੀਲ ਲੁਈਸ ਮੈਬਲੀ ਕੇ.ਸੀ. ਨੇ ਅਦਾਲਤ ਨੂੰ ਦੱਸਿਆ ਕਿ ਨੂਰ 22 ਅਕਤੂਬਰ 2024 ਨੂੰ ਛੋਟੀ ਕਿਸ਼ਤੀ ਰਾਹੀਂ ਯੂ.ਕੇ. ਪਹੁੰਚਿਆ ਸੀ, ਜਨਵਰੀ ਵਿਚ ਉਸ ਦੀ ਸ਼ਰਨ ਅਰਜ਼ੀ ਰੱਦ ਕਰ ਦਿੱਤੀ ਸੀ | ਅਦਾਲਤ ਵਿਚ ਦੱਸਿਆ ਗਿਆ ਕਿ ਦੋਸ਼ੀ ਅਚਾਨਕ ਗੁਰਵਿੰਦਰ ਕੋਲ ਜਾਂਦਾ ਹੈ ਤੇ ਉਸ ਦੀ ਛਾਤੀ ਵਿਚ ਛੁਰਾ ਮਾਰ ਕੇ ਮਾਰ ਦਿੰਦਾ ਹੈ |
