ਭੁਲੱਥ, 21 ਨਵੰਬਰ (ਮਨਜੀਤ ਸਿੰਘ ਰਤਨ, ਮੇਹਰ ਚੰਦ ਸਿੱਧੂ)-ਸਬ ਡਵੀਜ਼ਨ ਭੁਲੱਥ ਤੋਂ ਕਰਤਾਰਪੁਰ ਨੂੰ ਜਾਂਦੀ ਮੇਨ ਸੜਕ ਜੋ ਅੰਮਿ੍ਤਸਰ-ਜਲੰਧਰ ਮੁੱਖ ਮਾਰਗ ਨਾਲ ਜੁੜਦੀ ਹੈ ਉਹ ਹੁਣ ਦੋ ਮਹੀਨੇ ਲਈ ਬੰਦ ਹੋ ਜਾ ਰਹੀ ਹੈ | ਇਹ ਸਬੰਧੀ ਜਾਣਕਾਰੀ ਦਿੰਦੇ ਡਵੀਜ਼ਨ ਕਰਤਾਰਪੁਰ ਵਿਖੇ ਸੀਵਰੇਜ ਬੋਰਡ ਦੇ ਐੱਸ.ਡੀ.ਓ. ਸੰਦੀਪ ਸ਼ਰਮਾ ਨੇ ਦੱਸਿਆ ਕਿ ਕਰਤਾਰਪੁਰ ਦੀ ਹੱਦ ਵਿਚ ਭੁਲੱਥ ਰੋਡ ਤੇ ਪੈਂਦੇ ਨਾਲੇ ਤੋਂ ਲੈ ਕੇ ਜੀ.ਟੀ. ਰੋਡ ਤੱਕ ਮੇਨ ਸੀਵਰੇਜ ਦਾ ਕੰਮ ਸ਼ੁਰੂ ਕੀਤਾ ਜਾ ਰਿਹਾ ਹੈ ਜਿਸ ਕਰਕੇ ਸੜਕ ਦੋ ਮਹੀਨੇ ਲਈ ਬੰਦ ਰਹੇਗੀ | ਉਨ੍ਹਾਂ ਦੱਸਿਆ ਕਿ 24 ਨਵੰਬਰ ਤੋਂ ਲੈ ਕੇ 31 ਜਨਵਰੀ 2026 ਤੱਕ ਰਸਤਾ ਬੰਦ ਰਹੇਗਾ ਅਤੇ 31 ਜਨਵਰੀ 2026 ਤੱਕ ਸੀਵਰੇਜ ਦਾ ਕੰਮ ਮੁਕੰਮਲ ਹੋਣ ਤੇ ਸੜਕ ਪਹਿਲਾਂ ਵਾਗ ਚਾਲੂ ਹੋਵੇਗੀ | ਉਨ੍ਹਾਂ ਭੁਲੱਥ ਇਲਾਕੇ ਦੇ ਲੋਕਾਂ ਨੂੰ ਬੇਨਤੀ ਕੀਤੀ ਲੋਕ ਹੁਣ ਮੁੱਖ ਮਾਰਗ ਕਰਤਾਰਪੁਰ ਪਹੁੰਚਣ ਲਈ ਛੋਟੇ ਵਾਹਨ ਭੁਲੱਥ ਤੋਂ ਹਮੀਰਾ ਮੇਨ ਸੜਕ ਦਾ ਰੂਟ ਅਪਣਾਉਣ ਜਦ ਕਿ ਵੱਡੇ ਵਾਹਨ ਨਡਾਲਾ-ਸੁਭਾਨਪੁਰ ਰੋਡ ਦਾ ਰੂਟ ਅਪਣਾਉਣ | ਉਨ੍ਹਾਂ ਦੱਸਿਆ ਕਿ ਕਰਤਾਰਪੁਰ-ਭੁਲੱਥ ਰੋਡ ਤੇ ਨਾਲਾ ਤੱਕ ਰੋਡ ਚੱਲਦਾ ਰਹੇਗਾ | ਉਨ੍ਹਾਂ ਨੇ ਸਮੂਹ ਯਾਤਰੀਆਂ ਅਤੇ ਸਥਾਨਕ ਨਿਵਾਸੀਆਂ ਨੂੰ ਬੇਨਤੀ ਕਰਦੇ ਹੋਏ ਕਰਦੇ ਕਿਹਾ ਕਿ ਉਪਰੋਕਤ ਡਾਈਵਰਸਨ ਰੂਟ ਦੀ ਪਾਲਣਾ ਕਰਦੇ ਹੋਏ ਸਹਿਯੋਗ ਦੇਣ |
