ਵਾਈਟ ਹਾਊਸ 'ਚ ਟਰੰਪ ਦੀ ਈਰਾਨ ਸੰਬੰਧੀ ਬੈਠਕ ਬੇਨਤੀਜਾ <br/>

ਨਹੀਂ ਹੋ ਸਕਿਆ ਕੋਈ ਫ਼ੈਸਲਾ ਜਾਂ ਸਮਝੌਤਾ
ਵਾਸ਼ਿੰਗਟਨ, 30 ਮਈ (ਏਜੰਸੀ)-ਅਮਰੀਕਾ ਅਤੇ ਈਰਾਨ ਸਮਝੌਤੇ ਨੂੰ ਲੈ ਕੇ ਹੋਈ ਵਾਸ਼ਿੰਗਟਨ 'ਚ ਉੱਚ ਪੱਧਰੀ ਮੀਟਿੰਗ ਬੇਨਤੀਜਾ ਰਹੀ | ਇਸ ਮੀਟਿੰਗ ਵਿਚ ਖਾੜੀ 'ਚ ਚੱਲ ਰਹੀ ਜੰਗ ਸੰਬੰਧੀ ਗੱਲਬਾਤ ਹੋਈ ਅਤੇ ਆਖ਼ਰੀ ਫ਼ੈਸਲੇ ਦਾ ਭਰੋਸਾ ਦਿੱਤਾ ਗਿਆ ਪਰ ਇਹ ਬੈਠਕ ਬਿਨਾਂ ਕਿਸੇ ਫ਼ੈਸਲੇ ਜਾਂ ਸਮਝੌਤੇ ਦੇ ਹੀ ਖ਼ਤਮ ਹੋ ਗਈ | ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵਾਈਟ ਹਾਊਸ ਦੇ ਸਿਚੂਏਸ਼ਨ ਰੂਮ ਵਿਚ ਆਪਣੇ ਸਲਾਹਕਾਰਾਂ ਨਾਲ ਇੱਕ ਅਹਿਮ ਮੀਟਿੰਗ ਕੀਤੀ, ਪਰ ਈਰਾਨ ਨਾਲ ਜੰਗਬੰਦੀ ਵਧਾਉਣ ਅਤੇ ਹੋਰਮੁਜ਼ ਦੀ ਜਲਮਾਰਗ ਨੂੰ ਮੁੜ ਖੋਲ੍ਹਣ ਦੇ ਸਮਝੌਤੇ ਬਾਰੇ ਅਜੇ ਕੋਈ ਅੰਤਿਮ ਫ਼ੈਸਲਾ ਨਹੀਂ ਲਿਆ ਗਿਆ ਹੈ | ਇੱਕ ਸੀਨੀਅਰ ਪ੍ਰਸ਼ਾਸਨਿਕ ਅਧਿਕਾਰੀ ਨੇ ਦੱਸਿਆ ਕਿ ਦੋ ਘੰਟੇ ਚੱਲੀ ਇਸ ਮੀਟਿੰਗ ਵਿਚ ਕੋਈ ਸਹਿਮਤੀ ਨਹੀਂ ਬਣੀ | ਟਰੰਪ ਸਿਰਫ਼ ਅਜਿਹੇ ਸਮਝੌਤੇ 'ਤੇ ਦਸਤਖ਼ਤ ਕਰਨਾ ਚਾਹੁੰਦੇ ਹਨ ਜੋ ਉਨ੍ਹਾਂ ਦੀਆਂ 'ਰੈੱਡ ਲਾਈਨਾਂ' (ਸ਼ਰਤਾਂ) ਨੂੰ ਪੂਰਾ ਕਰੇ ਅਤੇ ਈਰਾਨ ਦੀਆਂ ਪ੍ਰਮਾਣੂ ਇੱਛਾਵਾਂ ਨੂੰ ਰੋਕੇ | ਟਰੰਪ ਨੇ ਸੋਸ਼ਲ ਮੀਡੀਆ 'ਤੇ ਲਿਖਿਆ ਕਿ ਈਰਾਨ ਨੂੰ ਸਹਿਮਤ ਹੋਣਾ ਚਾਹੀਦਾ ਹੈ ਕਿ ਉਨ੍ਹਾਂ ਕੋਲ ਕਦੇ ਵੀ ਪ੍ਰਮਾਣੂ ਹਥਿਆਰ ਨਹੀਂ ਹੋਣਗੇ ਅਤੇ ਹੋਰਮੁਜ਼ ਦੀ ਜਲਮਾਰਗ ਨੂੰ ਅੰਤਰਰਾਸ਼ਟਰੀ ਆਵਾਜਾਈ ਲਈ ਮੁੜ ਖੋਲਿ੍ਹਆ ਜਾਣਾ ਚਾਹੀਦਾ ਹੈ | ਦੂਜੇ ਪਾਸੇ ਈਰਾਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਇਸਮਾਈਲ ਬਘਾਈ ਨੇ ਕਿਹਾ ਕਿ ਸਮਝੌਤਾ ਅਜੇ ਅੰਤਿਮ ਨਹੀਂ ਹੋਇਆ ਹੈ | ਈਰਾਨ ਦੇ ਮੁੱਖ ਵਾਰਤਾਕਾਰ ਮੁਹੰਮਦ ਬਘੇਰ ਕਾਲੀਬਾਫ ਨੇ ਸਪਸ਼ਟ ਕੀਤਾ ਕਿ ਅਸੀਂ ਗੱਲਬਾਤ ਰਾਹੀਂ ਨਹੀਂ, ਸਗੋਂ ਮਿਜ਼ਾਈਲਾਂ ਰਾਹੀਂ ਰਿਆਇਤਾਂ ਹਾਸਲ ਕਰਦੇ ਹਾਂ | ਪ੍ਰਸਤਾਵਿਤ ਸਮਝੌਤੇ ਅਨੁਸਾਰ ਈਰਾਨ ਹੋਰਮੁਜ਼ ਜਲਮਾਰਗ 'ਤੇ ਕੋਈ ਟੋਲ ਨਹੀਂ ਲਗਾ ਸਕੇਗਾ ਅਤੇ 30 ਦਿਨਾਂ ਦੇ ਅੰਦਰ ਸਾਰੀਆਂ ਸਮੁੰਦਰੀ ਬਾਰੂਦੀ ਸੁਰੰਗਾਂ ਨੂੰ ਹਟਾਉਣਾ ਹੋਵੇਗਾ | ਬਦਲੇ ਵਿਚ ਅਮਰੀਕਾ ਈਰਾਨੀ ਬੰਦਰਗਾਹਾਂ 'ਤੇ ਆਪਣੀ ਨਾਕਾਬੰਦੀ ਹਟਾ ਦੇਵੇਗਾ ਅਤੇ ਪਾਬੰਦੀਆਂ ਵਿਚ ਢਿੱਲ ਦੇਵੇਗਾ ਤਾਂ ਜੋ ਈਰਾਨ ਆਪਣਾ ਤੇਲ ਵੇਚ ਸਕੇ | ਈਰਾਨ ਚਾਹੁੰਦਾ ਹੈ ਕਿ ਕਿਸੇ ਵੀ ਸੌਦੇ ਵਿਚ ਲਿਬਨਾਨ 'ਚ ਇਜ਼ਰਾਈਲ ਅਤੇ ਹਿਜ਼ਬੁੱਲਾ ਵਿਚਕਾਰ ਜੰਗਬੰਦੀ ਸ਼ਾਮਿਲ ਹੋਵੇ ਅਤੇ ਉਸਦੇ ਜੰਮੇ ਹੋਏ ਅਰਬਾਂ ਡਾਲਰ ਦੇ ਫ਼ੰਡ ਜਾਰੀ ਕੀਤੇ ਜਾਣ | ਅੰਤਰਰਾਸ਼ਟਰੀ ਪ੍ਰਮਾਣੂ ਊਰਜਾ ਏਜੰਸੀ (ਆਈ.ਏ.ਈ.ਏ) ਦੇ ਅਨੁਸਾਰ ਈਰਾਨ ਕੋਲ 440.9 ਕਿੱਲੋਗਰਾਮ ਯੂਰੇਨੀਅਮ ਹੈ ਜੋ 60-ਫ਼ੀਸਦੀ ਸ਼ੁੱਧਤਾ ਤੱਕ ਸੋਧਿਆ ਹੋਇਆ ਹੈ, ਜੋ ਕਿ ਹਥਿਆਰ-ਗ੍ਰੇਡ ਪੱਧਰ ਦੇ ਬਹੁਤ ਨੇੜੇ ਹੈ | ਟਰੰਪ ਨੇ ਮੰਗ ਕੀਤੀ ਹੈ ਕਿ ਇਸ ਭੰਡਾਰ ਨੂੰ ਅਮਰੀਕਾ ਅਤੇ ਆਈ.ਏ.ਈ.ਏ ਦੀ ਦੇਖ-ਰੇਖ ਵਿਚ ਕੱਢਿਆ ਜਾਵੇ ਅਤੇ ਨਸ਼ਟ ਕੀਤਾ ਜਾਵੇ | ਹੋਰਮੁਜ਼ ਜਲਮਾਰਗ ਫਰਵਰੀ ਤੋਂ ਬੰਦ ਹੈ, ਜਿਸ ਨਾਲ ਦੁਨੀਆ ਭਰ ਵਿਚ ਤੇਲ ਅਤੇ ਹੋਰ ਜ਼ਰੂਰੀ ਵਸਤੂਆਂ ਦੀਆਂ ਕੀਮਤਾਂ ਅਸਮਾਨੀ ਚੜ੍ਹ ਗਈਆਂ ਹਨ | ਹਾਲਾਂਕਿ ਜੰਗਬੰਦੀ ਦੇ ਬਾਵਜੂਦ ਦੋਵਾਂ ਦੇਸ਼ਾਂ ਵਿਚਕਾਰ ਤਣਾਅ ਬਰਕਰਾਰ ਹੈ, ਪਰ ਉਹ ਪੂਰਨ ਹਿੰਸਾ ਤੋਂ ਬਚ ਕੇ ਗੱਲਬਾਤ ਜਾਰੀ ਰੱਖ ਰਹੇ ਹਨ |