ਮੁਕੇਰੀਆਂ, 15 ਜੂਨ (ਰਾਮਗੜ੍ਹੀਆ)-ਪਿਛਲੇ ਦਿਨੀਂ ਦਿੱਲੀ ਵਿਚ ਹੋਈ ਸ਼ੇਰੂ ਕਲਾਸਿਕ ਚੈਂਪੀਅਨਸ਼ਿਪ 'ਚ ਮੁਕੇਰੀਆਂ ਦੇ ਜਗਜੀਤ ਸਿੰਘ ਜਿਸ ਨੂੰ ਸਭ ਜੱਗੀ ਓਲੰਪੀਅਨ ਦੇ ਨਾਂਅ ਨਾਲ ਜਾਣਦੇ ਹਨ, ਨੇ ਸੋਨ ਤਗਮਾ ਜਿੱਤ ਕੇ ਇਤਿਹਾਸ ਰਚਿਆ ਹੈ | ਜਗਜੀਤ ਸਿੰਘ ਦੀ ਇਸ ਉਪਲਬਧੀ ਨਾਲ ਮੁਕੇਰੀਆਂ ਸ਼ਹਿਰ ਦਾ ਨਾਂਅ ਪੂਰੇ ਪੰਜਾਬ 'ਚ ਉੱਚਾ ਹੋਇਆ ਹੈ | ਇਥੇ ਜ਼ਿਕਰਯੋਗ ਹੈ ਕਿ ਜਗਜੀਤ ਸਿੰਘ ਇਕ ਗ਼ਰੀਬ ਘਰ ਤੋਂ ਉਠਿਆ ਨੌਜਵਾਨ ਹੈ, ਜਿਸ ਨੇ ਆਪਣੀ ਅਣਥੱਕ ਮਿਹਨਤ ਸਦਕਾ ਵਧੀਆ ਸਰੀਰ ਤਿਆਰ ਕੀਤਾ ਹੈ | ਜਗਜੀਤ ਸਿੰਘ ਇਸ ਸਮੇਂ ਕਈ ਨੌਜਵਾਨਾਂ ਨੂੰ ਬਾਡੀ ਬਿਲਡਰ ਦੀ ਕੋਚਿੰਗ ਵੀ ਦੇ ਰਿਹਾ ਹੈ | ਗੱਲਬਾਤ ਦੌਰਾਨ ਜਗਜੀਤ ਸਿੰਘ ਨੇ ਦੱਸਿਆ ਕਿ ਇਹ ਮੈਡਲ ਉਨ੍ਹਾਂ ਵਰਲਡ ਰਿਕਾਰਡ ਹੋਲਡਰ ਕੋਚ ਅਮਨ ਓਲੰਪੀਅਨ ਦੀ ਰਹਿਨੁਮਾਈ ਹੇਠ ਹਾਸਿਲ ਕੀਤਾ ਹੈ | ਜਗਜੀਤ ਸਿੰਘ ਨੇ ਕਿਹਾ ਕਿ ਉਹ ਅਗਾਂਹ ਤੋਂ ਆਪਣੀ ਮਿਹਨਤ ਇਸੇ ਤਰ੍ਹਾਂ ਜਾਰੀ ਰੱਖਦੇ ਹੋਏ ਹੋਰ ਵੀ ਕਈ ਮੈਡਮ ਹਾਸਿਲ ਕਰਨਗੇ | ਉਨ੍ਹਾਂ ਨੌਜਵਾਨਾਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਪੜ੍ਹਾਈ ਦੇ ਨਾਲ-ਨਾਲ ਆਪਣੀ ਸਿਹਤ ਵੱਲ ਖ਼ਾਸ ਧਿਆਨ ਦੇਣ ਕਿਉਂਕਿ ਦੁਨੀਆਂ 'ਤੇ ਹਰ ਚੀਜ਼ ਖ਼ਰੀਦੀ ਜਾ ਸਕਦੀ ਹੈ ਪਰ ਚੰਗੀ ਸਿਹਤ ਨਹੀਂ |
