ਸਾਲੇ ਤੇ ਸੱਸ ਨਾਲ ਝਗੜੇ ਕਾਰਨ ਨਹਿਰ 'ਚ ਛਾਲ ਮਾਰ ਕੀਤੀ ਖੁਦਕੁਸ਼ੀ
ਅਜੀਤ ਡੈਸਕ
12-06-2026
ਪੁਲਿਸ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਮਿ੍ਤਕ ਦੇ ਪਿਤਾ ਸੁਰੇਸ਼ ਚੌਹਾਨ ਪੁੱਤਰ ਅਮਰ ਚੌਹਾਨ ਵਾਸੀ ਪਿੰਡ ਦਾਲੋਮਾਜਰਾ ਥਾਣਾ ਸਰਹਿੰਦ ਨੇ ਪੁਲਿਸ ਕੋਲ ਬਿਆਨ ਦਰਜ਼ ਕਰਵਾਏ ਉਸ ਦੇ ਲੜਕੇ ਜੋਗਿੰਦਰ ਚੌਹਾਨ ਜੋ ਕਿ ਪਿੰਡ ਸਾਧੂਗੜ੍ਹ ਵਿਖੇ ਕੋਕਾ ਕੋਲਾ ਫ਼ੈਕਟਰੀ 'ਚ ਕੰਮ ਕਰਦਾ ਸੀ ਤੇ ਉਹ ਰਮਨਦੀਪ ਕੌਰ ਪੱੁਤਰੀ ਲੇਟ ਰਾਜ ਕੁਮਾਰ ਉਰਫ਼ ਰਾਜੂ ਵਾਸੀ ਰਾਮ ਨਗਰ ਬਸਤੀ, ਸੰਗਰੂਰ ਨਾਲ ਵਿਆਹਿਆ ਹੋਇਆ ਸੀ, ਸੰਨ 2009 ਤੋਂ ਬਾਅਦ ਉਹ ਆਪਣੇ ਪਰਿਵਾਰ ਨਾਲ ਬ੍ਰਾਹਮਣ ਮਾਜਰਾ ਸਰਹਿੰਦ ਵਿਖੇ ਰਹਿਣ ਲੱਗ ਪਿਆ ਤੇ ਉਸ ਦੇ ਨਾਲ ਉਸ ਦਾ ਸਾਲਾ ਗੁਰਪ੍ਰੀਤ ਸਿੰਘ ਤੇ ਸੱਸ ਸੋਮਾ ਵੀ ਰਹਿਣ ਲੱਗ ਪਏ ਸਨ | ਉਨ੍ਹਾਂ ਕਿਹਾ ਕਿ ਜੋਗਿੰਦਰ ਚੌਹਾਨ ਨੇ ਆਪਣੇ ਸਾਲੇ ਗੁਰਪ੍ਰੀਤ ਸਿੰਘ ਦੇ ਵਿਆਹ ਲਈ ਆਪਣੀ ਸੱਸ ਸੋਮਾ ਦੇ ਕਹਿਣ 'ਤੇ ਆਪਣੇ ਨਾਮ 'ਤੇ 2 ਲੱਖ ਰੁਪਏ ਕਰਜ਼ਾ ਲੈ ਕੇ ਦਿੱਤੇ ਸਨ, ਜਿਸ ਦਾ ਉਸ ਦੁਆਰਾ ਪਰਨੋਟ ਵੀ ਤਿਆਰ ਕੀਤਾ ਗਿਆ ਸੀ, ਪਰ ਕੁਝ ਸਮੇਂ ਬਾਅਦ ਹੀ ਗੁਰਪ੍ਰੀਤ ਸਿੰਘ ਤੇ ਸੋਮਾ ਰਾਣੀ ਨੇ ਕਰਜ਼ ਦੀਆਂ ਕਿਸ਼ਤਾਂ ਭਰਨੀਆਂ ਬੰਦ ਕਰ ਦਿੱਤੀਆਂ ਤੇ ਜੋਗਿੰਦਰ ਚੌਹਾਨ ਨਾਲ ਉਨ੍ਹਾਂ ਦਾ ਅਕਸਰ ਲੜਾਈ ਝਗੜਾ ਰਹਿਣ ਲੱਗ ਪਿਆ | ਜਿਸ ਦੇ ਚੱਲਦਿਆਂ 6 ਜੂਨ ਨੂੰ ਸ਼ਿਕਾਇਤ ਕਰਤਾ ਦਾ ਲੜਕਾ ਘਰੋਂ ਬਿਨਾਂ ਦੱਸੇ ਚਲਾ ਗਿਆ, ਜਿਸ ਸਬੰਧੀ ਉਸ ਦੀ ਨੂੰਹ ਰਮਨਦੀਪ ਕੌਰ ਦਾ ਫ਼ੋਨ ਆਇਆ ਕਿ ਇਸ ਦਿਨ ਵੀ ਗੁਰਪ੍ਰੀਤ ਸਿੰਘ ਤੇ ਮੇਰੀ ਮਾਤਾ ਸੋਮਾ ਨੇ ਕਥਿਤ ਜੋਗਿੰਦਰ ਚੌਹਾਨ ਨਾਲ ਲੜਾਈ ਝਗੜਾ ਕੀਤਾ ਸੀ, ਜਿਸ 'ਤੇ ਉਹ ਆਪਣੇ ਪਰਿਵਾਰ ਨਾਲ ਜੋਗਿੰਦਰ ਚੌਹਾਨ ਨੂੰ ਲੱਭਣ ਲੱਗ ਪਿਆ ਤੇ ਉਨ੍ਹਾਂ ਨੂੰ ਆਦਮਪੁਰ ਨਹਿਰ ਪੁਲ ਕੋਲ ਇਕ ਸਾਈਕਲ ਡਿੱਗਿਆ ਮਿਲਿਆ ਤੇ ਨਾਲ ਇਕ ਟੀ-ਸ਼ਰਟ ਤੇ ਇਕ ਪੇਪਰ ਲਿਖਿਆ ਮਿਲਿਆ, ਜਿਸ ਸਬੰਧੀ ਉਨ੍ਹਾਂ ਦੁਆਰਾ ਥਾਣਾ ਸਰਹਿੰਦ ਵਿਖੇ ਜੋਗਿੰਦਰ ਚੌਹਾਨ ਦੀ ਗੁੰਮਸ਼ੁਦਗੀ ਦੀ ਰਿਪੋਰਟ ਲਿਖਵਾਈ ਗਈ ਤੇ ਕੁਝ ਦਿਨ ਬਾਅਦ ਮੇਰੇ ਲੜਕੇ ਜੋਗਿੰਦਰ ਚੌਹਾਨ ਦੀ ਮਿ੍ਤਕ ਦੇਹ ਪਿੰਡ ਜੈ ਨਗਰ ਵਿਖੇ ਚੱਲਦੀ ਨਹਿਰ 'ਚੋਂ ਮਿਲੀ | ਜਿਸ ਨੂੰ ਪੁਲਿਸ ਦੁਆਰਾ ਸਿਵਲ ਹਸਪਤਾਲ ਫ਼ਤਹਿਗੜ੍ਹ ਸਾਹਿਬ ਵਿਖੇ ਮੋਰਚਰੀ 'ਚ ਰਖਵਾ ਦਿੱਤਾ ਗਿਆ ਹੈ ਤੇ ਪੁਲਿਸ ਦੁਆਰਾ ਮਿ੍ਤਕ ਦੇ ਸਾਲੇ ਗੁਰਪ੍ਰੀਤ ਸਿੰਘ ਤੇ ਸੱਸ ਸੋਮਾ 'ਤੇ ਕਥਿਤ ਬਣਦੀ ਕਾਰਵਾਈ ਕੀਤੀ ਜਾ ਰਹੀ ਹੈ |
