ਈਰਾਨ-ਅਮਰੀਕਾ ਸਮਝੌਤੇ ਦੀ ਆਸ ਨਾਲ ਬਾਜ਼ਾਰਾਂ ਵਿਚ ਰੌਣਕ

ਬਾਸਮਤੀ ਨੂੰ ਮਿਲ ਸਕਦਾ ਹੈ ਵੱਡਾ ਸਹਾਰਾ, ਤੇਲ ਸਸਤਾ ਤੇ ਰੁਪਇਆ ਮਜ਼ਬੂਤ
ਕੇਵਲ ਸਿੰਗਲਾ
ਮੂਨਕ, 15 ਜੂਨ-ਈਰਾਨ ਤੇ ਅਮਰੀਕਾ ਵਿਚਾਲੇ ਲੰਬੇ ਸਮੇਂ ਤੋਂ ਚੱਲ ਰਹੇ ਕੂਟਨੀਤਕ ਅਤੇ ਆਰਥਿਕ ਵਿਵਾਦ ਨੂੰ ਖ਼ਤਮ ਕਰਨ ਵੱਲ ਇੱਕ ਮਹੱਤਵਪੂਰਨ ਕਦਮ ਉਸ ਵੇਲੇ ਸਾਹਮਣੇ ਆਇਆ ਜਦੋਂ ਦੋਵੇਂ ਦੇਸ਼ਾਂ ਨੇ ਇੱਕ ਪ੍ਰਸਤਾਵਿਤ ਡਰਾਫਟ 'ਤੇ ਸਹਿਮਤੀ ਪ੍ਰਗਟਾਈ | ਭਾਵੇਂ ਅੰਤਿਮ ਦਸਤਖ਼ਤ 19 ਜੂਨ ਨੂੰ ਹੋਣੇ ਹਨ ਅਤੇ ਅਸਲ ਨਤੀਜੇ ਉਸ ਤੋਂ ਬਾਅਦ ਹੀ ਸਾਹਮਣੇ ਆਉਣਗੇ, ਪਰ ਇਸ ਖ਼ਬਰ ਨੇ ਵਿਸ਼ਵ ਬਾਜ਼ਾਰਾਂ ਸਮੇਤ ਭਾਰਤ ਦੀ ਅਰਥਵਿਵਸਥਾ ਵਿਚ ਵੀ ਨਵੀਂ ਆਸ ਪੈਦਾ ਕਰ ਦਿੱਤੀ ਹੈ | ਇਸ ਸੰਭਾਵਿਤ ਸਮਝੌਤੇ ਦਾ ਸਭ ਤੋਂ ਵੱਡਾ ਪ੍ਰਭਾਵ ਭਾਰਤੀ ਬਾਸਮਤੀ ਚੌਲਾਂ ਦੇ ਨਿਰਯਾਤ, ਕੱਚੇ ਤੇਲ ਦੀਆਂ ਕੀਮਤਾਂ, ਸ਼ੇਅਰ ਬਾਜ਼ਾਰ, ਰੁਪਏ ਦੀ ਮਜ਼ਬੂਤੀ ਤੇ ਨਿਵੇਸ਼ਕਾਂ ਦੇ ਭਰੋਸੇ 'ਤੇ ਪੈਣ ਦੀ ਉਮੀਦ ਜਤਾਈ ਜਾ ਰਹੀ ਹੈ |
• ਬਾਸਮਤੀ ਨਿਰਯਾਤ ਲਈ ਖੁੱਲ ਸਕਦੇ ਹਨ ਨਵੇਂ ਰਾਹ- ਈਰਾਨ ਭਾਰਤੀ ਬਾਸਮਤੀ ਚੌਲਾਂ ਦਾ ਇੱਕ ਪ੍ਰਮੁੱਖ ਖ਼ਰੀਦਦਾਰ ਰਿਹਾ ਹੈ | ਪਿਛਲੇ ਮਹੀਨਿਆਂ ਦੌਰਾਨ ਖੇਤਰੀ ਤਣਾਅ, ਭੁਗਤਾਨ ਸੰਬੰਧੀ ਮੁਸ਼ਕਿਲਾਂ, ਸਮੁੰਦਰੀ ਆਵਾਜਾਈ ਦੀਆਂ ਰੁਕਾਵਟਾਂ ਤੇ ਵਪਾਰਕ ਅਨਿਸ਼ਚਿਤਤਾ ਕਾਰਨ ਬਾਸਮਤੀ ਨਿਰਯਾਤ ਪ੍ਰਭਾਵਿਤ ਹੋਇਆ ਸੀ | ਇਸ ਦਾ ਸਿੱਧਾ ਅਸਰ ਪੰਜਾਬ, ਹਰਿਆਣਾ ਅਤੇ ਉੱਤਰ ਪ੍ਰਦੇਸ਼ ਦੀਆਂ ਮੰਡੀਆਂ ਵਿਚ ਵੇਖਣ ਨੂੰ ਮਿਲਿਆ, ਜਿੱਥੇ ਬਾਸਮਤੀ ਦੇ ਭਾਅ ਦਬਾਅ ਹੇਠ ਰਹੇ | ਹੁਣ ਜੇਕਰ 19 ਜੂਨ ਨੂੰ ਸਮਝੌਤਾ ਸਫਲਤਾਪੂਰਵਕ ਅਮਲ ਵਿਚ ਆ ਜਾਂਦਾ ਹੈ ਤਾਂ ਈਰਾਨੀ ਬਾਜ਼ਾਰ ਮੁੜ ਪੂਰੀ ਤਰ੍ਹਾਂ ਖੁੱਲ ਸਕਦਾ ਹੈ | ਇਸ ਨਾਲ ਫਸੇ ਹੋਏ ਆਰਡਰ ਰਿਲੀਜ਼ ਹੋਣ, ਨਵੇਂ ਨਿਰਯਾਤ ਸਮਝੌਤੇ ਹੋਣ ਤੇ ਬਾਸਮਤੀ ਦੀ ਮੰਗ ਵਿਚ ਵਾਧਾ ਹੋਣ ਦੀ ਸੰਭਾਵਨਾ ਹੈ | ਵਪਾਰਕ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਨਾਲ ਆਉਣ ਵਾਲੇ ਮਹੀਨਿਆਂ ਵਿਚ ਬਾਸਮਤੀ ਦੇ ਭਾਅ ਨੂੰ ਮਜ਼ਬੂਤੀ ਮਿਲ ਸਕਦੀ ਹੈ |
ਸ਼ੇਅਰ ਬਾਜ਼ਾਰ ਵਿਚ ਵਾਪਸ ਆਇਆ ਭਰੋਸਾ- ਸਮਝੌਤੇ ਦੀ ਸੰਭਾਵਨਾ ਨੇ ਨਿਵੇਸ਼ਕਾਂ ਦੇ ਮਨ ਵਿਚ ਵਿਸ਼ਵਾਸ ਪੈਦਾ ਕੀਤਾ ਹੈ | ਵਿਸ਼ਵ ਪੱਧਰ 'ਤੇ ਜੰਗੀ ਖ਼ਤਰੇ ਘਟਣ ਦੀ ਉਮੀਦ ਕਾਰਨ ਸ਼ੇਅਰ ਬਾਜ਼ਾਰਾਂ ਵਿਚ ਖ਼ਰੀਦਦਾਰੀ ਵਧੀ ਹੈ | ਭਾਰਤੀ ਸ਼ੇਅਰ ਬਾਜ਼ਾਰ ਵਿਚ ਵੀ ਨਿਵੇਸ਼ਕਾਂ ਨੇ ਇਸ ਨੂੰ ਸਕਾਰਾਤਮਕ ਸੰਕੇਤ ਵਜੋਂ ਲਿਆ ਹੈ | ਖ਼ਾਸ ਕਰਕੇ ਨਿਰਯਾਤ, ਬੈਂਕਿੰਗ, ਆਵਾਜਾਈ ਤੇ ਖੇਤੀਬਾੜੀ ਨਾਲ ਜੁੜੀਆਂ ਕੰਪਨੀਆਂ ਦੇ ਸ਼ੇਅਰਾਂ ਵਿਚ ਦਿਲਚਸਪੀ ਵਧੀ ਹੈ |
• ਕੱਚੇ ਤੇਲ ਦੀਆਂ ਕੀਮਤਾਂ ਤਿੰਨ ਮਹੀਨਿਆਂ ਦੇ ਹੇਠਲੇ ਪੱਧਰ 'ਤੇ- ਈਰਾਨ ਵਿਸ਼ਵ ਦੇ ਮਹੱਤਵਪੂਰਨ ਤੇਲ ਉਤਪਾਦਕ ਦੇਸ਼ਾਂ ਵਿਚੋਂ ਇੱਕ ਹੈ | ਜਿਵੇਂ ਹੀ ਬਾਜ਼ਾਰਾਂ ਨੂੰ ਸੰਕੇਤ ਮਿਲਿਆ ਕਿ ਤਣਾਅ ਘੱਟ ਸਕਦਾ ਹੈ ਤੇ ਤੇਲ ਸਪਲਾਈ ਵਿਚ ਸੁਧਾਰ ਆ ਸਕਦਾ ਹੈ, ਕੱਚੇ ਤੇਲ ਦੀਆਂ ਕੀਮਤਾਂ ਵਿਚ ਨਰਮੀ ਦੇਖਣ ਨੂੰ ਮਿਲੀ | ਮਾਹਿਰਾਂ ਦਾ ਕਹਿਣਾ ਹੈ ਕਿ ਜੇਕਰ ਤੇਲ ਦੀਆਂ ਕੀਮਤਾਂ ਲੰਬੇ ਸਮੇਂ ਲਈ ਹੇਠਾਂ ਰਹਿੰਦੀਆਂ ਹਨ ਤਾਂ ਭਾਰਤ ਨੂੰ ਵੱਡਾ ਫ਼ਾਇਦਾ ਹੋ ਸਕਦਾ ਹੈ ਕਿਉਂਕਿ ਦੇਸ਼ ਆਪਣੀ ਲੋੜ ਦਾ ਵੱਡਾ ਹਿੱਸਾ ਆਯਾਤ ਕਰਦਾ ਹੈ | ਇਸ ਨਾਲ ਪੈਟਰੋਲ, ਡੀਜ਼ਲ ਤੇ ਆਵਾਜਾਈ ਖਰਚੇ 'ਤੇ ਵੀ ਸਕਾਰਾਤਮਕ ਪ੍ਰਭਾਵ ਪੈ ਸਕਦਾ ਹੈ |
• ਰੁਪਏ ਨੂੰ ਮਿਲੀ ਮਜ਼ਬੂਤੀ- ਵਿਦੇਸ਼ੀ ਨਿਵੇਸ਼ਕਾਂ ਦੇ ਭਰੋਸੇ ਵਿਚ ਸੁਧਾਰ ਤੇ ਤੇਲ ਦੀਆਂ ਕੀਮਤਾਂ ਵਿਚ ਨਰਮੀ ਕਾਰਨ ਭਾਰਤੀ ਰੁਪਏ ਨੂੰ ਵੀ ਸਹਾਰਾ ਮਿਲਿਆ ਹੈ | ਰੁਪਏ ਦੀ ਮਜ਼ਬੂਤੀ ਨਾਲ ਆਯਾਤ ਖ਼ਰਚ ਘਟ ਸਕਦਾ ਹੈ ਤੇ ਮਹਿੰਗਾਈ ਨੂੰ ਕਾਬੂ ਵਿਚ ਰੱਖਣ ਵਿਚ ਮਦਦ ਮਿਲ ਸਕਦੀ ਹੈ |
• ਸੋਨੇ ਅਤੇ ਚਾਂਦੀ ਵਿਚ ਵੀ ਚਮਕ- ਵਿਸ਼ਵ ਪੱਧਰ 'ਤੇ ਅਨਿਸ਼ਚਿਤਤਾ ਘਟਣ ਦੇ ਬਾਵਜੂਦ ਨਿਵੇਸ਼ਕਾਂ ਨੇ ਸੋਨੇ ਅਤੇ ਚਾਂਦੀ ਵਿਚ ਵੀ ਦਿਲਚਸਪੀ ਦਿਖਾਈ ਹੈ | ਕੀਮਤੀ ਧਾਤਾਂ ਦੀ ਮੰਗ ਬਣੀ ਰਹਿਣ ਕਾਰਨ ਇਨ੍ਹਾਂ ਦੇ ਭਾਅ ਵਿਚ ਚਮਕ ਦੇਖਣ ਨੂੰ ਮਿਲੀ ਹੈ | ਵਿੱਤੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਨਿਵੇਸ਼ਕ ਅਜੇ ਵੀ 19 ਜੂਨ ਦੇ ਅੰਤਿਮ ਨਤੀਜਿਆਂ ਦੀ ਉਡੀਕ ਕਰ ਰਹੇ ਹਨ |