ਰੀਨਾ ਸੋਨੋਵਾਲ ਦੂਰਦਰਸ਼ਨ (ਪ੍ਰੋਗਰਾਮਿੰਗ) ਦੀ ਡਾਇਰੈਕਟਰ ਜਨਰਲ ਨਿਯੁਕਤ

ਨਵੀਂ ਦਿੱਲੀ, 1 ਅਗਸਤ (ਏਜੰਸੀ)-ਸੀਨੀਅਰ ਭਾਰਤੀ ਸੂਚਨਾ ਸੇਵਾ (ਆਈ. ਆਈ. ਐਸ.) ਅਧਿਕਾਰੀ ਰੀਨਾ ਸੋਨੋਵਾਲ ਨੂੰ ਭਾਰਤੀ ਸੂਚਨਾ ਸੇਵਾ ਦੇ ਚੋਣ ਗ੍ਰੇਡ (ਡਾਇਰੈਕਟਰ ਜਨਰਲ ਪੱਧਰ) ਵਿਚ ਤਰੱਕੀ ਦਿੱਤੀ ਗਈ ਹੈ ਅਤੇ ਕੇ. ਸਤੀਸ਼ ਨੰਬੂਦੀਰੀਪਾਦ ਦੀ ਥਾਂ ਦੂਰਦਰਸ਼ਨ (ਪ੍ਰੋਗਰਾਮਿੰਗ) ਦੀ ਡਾਇਰੈਕਟਰ ਜਨਰਲ ਨਿਯੁਕਤ ਕੀਤਾ ਗਿਆ ਹੈ। ਉਹ 11 ਅਗਸਤ ਨੂੰ ਕਾਰਜਭਾਰ ਸੰਭਾਲਣਗੇ। ਇਹ ਨਿਯੁਕਤੀ 29 ਜੁਲਾਈ ਨੂੰ ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲੇ ਦੁਆਰਾ ਜਾਰੀ ਇਕ ਆਦੇਸ਼ ਤੋਂ ਬਾਅਦ ਕੀਤੀ ਗਈ ਹੈ। ਇਸ ਆਦੇਸ਼ ਤਹਿਤ ਵਿਭਾਗੀ ਤਰੱਕੀ ਕਮੇਟੀ (ਡੀ.ਪੀ.ਸੀ.) ਦੀਆਂ ਸਿਫ਼ਾਰਸ਼ਾਂ ਅਤੇ ਅਮਲਾ ਤੇ ਸਿਖਲਾਈ ਵਿਭਾਗ ਦੇ 29 ਜਨਵਰੀ ਦੇ ਦਫ਼ਤਰ ਮੈਮੋਰੰਡਮ ਰਾਹੀਂ ਚੋਣ ਗ੍ਰੇਡ ਵਿਚ ਉਨ੍ਹਾਂ ਦੀ ਸੂਚੀ ਨੂੰ ਪ੍ਰਵਾਨਗੀ ਦਿੱਤੀ ਗਈ ਸੀ। 1994 ਬੈਚ ਦੀ ਆਈ.ਆਈ.ਐਸ. ਅਧਿਕਾਰੀ ਸੋਨੋਵਾਲ ਕੇਂਦਰੀ ਸਕੱਤਰੇਤ ਸੇਵਾ (ਸੀ.ਐਸ.ਐਸ.) ਡੈਪੂਟੇਸ਼ਨ ’ਤੇ ਉੱਚ ਸਿੱਖਿਆ ਮੰਤਰਾਲੇ ਵਿਚ ਸੰਯੁਕਤ ਸਕੱਤਰ ਵਜੋਂ ਸੇਵਾ ਨਿਭਾ ਰਹੀ ਸੀ।