ਮੰਡੀ ਗੌਬਿੰਦਗੜ, 27 ਜੂਨ (ਮੋਹਿਤ ਸਿੰਗਲਾ)- ਦੂਜਿਆਂ ਦੇ ਨਾਮ ’ਤੇ ਫਰਜ਼ੀ ਤਰੀਕੇ ਨਾਲ ਜਾਰੀ ਕੀਤੇ ਗਏ ਸਿਮ ਕਾਰਡਾਂ ਦੀ ਵਰਤੋਂ ਨੂੰ ਰੋਕਣ ਲਈ ਦੂਰਸੰਚਾਰ ਕੰਪਨੀਆਂ ਅਤੇ ਕੇਂਦਰੀ ਏਜੰਸੀਆਂ ਵਲੋਂ ਲਗਾਤਾਰ ਕਾਰਵਾਈ ਕੀਤੀ ਜਾ ਰਹੀ ਹੈ। ਹੁਣ ਤੱਕ ਦੇਸ਼ ਭਰ ਵਿਚ 1.96 ਕਰੋੜ ਅਜਿਹੇ ਸਿਮ ਕਾਰਡ ਨੰਬਰ ਬੰਦ ਕੀਤੇ ਜਾ ਚੁੱਕੇ ਹਨ, ਜਿਨ੍ਹਾਂ ਬਾਰੇ ਲੋਕਾਂ ਨੇ ਖੁਦ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਇਹ ਨੰਬਰ ਉਨ੍ਹਾਂ ਦੇ ਨਹੀਂ ਹਨ । ਦੇਸ਼ ਭਰ ਵਿਚ ਇਸ ਵੇਲੇ 4.25 ਲੱਖ ਤੋਂ ਵੱਧ ਸਿਮ ਕਾਰਡਾਂ ਨਾਲ ਸੰਬੰਧਿਤ ਮਾਮਲਿਆਂ ਦੀ ਜਾਂਚ ਜਾਰੀ ਹੈ। ਵਧ ਰਹੇ ਸਾਈਬਰ ਅਪਰਾਧਾਂ ਅਤੇ ਵਿੱਤੀ ਧੋਖਾਧੜੀ ਨੂੰ ਰੋਕਣ ਦੇ ਉਦੇਸ਼ ਨਾਲ ਕੇਂਦਰ ਸਰਕਾਰ ਨੇ ਮਈ 2023 ਵਿਚ ਸੰਚਾਰ ਸਾਥੀ ਪੋਰਟਲ ਦੀ ਸ਼ੁਰੂਆਤ ਕੀਤੀ ਸੀ । ਇਸ ਪੋਰਟਲ ਰਾਹੀਂ ਨਾਗਰਿਕਾਂ ਨੂੰ ਇਹ ਸਹੂਲਤ ਦਿੱਤੀ ਗਈ ਹੈ ਕਿ ਉਹ ਆਪਣੇ ਆਧਾਰ ਨੰਬਰ ਦੀ ਮਦਦ ਨਾਲ ਇਹ ਜਾਂਚ ਕਰ ਸਕਣ ਕਿ ਉਨ੍ਹਾਂ ਦੇ ਨਾਮ ’ਤੇ ਕੁੱਲ ਕਿੰਨੇ ਮੋਬਾਈਲ ਸਿਮ ਕਾਰਡ ਚੱਲ ਰਹੇ ਹਨ । ਇਸ ਦੇ ਨਾਲ ਹੀ, ਜੇਕਰ ਉਨ੍ਹਾਂ ਦੇ ਨਾਮ ’ਤੇ ਕੋਈ ਅਜਿਹਾ ਸਿਮ ਕਾਰਡ ਜਾਰੀ ਹੋਇਆ ਹੋਵੇ ਜਿਸ ਦੀ ਉਹ ਹੁਣ ਵਰਤੋਂ ਨਹੀਂ ਕਰ ਰਹੇ, ਤਾਂ ਉਸ ਸਬੰਧੀ ਵੀ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹਨ। ਦੇਸ਼ ਦੇ 22 ਟੈਲੀਕਾਮ ਸਰਕਲਾਂ ਵਿਚ ਸਿਮ ਕਾਰਡਾਂ ਨਾਲ ਸੰਬੰਧਿਤ ਹੁਣ ਤੱਕ 3.78 ਕਰੋੜ ਤੋਂ ਵੱਧ ਸ਼ਿਕਾਇਤਾਂ ਦਰਜ ਕੀਤੀਆਂ ਜਾ ਚੁੱਕੀਆਂ ਹਨ ।
