ਬਠਿੰਡਾ, 3 ਜੁਲਾਈ (ਅੰਮ੍ਰਿਤਪਾਲ ਸਿੰਘ ਵਲ੍ਹਾਣ)-ਪੰਜਾਬ ਕੇਂਦਰੀ ਯੂਨੀਵਰਸਿਟੀ ਬਠਿੰਡਾ ਨੇ ਨੇਚਰ ਇੰਡੈਕਸ ਇੰਸਟੀਚਿਊਸ਼ਨ ਰੈਂਕਿੰਗ 2026 ਵਿਚ ਭਾਰਤੀ ਅਕਾਦਮਿਕ ਸੰਸਥਾਵਾਂ ਵਿਚੋਂ 119ਵਾਂ ਸਥਾਨ ਪ੍ਰਾਪਤ ਕਰਕੇ ਆਪਣੀ ਖੋਜ ਉੱਤਮਤਾ ਲਈ ਰਾਸ਼ਟਰੀ ਮਾਨਤਾ ਪ੍ਰਾਪਤ ਕੀਤੀ ਹੈ। ਯੂਨੀਵਰਸਿਟੀ ਨੇ 1.78 ਦੇ ਸ਼ੇਅਰ ਸਕੋਰ ਨਾਲ ਨੌ ਖੋਜ ਲੇਖ ਦਰਜ ਕੀਤੇ, ਜੋ ਇਸ ਦੀ ਖੋਜ ਦੀ ਵੱਧਦੀ ਗੁਣਵੱਤਾ ਅਤੇ ਵਿਸ਼ਵਵਿਆਪੀ ਪ੍ਰਭਾਵ ਨੂੰ ਦਰਸਾਉਂਦੇ ਹਨ। ਨੇਚਰ ਇੰਡੈਕਸ ਕੁਦਰਤੀ ਵਿਗਿਆਨ, ਸਿਹਤ ਵਿਗਿਆਨ, ਉਪਯੋਗ ਵਿਗਿਆਨ ਅਤੇ ਸਮਾਜਿਕ ਵਿਗਿਆਨ ਦੇ ਖੇਤਰਾਂ ਵਿਚ ਪ੍ਰਮੁੱਖ ਅੰਤਰਰਾਸ਼ਟਰੀ ਖੋਜ ਰਸਾਲਿਆਂ ਵਿਚ ਪ੍ਰਕਾਸ਼ਿਤ ਖੋਜ ਲੇਖਾਂ ਦੇ ਆਧਾਰ ’ਤੇ ਦੁਨੀਆਂ ਦੇ ਵੱਕਾਰੀ ਖੋਜ ਸੰਸਥਾਵਾਂ ਦਾ ਮੁਲਾਂਕਣ ਕਰਦਾ ਹੈ। ਪੰਜਾਬ ਕੇਂਦਰੀ ਯੂਨੀਵਰਸਿਟੀ ਦੇ ਖੋਜਕਰਤਾਵਾਂ ਨੇ ਆਪਣੀ ਖੋਜ ਐਡਵਾਂਸਡ ਫੰਕਸ਼ਨਲ ਮੈਟੀਰੀਅਲਜ਼, ਐਂਜਵੈਂਡੇ ਕੈਮੀ ਇੰਟਰਨੈਸ਼ਨਲ ਐਡੀਸ਼ਨ, ਇਨਆਰਗੈਨਿਕ ਕੈਮਿਸਟਰੀ, ਜਰਨਲ ਆਫ਼ ਦ ਅਮੈਰੀਕਨ ਕੈਮੀਕਲ ਸੋਸਾਇਟੀ, ਨੇਚਰ ਮੈਡੀਸਨ, ਅਤੇ ਦ ਲੈਂਸੇਟ ਵਰਗੇ ਵੱਕਾਰੀ ਅੰਤਰਰਾਸ਼ਟਰੀ ਰਸਾਲਿਆਂ ਵਿਚ ਪ੍ਰਕਾਸ਼ਿਤ ਕੀਤੀ ਹੈ। ਇਹਨਾਂ ਖੋਜ ਯਤਨਾਂ ਨੇ ਐਡਵਾਂਸਡ ਮੈਟੀਰੀਅਲ ਸਾਇੰਸ, ਟਿਕਾਊ ਰਸਾਇਣ ਵਿਗਿਆਨ, ਨੈਨੋ ਤਕਨਾਲੋਜੀ, ਊਰਜਾ ਸਟੋਰੇਜ, ਕਾਰਬਨ ਡਾਈਆਕਸਾਈਡ ਪਰਿਵਰਤਨ ਅਤੇ ਵਿਸ਼ਵ ਸਿਹਤ ਵਰਗੇ ਮਹੱਤਵਪੂਰਨ ਖੇਤਰਾਂ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ। ਯੂਨੀਵਰਸਿਟੀ ਨੇ ਗਲੋਬਲ ਬਰਡਨ ਆਫ਼ ਡਿਜ਼ੀਜ਼ ਸਟੱਡੀਜ਼ ਵਿਚ ਵੀ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ, ਜਿਸ ਦੇ ਨਤੀਜੇ ਨੇਚਰ ਮੈਡੀਸਨ ਅਤੇ ਦ ਲੈਂਸੇਟ ਵਰਗੇ ਵੱਕਾਰੀ ਰਸਾਲਿਆਂ ਵਿਚ ਪ੍ਰਕਾਸ਼ਿਤ ਹੋਏ ਹਨ। ਇਹ ਪ੍ਰਾਪਤੀ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਪ੍ਰੋ: ਜਸਵਿੰਦਰ ਸਿੰਘ ਭੱਟੀ, ਪ੍ਰੋ: ਐਸ. ਕੇ. ਮਹਾਪਾਤਰਾ, ਪ੍ਰੋ: ਰਾਜਿੰਦਰ ਐਸ. ਧਾਇਲ, ਪ੍ਰੋ: ਬਲਜਿੰਦਰ ਸਿੰਘ, ਪ੍ਰੋ: ਮੁਕੇਸ਼ ਕੁਮਾਰ ਯਾਦਵ, ਡਾ: ਬਾਲਚੰਦਰ ਵੇਲਿੰਗਿੜੀ, ਡਾ: ਮਹਾਂਲਕਸ਼ਮੀ ਅਈਅਰ, ਡਾ: ਅਮਿਤ ਸਿੰਘ ਅਤੇ ਡਾ. ਉੱਜਵਲ ਸ਼ਰਮਾ ਦੇ ਸਮਰਪਿਤ ਯਤਨਾਂ ਦਾ ਨਤੀਜਾ ਹੈ, ਜਿਨ੍ਹਾਂ ਦਾ ਖੋਜ ਕਾਰਜ ਯੂਨੀਵਰਸਿਟੀ ਦੀ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਖੋਜ ਸਾਖ ਨੂੰ ਮਜ਼ਬੂਤ ਕਰਦਾ ਰਹਿੰਦਾ ਹੈ। ਵਾਇਸ-ਚਾਂਸਲਰ ਪ੍ਰੋ: ਰਾਘਵੇਂਦਰ ਪ੍ਰਸਾਦ ਤਿਵਾੜੀ ਨੇ ਕਿਹਾ ਕਿ ਨੇਚਰ ਇੰਡੈਕਸ ਰੈਂਕਿੰਗ ਵਿਚ ਯੂਨੀਵਰਸਿਟੀ ਦਾ ਸ਼ਾਨਦਾਰ ਪ੍ਰਦਰਸ਼ਨ ਗੁਣਵੱਤਾ ਖੋਜ, ਨਵੀਨਤਾ ਅਤੇ ਅੰਤਰਰਾਸ਼ਟਰੀ ਸਹਿਯੋਗ ਪ੍ਰਤੀ ਇਸਦੀ ਦ੍ਰਿੜ੍ਹ ਵਚਨਬੱਧਤਾ ਦਾ ਪ੍ਰਮਾਣ ਹੈ।
