ਨਿਊਯਾਰਕ ’ਚ 69ਵੀਂ ਨੈਸ਼ਨਲ ਪਿਊਰਟੋ ਰੀਕਨ ਡੇ ਪਰੇਡ ਸ਼ਾਨੋ-ਸ਼ੌਕਤ ਨਾਲ ਸਜੀ

ਨਿਊਯਾਰਕ, 15 ਜੂਨ (ਰਾਜੂ ਸਹਿਬਾਜ਼ਪੁਰਾ )-ਅਮਰੀਕਾ ਦੇ ਸਭ ਤੋਂ ਵੱਡੇ ਸੱਭਿਆਚਾਰਕ ਸਮਾਗਮਾਂ ਵਿੱਚੋਂ ਇੱਕ ਨੈਸ਼ਨਲ ਪਿਊਰਟੋ ਰੀਕਨ ਡੇ ਪਰੇਡ ਐਤਵਾਰ ਨੂੰ ਨਿਊਯਾਰਕ ਦੀ ਪ੍ਰਸਿੱਧ ਫਿਫ਼ਥ ਐਵੇਨਿਊ ‘ਤੇ ਸ਼ਾਨਦਾਰ ਢੰਗ ਨਾਲ ਕੱਢੀ ਗਈ। ਇਸ ਮੌਕੇ ਲਗਭਗ 10 ਲੱਖ ਦਰਸ਼ਕਾਂ ਨੇ ਸੜਕਾਂ ਦੇ ਕਿਨਾਰੇ ਖੜ੍ਹ ਕੇ ਪਰੇਡ ਦਾ ਆਨੰਦ ਮਾਣਿਆ, ਜਦਕਿ ਲੱਖਾਂ ਹੋਰ ਲੋਕਾਂ ਨੇ ਟੈਲੀਵਿਜ਼ਨ ਅਤੇ ਆਨਲਾਈਨ ਪ੍ਰਸਾਰਣ ਰਾਹੀਂ ਸਮਾਗਮ ਦੇਖਿਆ। ਇਸ ਸਾਲ ਦੀ ਪਰੇਡ ਰਾਹੀਂ ਦੁਨੀਆ ਭਰ ਵਿੱਚ ਰਹਿੰਦੇ ਪਿਊਰਟੋ ਰੀਕਨ ਭਾਈਚਾਰੇ ਦੇ ਯੋਗਦਾਨ ਅਤੇ ਉਪਲਬਧੀਆਂ ਨੂੰ ਸਨਮਾਨਿਤ ਕੀਤਾ ਗਿਆ। ਮਸ਼ਹੂਰ ਗਾਇਕ ਡੈਡੀ ਯੈਂਕੀ ਨੂੰ ਇਸ ਸਾਲ ਦਾ ਗ੍ਰੈਂਡ ਮਾਰਸ਼ਲ ਬਣਾਇਆ ਗਿਆ, ਜਦਕਿ ਅਦਾਕਾਰ ਐਂਥਨੀ ਰਾਮੋਸ ਵੀ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਇਸ ਤੋਂ ਇਲਾਵਾ ਕਾਂਗਰਸ ਮੈਂਬਰ ਨਿਡੀਆ ਵੈਲਾਜ਼ਕੁਏਜ਼ ਅਤੇ ਜੈਜ਼ ਸੰਗੀਤਕਾਰ ਚਾਰਲੀ ਸੇਪੁਲਵੇਦਾ ਨੂੰ ਜੀਵਨ ਭਰ ਦੀਆਂ ਪ੍ਰਾਪਤੀਆਂ ਲਈ ਸਨਮਾਨਿਤ ਕੀਤਾ ਗਿਆ। ਨਿਊਯਾਰਕ ਦੇ ਮੇਅਰ ਜ਼ੋਹਰਾਨ ਮਮਦਾਨੀ ਵੀ ਪਰੇਡ ਵਿੱਚ ਸ਼ਾਮਲ ਹੋਏ ਅਤੇ ਐਨਬੀਏ ਫਾਈਨਲ ਜਿੱਤਣ ਵਾਲੀ ਨਿਊਯਾਰਕ ਨਿਕਸ ਟੀਮ ਦੀ ਜਰਸੀ ਪਹਿਨ ਕੇ ਲੋਕਾਂ ਦਾ ਧਿਆਨ ਖਿੱਚਿਆ। ਪਰੇਡ ਦੌਰਾਨ ਪਿਊਰਟੋ ਰੀਕਨ ਸੱਭਿਆਚਾਰ, ਸੰਗੀਤ, ਨਾਚ ਅਤੇ ਵਿਰਾਸਤ ਦੀ ਰੰਗ-ਬਿਰੰਗੀ ਝਲਕ ਦੇਖਣ ਨੂੰ ਮਿਲੀ, ਜਿਸ ਨਾਲ ਪੂਰਾ ਮੈਨਹੈਟਨ ਤਿਉਹਾਰੀ ਮਾਹੌਲ ਵਿੱਚ ਰੰਗਿਆ ਨਜ਼ਰ ਆਇਆ।