ਮੈਕਸੀਕੋ ਸਿਟੀ, 1 ਜੁਲਾਈ (ਏਜੰਸੀ)- ਜੂਲੀਅਨ ਕਿਵਨੋਨਸ ਤੇ ਰਾਉਲ ਜਿਮੇਨੇਜ ਨੇ ਪਹਿਲੇ ਅੱਧ ’ਚ 9 ਮਿੰਟ ਦੇ ਅੰਤਰਾਲ ’ਚ ਗੋਲ ਕੀਤੇ, ਜਿਸ ਨਾਲ ਮੈਕਸੀਕੋ ਨੇ ਇਕਵਾਡੋਰ ਨੂੰ 2-0 ਨਾਲ ਹਰਾ ਕੇ ਅੰਤਿਮ 16 ’ਚ ਥਾਂ ਬਣਾਈ ਅਤੇ ਨਾਕਆਊਟ ਪੜਾਅ ’ਚ ਜਿੱਤ ਹਾਸਿਲ ਕਰਨ ਦੇ 40 ਸਾਲ ਦੇ ਸੌਕੇ ਨੂੰ ਖਤਮ ਕੀਤਾ। ਕਿਵਨੋਨਸ ਨੇ 22ਵੇਂ ਮਿੰਟ ’ਚ ਮੈਕਸੀਕੋ ਲਈ ਪਹਿਲਾ ਗੋਲ ਕੀਤਾ, ਜਦੋਂ ਕਿ ਜਿਮੇਨੇਜ ਨੇ 31ਵੇਂ ਮਿੰਟ ’ਚ ਉਸ ਦੀ ਬੜਤ ਦੁਗਣੀ ਕਰ ਦਿੱਤੀ। ਮੈਕਸੀਕੋ ਦੀ ਟੀਮ ਨੇ 1986 ’ਚ ਟੂਰਨਾਮੈਂਟ ਦੀ ਮੇਜ਼ਬਾਨੀ ਕਰਦੇ ਹੋਏ ਰਾਉਂਡ ਆਫ 16 ’ਚ ਬੁਲਗਾਰੀਆ ਨੂੰ ਹਰਾਉਣ ਦੇ ਬਾਅਦ ਤੋਂ ਨਾਕਆਊਟ ਪੜਾਅ ਦਾ ਕੋਈ ਮੈਚ ਨਹੀਂ ਜਿੱਤਿਆ ਸੀ। ਇਸ ਦੇ ਬਾਅਦ ਮੈਕਸੀਕੋ ਨੂੰ 1994, 1998, 2002, 2006, 2010, 2014 ਤੇ 2018 ਦੇ ਵਿਸ਼ਵ ਕੱਪ ’ਚ ਅੰਤਿਮ 16 ’ਚ ਲਗਾਤਾਰ 7 ਵਾਰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਉਹ ਕਤਰ ’ਚ 2022 ’ਚ ਖੇਡੇ ਗਏ ਵਿਸ਼ਵ ਕੱਪ ’ਚ ਗਰੁੱਪ ਪੜਾਅ ਤੋਂ ਹੀ ਬਾਹਰ ਹੋ ਗਿਆ ਸੀ। ਮੈਕਸੀਕੋ ਐਤਵਾਰ ਨੂੰ ਆਪਣੇ ਘਰੇਲੂ ਮੈਦਾਨ ’ਤੇ ਇੰਗਲੈਂਡ ਤੇ ਕਾਂਗੋ ਵਿਚਾਲੇ ਹੋਣ ਵਾਲੇ ਮੈਚ ਦੇ ਜੇਤੂ ਦਾ ਸਾਹਮਣਾ ਕਰੇਗਾ। ਮੌਸਮ ਤੋਂ ਪ੍ਰਭਾਵਿਤ ਹੋਣ ਵਾਲਾ ਇਹ ਟੂਰਨਾਮੈਂਟ ਦਾ ਦੂਸਰਾ ਮੈਚ ਸੀ। ਫਰਾਂਸ ਤੇ ਇਰਾਕ ਵਿਚਾਲੇ 22 ਜੂਨ ਨੂੰ ਫਿਲਾਡੇਲਫਿਆ ’ਚ ਖੇਡੇ ਗਏ ਮੈਚ ਦੌਰਾਨ ਤੂਫਾਨ ਕਾਰਨ ਪਹਿਲੇ ਅੱਧ ਦੇ ਆਖਰ ’ਚ 2 ਘੰਟੇ 11 ਮਿੰਟ ਤੱਕ ਖੇਡ ਨਹੀਂ ਹੋ ਸਕੀ ਸੀ।
