ਲੰਡਨ, 1 ਮਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਬੁੱਧਵਾਰ ਨੂੰ ਉੱਤਰੀ ਲੰਡਨ ਦੇ ਗੋਲਡਰਸ ਗ੍ਰੀਨ ਇਲਾਕੇ ਵਿਚ 2 ਯਹੂਦੀ ਵਿਅਕਤੀਆਂ 'ਤੇ ਚਾਕੂ ਨਾਲ ਹਮਲੇ ਦੇ ਮਾਮਲੇ 'ਚ ਇਕ ਵਿਅਕਤੀ ਨੂੰ ਕਤਲ ਦੀ ਕੋਸ਼ਿਸ਼ ਦੇ ਦੋਸ਼ਾਂ ਹੇਠ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ | 45 ਸਾਲਾ ਏਸਾ ਸੁਲੇਮਾਨ 'ਤੇ 34 ਸਾਲਾ ਸ਼ਲੋਇਮ ਰੈਂਡ ਤੇ 76 ਸਾਲਾ ਮੋਸ਼ੇ ਸ਼ਾਈਨ 'ਤੇ ਹਮਲਾ ਕਰਨ ਦੇ ਦੋਸ਼ ਲਗਾਏ ਗਏ ਹਨ | ਮੈਟੋਰਪੁਲੀਟਨ ਪੁਲਿਸ ਨੇ ਇਸ ਘਟਨਾ ਨੂੰ ਅੱਤਵਾਦੀ ਹਮਲਾ ਕਰਾਰ ਦਿੱਤਾ ਹੈ | ਦੋਵੇਂ ਪੀੜਤਾਂ ਵਿਚੋਂ ਇਕ ਅਜੇ ਵੀ ਹਸਪਤਾਲ ਵਿੱਚ ਜ਼ੇਰੇ ਇਲਾਜ਼ ਹੈ ਜਦ ਕਿ ਦੂਜੇ ਨੂੰ ਛੁੱਟੀ ਦੇ ਦਿੱਤੀ ਗਈ ਹੈ | ਸੁਲੇਮਾਨ 'ਤੇ ਇਸੇ ਦਿਨ ਪਹਿਲਾਂ ਦੱਖਣੀ ਲੰਡਨ ਦੇ ਸਾਊਥਵਰਕ 'ਚ ਇਸਮਾਈਲ ਹੁਸੈਨ 'ਤੇ ਚਾਕੂ ਨਾਲ ਹਮਲਾ ਕਰਕੇ ਕਤਲ ਦੀ ਕੋਸ਼ਿਸ਼ ਕਰਨ ਦਾ ਵੀ ਦੋਸ਼ ਹੈ | ਦੱਸਿਆ ਜਾਂਦਾ ਹੈ ਕਿ ਦੋਵੇਂ ਇਕ-ਦੂਜੇ ਨੂੰ ਕਰੀਬ 20 ਸਾਲਾਂ ਤੋਂ ਜਾਣਦੇ ਸਨ | ਇਸ ਤੋਂ ਇਲਾਵਾ ਉਸ 'ਤੇ ਜਨਤਕ ਸਥਾਨ 'ਤੇ ਚਾਕੂ ਰੱਖਣ ਦਾ ਵੀ ਦੋਸ਼ ਲਗਾਇਆ ਗਿਆ ਹੈ |
