ਜਲੰਧਰ, 23 ਅਪ੍ਰੈਲ (ਐੱਮ. ਐੱਸ. ਲੋਹੀਆ)ਇੰਡੀਅਨ ਮੈਡੀਕਲ ਐਸੋਸੀਏਸ਼ਨ (ਆਈ. ਐੱਮ. ਏ.), ਦੀ ਜ਼ਿਲ੍ਹਾ ਇਕਾਈ ਵਲੋਂ ਆਪਣੇ ਮੈਂਬਰ ਡਾਕਟਰਾਂ ਨੂੰ ਬਿਾਮਰੀਆਂ ਦੇ ਆਧੁਨਿਕ ਇਲਾਜ ਤੇ ਦਵਾਈਆਂ ਬਾਰੇ ਜਾਗਰੂਕ ਕਰਨ ਲਈ ਨਿਰੰਤਰ ਮੈਡੀਕਲ ਸਿੱਖਿਆ (ਸੀ. ਐਮ. ਈ.) ਕਰਵਾਈ ਗਈ, ਜਿਸ ਦੌਰਾਨ ਫੋਰਟਿਸ ਹਸਪਤਾਲ, ਜਲੰਧਰ ਦੇ ਮਾਹਿਰ ਡਾਕਟਰਾਂ ਨੇ ਆਈ. ਐੱਮ. ਏ. ਦੇ ਮੈਂਬਰ ਡਾਕਟਰਾਂ ਨੂੰ 'ਆਟੋਇਮਿਊਨ ਬਿਮਾਰੀਆਂ' ਤੇ 'ਰੋਬੋਟਿਕ ਗੋਡੇ ਬਦਲਣ ਦੀ ਸਰਜਰੀ' ਬਾਰੇ ਜਾਣਕਾਰੀ ਦਿੱਤੀ | ਆਈ. ਐੱਮ. ਏ. ਦੇ ਜ਼ਿਲ੍ਹਾ ਪ੍ਰਧਾਨ ਡਾ. ਧੀਰਜ ਭਾਟੀਆ ਦੀ ਅਗਵਾਈ ਹੇਠ ਕਰਵਾਈ ਸੀ. ਐੱਮ. ਈ. ਦੌਰਾਨ ਫੋਰਟਿਸ ਹਸਪਤਾਲ 'ਚ ਸੇਵਾਵਾਂ ਦੇ ਰਹੇ ਡਾ. ਅੰਕੁਸ਼ ਪੀ. ਐਮ. (ਇਮਯੂਨੋਲੋਜਿਸਟ ਤੇ ਰਾਇਮੈਟੋਲੋਜਿਸਟ) ਨੇ ਜਾਣਕਾਰੀ ਦਿੱਤੀ ਕਿ ਗਠੀਆ, ਜੋੜਾਂ ਤੇ ਪਿੱਠ 'ਚ ਦਰਦ, ਚਮੜੀ 'ਤੇ ਧੱਫ਼ੜ ਅਤੇ ਵਾਰ-ਵਾਰ ਮੂੰਹ ਦੇ ਫੋੜੇ ਆਦਿ ਬਿਮਾਰੀਆਂ, ਆਟੋਇਮਿਊਨ ਬਿਮਾਰੀਆਂ ਵਜੋਂ ਜਾਣੀਆਂ ਜਾਂਦੀਆਂ ਹਨ | ਇਨ੍ਹਾਂ ਦਾ ਜਲਦ ਇਲਾਜ ਨਾ ਕੀਤੇ ਜਾਣ 'ਤੇ ਇਹ ਖ਼ਤਰਨਾਕ ਸਾਬਤ ਹੁੰਦੀਆਂ ਹਨ | ਉਨ੍ਹਾਂ ਵਲੋਂ 'ਆਟੋਇਮਿਊਨ ਬਿਮਾਰੀਆਂ' ਦਾ ਪਤਾ ਲਗਾਉਣ ਲਈ ਲੋੜੀਂਦੇ ਟੈੱਸਟਾਂ ਤੇ ਆਧੁਨਿਕ ਇਲਾਜ ਸੰਬੰਧੀ ਜਾਣਕਾਰੀ ਸਾਂਝੀ ਕੀਤੀ | ਫੋਰਟਿਸ ਹਸਪਤਾਲ ਦੇ ਹੱਡੀਆਂ ਤੇ ਜੋੜ ਬਦਲਣ ਦੇ ਮਾਹਿਰ ਡਾ. ਆਰ. ਆਰ. ਸੱਗੜ ਨੇ ਜਾਣਕਾਰੀ ਸਾਂਝੀ ਕੀਤੀ ਕਿ 'ਰਵਾਇਤੀ ਸਰਜਰੀ ਨਾਲੋਂ ਰੋਬੋਟਿਕ ਗੋਡੇ ਬਦਲਣ ਦੇ ਨਤੀਜੇ ਜ਼ਿਆਦਾ ਸਟੀਕ ਹੁੰਦੇ ਹਨ | ਉਨ੍ਹਾਂ ਰੋਬੋਟਿਕ ਸਰਜਰੀ ਤੇ ਰਵਾਇਤੀ ਸਰਜਰੀ 'ਚ ਅੰਤਰ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਸਾਂਝੀ ਕੀਤੀ ਅਤੇ ਹਾਜ਼ਰ ਡਾਕਟਰਾਂ ਦੇ ਸਵਾਲਾਂ ਦੇ ਜਵਾਬ ਦਿੱਤੇ | ਇਸ ਮੌਕੇ ਡਾ. ਗੁਰਦੇਵ ਸਿੰਘ ਪਰਮਾਰ, ਡਾ. ਵਿਜੇ ਮਹਾਜਨ, ਡਾ. ਸੀ. ਪੀ. ਸਿੱਕਾ, ਡਾ. ਕਪਿਲ ਗੁਪਤਾ, ਡਾ. ਦਿਲਬੰਸ ਸਿੰਘ ਪੰਧੇਰ, ਡਾ. ਵਿਜੇਪਾਲ ਸਿੰਘ ਸਿੱਧੂ ਅਤੇ ਡਾ. ਐੱਚ. ਐਸ. ਓਬਰਾਏ ਤੇ ਹੋਰ ਹਾਜ਼ਰ ਸਨ |
