ਚੂੰਗੜਿਆਂ ਵਿਚ ਭਰੀ ਮੁਹੱਬਤ
ਭਰ ਦੀਵਿਆਂ ਦਾ ਥਾਲ
ਨ੍ਹੇਰੀਆਂ ਨੁੱਕਰਾਂ ਭਾਲ ਤੂੰ
ਮੋਹ ਦੇ ਦੀਵੇ ਬਾਲ।
ਇਕ ਦੀਵਾ ਦੇਹੜੀ 'ਤੇ ਰੱਖੀਂ
ਅੱਖਾਂ ਮੀਚ ਧਿਆਈਂ
ਇੱਜ਼ਤ ਬਣੀ ਰਹੇ ਘਰ ਦੀ
ਥੋੜ ਤੋੜ ਨਾ ਪਾਈਂ
ਰਹੇ ਚਾਨਣ ਤੁਰਦਾ ਨਾਲ...।
ਇਕ ਦੀਵਾ ਪਾਣੀ ਮੁੱਢ ਰੱਖੀਂ
ਕਰਨੀ ਇਕ ਅਰਜੋਈ
ਖੁਆਜਿਆ ਜ਼ਹਿਰਾਂ ਘੋਲਣ ਦੀ
ਸਾਥੋਂ ਬੰਜਰ ਗ਼ਲਤੀ ਹੋਈ
ਅਸੀਂ ਹਾਲੋਂ ਹੋਏ ਬੇਹਾਲ...।
ਇਕ ਦੀਵਾ ਰੁੱਖਾਂ ਮੁੱਢ ਰੱਖੀਂ
ਪੌਣ ਝੁਲਾਉਂਦੀ ਪੱਖੀ
ਜੰਗਲ ਕੱਟੇ, ਲਾਸ਼ ਅਸੀਂ
ਆਪਣੇ ਮੋਢਿਆਂ 'ਤੇ ਰੱਖੀ
ਸਾਹਾਂ ਨੂੰ ਪਿਆ ਜੰਜਾਲ...।
ਇਕ ਦੀਵਾ ਖੇਤਾਂ ਮੁੱਢ ਰੱਖੀਂ
ਫ਼ਸਲ ਮੁੜੇ ਘਰ ਆਵੇ
ਜੰਗ ਜਿੱਤ ਜਾਵੇ ਕਿਸਾਨ
ਗਲੋਂ ਫਾਹੀ ਲੱਥ ਜਾਵੇ
ਤੂੰ ਬਣੀਂ ਅਸਾਡੀ ਢਾਲ...।
ਵੱਡ ਵਡੇਰਿਆਂ ਮੂਹਰੇ ਬਾਲੀਂ
ਇਕ ਦੀਵਾ ਬਾਲੀਂ ਮਦਰੱਸੇ
ਦੀਵਾ ਬਾਲ ਕਿਤਾਬਾਂ ਮੂਹਰੇ
ਸ਼ਬਦ ਮਨਾਂ ਵਿਚ ਵੱਸੇ
ਸੁਲਝਣ ਸਭ ਅੜੇ ਸਵਾਲ...।
ਮੜ੍ਹੀਂ ਮਸਾਣੀਂ ਨਾ ਦੀਵੇ ਬਾਲੀਂ
ਪੁਰਖੇ ਤੇਰੇ ਅੰਦਰ
ਧਰਮ ਕਰਮ ਦੇ ਬਣੇ ਹੋਏ
ਮਨ ਵਿਚ ਮੰਦਰ
ਤੂੰ ਸੰਸਕਾਰਾਂ 'ਚੋਂ ਭਾਲ,
ਮੋਹ ਦੇ ਦੀਵੇ ਬਾਲ।
-ਮੋਬਾਈਲ : 97806-67686
