• ਜਗਤਾਰ ਗਿੱਲ •
ਆਓ ਦੀਵੇ ਬਾਲੀਏ, ਹੋਵੇ ਹਨੇਰਾ ਦੂਰ,
ਚਾਨਣ ਦੇ ਅੱਗੇ ਭੱਜਣਾ, 'ਨੇਰੇ ਦਾ ਦਸਤੂਰ |
ਆਓੋ ਦੀਵੇ ਬਾਲੀਏ, ਘਰ ਘਰ ਹੋਵੇ ਲੋਅ |
ਬਾਹੋਂ ਪਕੜ ਉਠਾਲੀਏ, ਰਹੇ ਜੋ ਹਨੇਰਾ ਢੋਅ |
ਆਓ ਦੀਵੇ ਬਾਲੀਏ, ਅੰਬਰ ਭਰ ਜਾਏ ਨੂਰ,
ਧਰਤੀ ਵੰਡੇ ਬਰਕਤਾਂ, ਅੰਨ ਦਏ ਭਰਪੂਰ |
ਆਓ ਦੀਵੇ ਬਾਲੀਏ, ਮੰਗੀਏੇ ਇਹ ਵਰਦਾਨ,
ਪਰਤ ਆਉਣ ਖੁਸ਼ਹਾਲੀਆਂ, ਹੋਵੇ ਸੌਖੀ ਜਾਨ |
ਆਓ ਦੀਵੇ ਬਾਲੀਏ, ਮਨ ਚੋਂ ਜਾਏ ਹਨੇਰ,
ਇਕ ਗਲਵਕੜੀ ਬੱਝੀਏ, ਰਹੇ ਨਾ ਤੇਰ ਤੇ ਮੇਰ |
ਆਓ ਦੀਵੇ ਬਾਲੀਏ, ਦਰ ਦਰ ਵੰਡੀਏ ਪਿਆਰ,
ਨਫ਼ਰਤ ਵਾਲੇ ਦਿਲਾਂ ਚੋਂ, ਮਿਲਦਾ ਨਾ ਸਤਿਕਾਰ |
ਆਓ ਦੀਵੇ ਬਾਲੀਏ, ਪਿਆਰ ਦਾ ਪਾ ਕੇ ਤੇਲ,
ਰੱਬਾ! ਇਹ ਅਰਦਾਸ ਹੈ, ਵਿਛੜਿਆਂ ਨੂੰ ਮੇਲ |
ਆਓ ਦੀਵੇ ਬਾਲੀਏ, ਮਹਿਕੇ ਚਾਰ ਚੁਫੇਰ |
ਵੱਟੀਏ ਬੱਤੀ ਪਿਆਰ ਦੀ, ਹੋ ਨਾ ਜਾਵੇ ਦੇਰ |
ਆਓ ਦੀਵੇ ਬਾਲੀਏ, ਮਹਿਕੇ ਬੀਅਬਾਨ,
ਫਲ-ਫੁਲ ਵੰਡਣ ਬਰਕਤਾਂ, ਵਿਹੜੇ ਦੀ ਮੁਸਕਾਨ |
ਆਓ ਦੀਵੇ ਬਾਲੀਏ, ਅੱਜ ਸਮੇਂ ਦੀ ਲੋੜ,
ਨੀਤਾਂ ਜੇ ਸਾਫ ਹੋਣ ਤਾਂ, ਰਹੇ ਰੱਤੀ ਨਾ ਥੋੜ |
ਆਓ ਦੀਵੇ ਬਾਲੀਏ, ਹਨੇਰਾ ਕਰੇ ਖਰੂਦ |
ਮੱਤ ਪਵੇ ਦਿਲੀਂ ਵੀ, ਵੇਚਣ ਜੋ ਬਰੂਦ |
ਆਓ ਦੀਵੇ ਬਾਲੀਏ, ਕਾਲੀ-ਬੋਲੀ ਰਾਤ,
ਮੰਗਦੀ ਅੱਜ ਮਨੁਖਤਾ, ਚਾਨਣ ਭਰੀ ਸੌਗਾਤ |
ਆਓ ਦੀਵੇ ਬਾਲੀਏ, ਮਨ ਵਿਚ ਭਰੇ ਗਿਆਨ,
ਸ਼ਾਲਾ ਚਾਨਣ ਹੁੰਦਿਆਂ, ਸੁਧਰ ਜਾਏ ਇਨਸਾਨ |
ਆਓ ਦੀਵੇ ਬਾਲੀਏ, ਝੁੱਗੀਆਂ ਵੀ ਰੁਸ਼ਨਾਉਣ |
ਧੋਣ ਹਨੇਰੇ ਦਿਨੇ ਜੋ, ਗੀਤ ਪਿਆਰ ਦੇ ਗਾਉਣ |
ਆਓ ਦੀਵੇ ਬਾਲੀਏ, ਮਿਟ ਜਾਏ ਅੰਧਕਾਰ,
ਸ਼ੀਸ਼ੇ ਵਾਂਗਰ ਹੋ ਜਾਏ, ਹਰ ਇਕ ਦਾ ਕਿਰਦਾਰ |
-ਮੋਬਾਈਲ : 94647-80299
