• ਸਰਦਾਰ ਪੰਛੀ •
ਆਜ਼ਾਦੀ ਦੀ ਜੰਗ ਲੜੀ ਇੰਜ ਅਣਖ ਦੇ ਪਹਿਰੇਦਾਰਾਂ ਨੇ,
ਤੋਪਾਂ ਦੇ ਮੰੂਹ ਬੰਦ ਕਰ ਦਿੱਤੇ ਸਿਰ ਦੇ ਕੇ ਸਰਦਾਰਾਂ ਨੇ |
ਇਨ੍ਹਾਂ ਨੇ ਉਹ ਰੰਗ ਵਿਖਾਇਆ, ਸੁੱਤੀ ਕੌਮ ਨੂੰ ਝੂਣ ਜਗਾਇਆ,
ਜਿਸ 'ਤੇ ਪਿਆ ਇਨ੍ਹਾਂ ਦਾ ਸਾਇਆ, ਉਹ ਲੜਿਆ ਹੋ ਦੂਣ ਸਵਾਇਆ |
ਸ਼ਰਮ ਨਾਲ ਸਿਰ ਨੀਵੇਂ ਕਰ ਲਏ, ਜ਼ੁਲਮ ਦੀਆਂ ਤਲਵਾਰਾਂ ਨੇ,
ਤੋਪਾਂ ਦੇ ਮੰੂਹ ਬੰਦ ਕਰ ਦਿੱਤੇ ਸਿਰ ਦੇ ਕੇ ਸਰਦਾਰਾਂ ਨੇ |
ਹਰ ਦਿਲ ਵਿਚ ਐਸੀ ਅੱਗ ਬਲੀ, ਹਰ ਚੇਹਰੇ 'ਤੇ ਛਾਈ ਲਾਲੀ,
ਬਣੀ ਗੁਲਾਮੀ ਗੰਦੀ ਗਾਲ੍ਹੀ, ਬਣੀ ਸ਼ੇਰਨੀ ਹਰ ਪੰਚਾਲੀ,
ਵੰਗਾਂ ਲਾਹ ਕੇ ਕੜੇ ਪਾ ਲਏ, ਸੋਹਣੀਆਂ ਬਾਂਕੀਆਂ ਨਾਰਾਂ ਨੇ,
ਤੋਪਾਂ ਦੇ ਮੰੂਹ ਬੰਦ ਕਰ ਦਿੱਤੇ ਸਿਰ ਦੇ ਕੇ ਸਰਦਾਰਾਂ ਨੇ |
ਤੁਰੇ ਇਕੱਠੇ ਹੋ ਦੀਵਾਨੇ, ਸ਼ਮ੍ਹਾਂ ਆਜ਼ਾਦੀ ਦੇ ਪਰਵਾਨੇ,
ਜੇਲ੍ਹਾਂ ਬਣ ਗਈਆਂ ਮੈਅਖਾਨੇ, ਇਸ਼ਕ ਵਤਨ ਦੇ ਨੇ ਪੈਮਾਨੇ,
ਪੀਤੇ ਭਰ ਭਰ ਜਾਮ ਸ਼ਹੀਦੀ, ਰਲਮਿਲ ਕੇ ਸਭ ਯਾਰਾਂ ਨੇ,
ਤੋਪਾਂ ਦੇ ਮੰੂਹ ਬੰਦ ਕਰ ਦਿੱਤੇ ਸਿਰ ਦੇ ਕੇ ਸਰਦਾਰਾਂ ਨੇ |
ਖੋਰੀਆਂ ਗੋਰੇ ਦੀਆਂ ਜਗੀਰਾਂ, ਰਾਵੀ ਤੇ ਸਤਲੁਜ ਦੇ ਨੀਰਾਂ,
ਤੋੜ ਦਿੱਤੀਆਂ ਸਭ ਜ਼ੰਜੀਰਾਂ, ਰਲ ਕੇ ਹਿੰਦੂ ਮੁਸਲਿਮ ਵੀਰਾਂ,
ਖੋਹਿਆ ਜੀਣ ਦਾ ਹੱਕ ਜ਼ਾਲਿਮ ਤੋਂ ਦੇ ਕੇ ਜਾਨ ਹਕਦਾਰਾਂ ਨੇ,
ਤੋਪਾਂ ਦੇ ਮੰੂਹ ਬੰਦ ਕਰ ਦਿੱਤੇ, ਸਿਰ ਦੇ ਕੇ ਸਰਦਾਰਾਂ ਨੇ |
ਆਜ਼ਾਦੀ ਦੀ ਜੰਗ ਲੜੀ ਇੰਜ ਅਣਖ ਦੇ ਪਹਿਰੇਦਾਰਾਂ ਨੇ,
ਤੋਪਾਂ ਦੇ ਮੰੂਹ ਬੰਦ ਕਰ ਦਿੱਤੇ, ਸਿਰ ਦੇ ਕੇ ਸਰਦਾਰਾਂ ਨੇ |
-ਖੰਨਾ-141401. (ਪੰਜਾਬ) |
ਮੋਬਾਈਲ : 94170-91668.
