ਡੇਰਾਬਸੀ, 28 ਮਈ (ਰਣਬੀਰ ਸਿੰਘ ਪੜ੍ਹੀ)- ਨਗਰ ਕੌਂਸਲ ਡੇਰਾਬੱਸੀ ਲਈ ਪਈਆਂ ਵੋਟਾਂ ਦੀ ਗਿਣਤੀ ਸਥਾਨਕ ਸਰਕਾਰੀ ਕਾਲਜ ਵਿਖੇ ਸਥਾਪਿਤ ਗਿਣਤੀ ਕੇਂਦਰ 'ਚ ਹੋਵੇਗੀ | ਡੇਰਾਬੱਸੀ 'ਚ 51 ਬੂਥ ਹੋਣ ਕਾਰਨ 7 ਰਾਊਾਡਾਂ 'ਚ 18 ਵਾਰਡਾਂ ਦੀ ਗਿਣਤੀ ਮੁਕੰਮਲ ਕਰ ਲਈ ਜਾਵੇਗੀ | ਡੇਰਾਬੱਸੀ ਦੇ ਐਸ. ਡੀ. ਐਮ.-ਕਮ-ਰਿਟਰਨਿੰਗ ਅਫ਼ਸਰ ਅਮਿਤ ਗੁਪਤਾ ਨੇ ਦੱਸਿਆ ਕਿ ਸਟਰਾਂਗ ਰੂਮ 'ਚੋਂ ਬੈਲਟ ਬਾਕਸ ਲਿਆਉਣ-ਲਿਜਾਣ ਅਤੇ ਗਿਣਤੀ ਦੀ ਸਾਰੀ ਕਾਰਵਾਈ ਸੀ. ਸੀ. ਟੀ. ਵੀ. ਕੈਮਰਿਆਂ ਦੀ ਨਿਗਰਾਨੀ ਹੇਠ ਕੀਤੀ ਜਾਵੇਗੀ | ਇਸ ਸਾਰੀ ਪ੍ਰਕਿਰਿਆ ਦੀ ਲਾਈਵ ਕਵਰੇਜ ਲੋਕਾਂ ਨੂੰ ਦਿਖਾਉਣ ਲਈ ਸਟੂਡੈਂਟ ਸੈਂਟਰ 'ਚ ਵੱਡੀ ਸਕਰੀਨ ਦਾ ਪ੍ਰਬੰਧ ਕੀਤਾ ਗਿਆ ਹੈ | ਸਵੇਰੇ 7 ਵਜੇ ਸਟਰਾਂਗ ਰੂਮ ਖੋਲ੍ਹ ਕੇ ਅੱਠ ਵਾਰਡਾਂ ਦੇ ਬੈਲਟ ਬਾਕਸ ਇਕੋ ਸਮੇਂ ਅੱਠ ਟੇਬਲਾਂ 'ਤੇ ਗਿਣਤੀ ਲਈ ਰੱਖੇ ਜਾਣਗੇ | ਜ਼ਿਕਰਯੋਗ ਹੈ ਕਿ ਡੇਰਾਬੱਸੀ ਦੇ 18 ਵਾਰਡਾਂ ਤੋਂ 79 ਉਮੀਦਵਾਰ ਚੋਣ ਮੈਦਾਨ 'ਚ ਹਨ | ਨਾਮਜ਼ਦਗੀਆਂ ਰੱਦ ਹੋਣ ਅਤੇ ਨਾਂਅ ਵਾਪਸੀ ਵਾਲੇ ਦਿਨ ਡੇਰਾਬੱਸੀ ਦੇ ਵਾ. ਨੰ. 19 ਤੋਂ ਹਰਜੀਤ ਕੌਰ ਨੂੰ ਬਿਨਾਂ ਮੁਕਾਬਲਾ ਜੇਤੂ ਕਰਾਰ ਦਿੱਤਾ ਜਾ ਚੁੱਕਾ ਹੈ | ਡੇਰਾਬੱਸੀ ਤੋਂ ਕਾਂਗਰਸ ਤੇ ਆਮ ਆਦਮੀ ਪਾਰਟੀ ਦੇ 18-18, ਅਕਾਲੀ ਦਲ ਅਤੇ ਭਾਜਪਾ ਦੇ 17-17 ਉਮੀਦਵਾਰ ਚੋਣ ਲੜ ਰਹੇ ਹਨ ਤੇ ਬਾਕੀ ਆਜ਼ਾਦ ਉਮੀਦਵਾਰ ਹਨ |
