ਬਾਪੂ ਦੀ ਲਾਣੇਦਾਰੀ

ਅ

ਅਜੀਤ ਡੈਸਕ 26-07-2026

ਜਦ ਦੀ ਬਾਪੂ ਦੀ ਲਾਣੇਦਾਰੀ ਖੁੱਸੀ ਆ,
ਸੱਚ ਜਾਣਿਓ ਘਰ 'ਚੋਂ ਬਰਕਤ ਰੁੱਸੀ ਆ।
ਨੂੰਹ ਨਾ ਰੋਟੀ ਘਰੇ ਪਕਾਵੇ,
ਖਾਣਾ ਰੋਜ਼ ਜੁਮੈਟੋ ਤੋਂ ਆਵੇ,
ਮੁੰਡੇ ਦਾ ਹੱਟਾ ਕੱਟਾ ਜੁੱਸਾ,
ਬਣ ਕੇ ਰਹਿ ਗਿਆ ਜੁੱਸੀ ਆ,
ਜਦ ਦੀ ਬਾਪੂ ਦੀ ਲਾਣੇਦਾਰੀ........।
ਨਾ ਕੋਈ ਸੋਚ ਸਮਝ ਕੇ ਚੱਲੇ,
ਤੋਰਾ ਫੇਰਾ ਰਹਿ ਗਿਆ ਪੱਲੇ,
ਸਾਰਾ ਟੱਬਰ ਡੀ ਮਾਰਟ ਚੱਲਿਆ,
ਬਜ਼ੁਰਗ ਦੀ ਕਿਸੇ ਬਾਤ ਨਾ ਪੁੱਛੀ ਆ,
ਜਦ ਦੀ ਬਾਪੂ ਦੀ ਲਾਣੇਦਾਰੀ........।
ਮੋਬਾਈਲ ਆਪੋ ਆਪਣਾ ਚੱਲੇ,
ਕੱਠੇ ਬੈਠੇ ਵੀ ਹੋਈਏ ਕੱਲੇ ਕੱਲੇ,
ਲਾ ਇਲਾਜ ਬਣ ਗਿਆ ਇਹ ਤਾਂ,
ਇਸ ਦੀ ਨਾ ਕੋਈ ਦਵਾਈ ਸੁੱਝੀ ਆ,
ਜਦ ਦੀ ਬਾਪੂ ਦੀ ਲਾਣੇਦਾਰੀ........।
ਆਲਸ ਨੇ ਪਾ ਲਏ ਸਭ ਨੂੰ ਘੇਰੇ,
ਨਾ ਕੋਈ ਉਠਦਾ ਸੁਭਾ ਸਵੇਰੇ,
ਡਰਿੰਕ ਐਨਰਜੀ ਵਾਲਾ ਪੀਂਦੇ,
ਭੁੱਲ ਗਏ ਲੱਸੀ ਲੁੱਸੀ ਆ,
ਜਦ ਦੀ ਬਾਪੂ ਦੀ ਲਾਣੇਦਾਰੀ........।
ਬਿੰਦਰ ਕੈਸਾ ਵੇਲਾ ਆਇਆ,
ਨਾ ਕੋਈ ਰਹਿ ਗਿਆ ਚਾਚਾ ਤਾਇਆ,
ਸਾਡੀ ਫ਼ਸਲ ਪੰਜਾਬੀ ਵਾਲੀ,
ਅੰਗਰੇਜ਼ੀ ਜਾਂਦੀ ਮੁੱਛੀ ਆ,
ਜਦ ਦੀ ਬਾਪੂ ਦੀ ਲਾਣੇਦਾਰੀ ਖੁੱਸੀ ਆ,
ਸੱਚ ਜਾਣਿਓ ਘਰ 'ਚੋਂ ਬਰਕਤ ਰੁੱਸੀ ਆ।