ਕੋਹਿਨੂਰ ਟਿੱਪਣੀ 'ਤੇ ਨਿਊਯਾਰਕ ਦੇ ਮੇਅਰ ਦੀ ਹੋ ਰਹੀ ਆਲੋਚਨਾ

ਨਿਊਯਾਰਕ, 1 ਮਈ (ਪੀ.ਟੀ.ਆਈ.)-ਨਿਊਯਾਰਕ ਸਿਟੀ ਦੇ ਮੇਅਰ ਜ਼ੋਹਰਾਨ ਮਮਦਾਨੀ ਨੂੰ ਰਾਜਾ ਚਾਰਲਸ ਤੀਜੇ ਦਾ 'ਰੁੱਖਾ' ਸਵਾਗਤ ਕਰਨ ਤੇ ਕੋਹਿਨੂਰ ਹੀਰੇ ਦੀ ਵਾਪਸੀ ਦੀ ਅਪੀਲ ਕਰਦੇ ਹੋਏ 'ਬਸਤੀਵਾਦ ਦੇ ਮੁੱਦੇ ਨੂੰ ਪਾਸੇ ਰੱਖਣ 'ਚ ਅਸਫਲ' ਰਹਿਣ ਲਈ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਮੈਨਹਟਨ 'ਚ 9/11 ਮੈਮੋਰੀਅਲ 'ਤੇ ਰਾਜਾ ਚਾਰਲਸ ਤੀਜੇ ਤੇ ਰਾਣੀ ਕੈਮਿਲਾ ਨਾਲ ਮੁਲਾਕਾਤ ਤੋਂ ਕੁਝ ਘੰਟੇ ਪਹਿਲਾਂ, ਮਮਦਾਨੀ ਨੇ ਕਿਹਾ ਸੀ ਕਿ ਉਹ ਬਿ੍ਟਿਸ਼ ਰਾਜਾ ਨੂੰ ਕੋਹਿਨੂਰ ਹੀਰਾ (ਭਾਰਤ) ਵਾਪਸ ਕਰਨ ਲਈ ਕਹਿਣਗੇ | 'ਦ ਨਿਊਯਾਰਕ ਪੋਸਟ' ਦੇ ਸੰਪਾਦਕੀ ਬੋਰਡ ਨੇ ਮਮਦਾਨੀ ਦੇ ਰਾਜਾ ਚਾਰਲਸ ਦੇ 'ਰੁੱਖੇ' ਸਵਾਗਤ ਦੀ ਨਿੰਦਾ ਕੀਤੀ | ਕਿਹਾ ਗਿਆ ਕਿ ਜ਼ੋਹਰਾਨ ਮਮਦਾਨੀ ਇੰਗਲੈਂਡ ਦੇ ਰਾਜਾ ਦਾ ਸਹੀ ਢੰਗ ਨਾਲ ਸਵਾਗਤ ਕਰਨ 'ਚ ਅਸਫਲ ਰਹੇ |