ਬ੍ਰੌਂਕਸ ਵਿੱਚ ਡੋਮਿਨੋ ਖੇਡ ਰਹੇ ਦੋ ਵਿਅਕਤੀਆਂ ਦੀ ਗੋਲੀ ਮਾਰ ਕੇ ਹੱਤਿਆ
ਅਜੀਤ ਡੈਸਕ
21-06-2026
ਪੁਲਿਸ ਮੁਤਾਬਕ ਘਟਨਾ ਰਾਤ ਕਰੀਬ 10 ਵਜੇ ਤੋਂ ਕੁਝ ਮਿੰਟ ਬਾਅਦ ਵੈਸਟਚੈਸਟਰ ਐਵੇਨਿਊ ‘ਤੇ ਵਾਪਰੀ। ਗੋਲੀਬਾਰੀ ਦੌਰਾਨ ਮੌਕੇ ‘ਤੇ ਮੌਜੂਦ ਕਈ ਲੋਕ ਭੱਜ ਗਏ, ਜਦਕਿ 43 ਸਾਲਾ ਕਰਟਿਸ ਬਰਾਊਨ ਅਤੇ 53 ਸਾਲਾ ਐਗਬਰਟ ਰਦਰਫੋਰਡ ਨੂੰ ਕਈ ਗੋਲੀਆਂ ਲੱਗੀਆਂ।
ਜਾਂਚਕਰਤਾਵਾਂ ਅਨੁਸਾਰ ਇੱਕ ਵਿਅਕਤੀ ਮੌਕੇ ‘ਤੇ ਹੀ ਡਿੱਗ ਗਿਆ, ਜਦਕਿ ਦੂਜਾ ਕੁਝ ਦੂਰੀ ਤੱਕ ਜਾਣ ਤੋਂ ਬਾਅਦ ਡਿੱਗ ਪਿਆ। ਦੋਵਾਂ ਨੂੰ ਜੈਕੋਬੀ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ। ਮ੍ਰਿਤਕ ਐਗਬਰਟ ਰਦਰਫੋਰਡ ਦੀ ਪਤਨੀ ਐਂਜਲਿਕ ਇਰਵਿੰਗ-ਰਦਰਫੋਰਡ ਨੇ ਦੱਸਿਆ ਕਿ ਉਸਦਾ ਪਤੀ ਅਤੇ ਦੂਜਾ ਮ੍ਰਿਤਕ ਮੂਲ ਰੂਪ ਵਿੱਚ ਜਮੈਕਾ ਦੇ ਰਹਿਣ ਵਾਲੇ ਸਨ। ਉਸਨੇ ਕਿਹਾ ਕਿ ਘਟਨਾ ਤੋਂ ਥੋੜ੍ਹੀ ਦੇਰ ਪਹਿਲਾਂ ਉਸਦਾ ਪਤੀ ਆਪਣੀ ਪੋਤੀ ਨੂੰ ਘਰ ਦੇ ਅੰਦਰ ਛੱਡ ਕੇ ਬਾਹਰ ਗਿਆ ਸੀ। ਉਸਦਾ ਮੰਨਣਾ ਹੈ ਕਿ ਜੇ ਪੋਤੀ ਉਸਦੇ ਨਾਲ ਬਾਹਰ ਹੁੰਦੀ ਤਾਂ ਉਹ ਵੀ ਗੋਲੀਬਾਰੀ ਦੀ ਸ਼ਿਕਾਰ ਹੋ ਸਕਦੀ ਸੀ। ਪਰਿਵਾਰਕ ਮੈਂਬਰਾਂ ਦੇ ਅਨੁਸਾਰ ਗੋਲੀਬਾਰੀ ਤੋਂ ਪਹਿਲਾਂ ਕਿਸੇ ਵਿਅਕਤੀ ਨਾਲ ਮੋਢਾ ਟਕਰਾਉਣ ਕਾਰਨ ਬਹਿਸ ਹੋਈ ਸੀ, ਜੋ ਬਾਅਦ ਵਿੱਚ ਹਿੰਸਕ ਰੂਪ ਧਾਰ ਗਈ। ਰਦਰਫੋਰਡ ਦੀ ਪਤਨੀ ਨੇ ਦੱਸਿਆ ਕਿ ਉਹ 13 ਸਾਲਾਂ ਤੋਂ ਵਿਆਹੇ ਹੋਏ ਸਨ ਅਤੇ ਤਿੰਨ ਦਹਾਕਿਆਂ ਤੋਂ ਇਕ-ਦੂਜੇ ਨੂੰ ਜਾਣਦੇ ਸਨ। ਉਸਨੇ ਦੱਸਿਆ ਉਸ ਦਾ ਪਤੀ ਬਹੁਤ ਮਿਹਨਤੀ ਅਤੇ ਦਿਆਲੂ ਇਨਸਾਨ ਸੀ,ਜੋ ਪਾਰਕ ਵਿੱਚ ਲੋੜਵੰਦ ਲੋਕਾਂ ਨੂੰ ਖਾਣਾ ਵੀ ਖੁਆਉਂਦਾ ਸੀ।
ਖਬਰ ਲਿਖੇ ਜਾਣ ਤੱਕ ਤੱਕ ਕਿਸੇ ਗ੍ਰਿਫ਼ਤਾਰੀ ਦੀ ਪੁਸ਼ਟੀ ਨਹੀਂ ਕੀਤੀ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ।
