ਮਹਾਰਾਜਾ ਚਾਰਲਸ ਆਪਣਾ ਟੈਕਸ ਜਨਤਕ ਕਰਨ ਵਾਲੇ ਪਹਿਲੇ ਮਹਾਰਾਜਾ ਬਣੇ
ਅਜੀਤ ਡੈਸਕ
27-06-2026
ਪਾਰਦਰਸ਼ਤਾ ਦੀ ਮੰਗ
ਖਾਤਿਆਂ ਅਨੁਸਾਰ ਕਿੰਗ ਨੇ 2023-24 ਲਈ 11.7 ਮਿਲੀਅਨ ਪੌਂਡ ਦਾ ਟੈਕਸ ਅਦਾ ਕੀਤਾ ਸੀ, ਜਦੋਂ ਕਿ ਪ੍ਰਿੰਸ ਵਿਲੀਅਮ ਨੇ ਉਸੇ ਸਮੇਂ ਲਈ 8.34 ਮਿਲੀਅਨ ਪੌਂਡ ਦਾ ਭੁਗਤਾਨ ਕੀਤਾ ਸੀ। ਰਾਜੇ ਦੇ ਨਿੱਜੀ ਟੈਕਸ ਦੇ ਵੇਰਵੇ ਪ੍ਰਕਾਸ਼ਤ ਕਰਨ ਦਾ ਇਹ ਫੈਸਲਾ ਐਂਡਰਿਊ ਮਾਊਂਟਬੈਟਨ-ਵਿੰਡਸਰ ਦੇ ਆਲੇ-ਦੁਆਲੇ ਦੇ ਵਿਵਾਦਾਂ ਤੋਂ ਬਾਅਦ, ਸ਼ਾਹੀ ਵਿੱਤ ਵਿੱਚ ਵਧੇਰੇ ਪਾਰਦਰਸ਼ਤਾ ਦੀਆਂ ਮੰਗਾਂ ਦੇ ਮੱਦੇਨਜ਼ਰ ਲਿਆ ਗਿਆ ਹੈ। ਸੰਸਦ ਮੈਂਬਰਾਂ ਨੇ ਇਸ ਗੱਲ ’ਤੇ ਚਿੰਤਾ ਜਤਾਈ ਸੀ ਕਿ ਸ਼ਾਹੀ ਪਰਿਵਾਰ ਦੁਆਰਾ ਜਨਤਕ ਫੰਡਾਂ ਦੀ ਵਰਤੋਂ ਕਿਵੇਂ ਕੀਤੀ ਜਾਂਦੀ ਹੈ, ਇਸ ਬਾਰੇ ਜਵਾਬਦੇਹੀ ਦੀ ਕਮੀ ਹੈ। ਪੈਲੇਸ ਦੇ ਸਾਲਾਨਾ ਖਾਤਿਆਂ ਵਿੱਚ ਇਹ ਬਦਲਾਅ ਵਧੇਰੇ ਖੁੱਲ੍ਹੇਪਣ (ਪਾਰਦਰਸ਼ਤਾ) ਲਈ ਜਨਤਕ ਭਾਵਨਾਵਾਂ ਨੂੰ ਦਰਸਾਉਂਦਾ ਹੈ। ਉਨ੍ਹਾਂ ਦੇ ਦਫ਼ਤਰਾਂ ਅਨੁਸਾਰ, ਕਿੰਗ ਅਤੇ ਪ੍ਰਿੰਸ ਵਿਲੀਅਮ ਦੁਆਰਾ ਸਵੈ-ਇੱਛਾ ਨਾਲ ਕਿੰਨਾ ਟੈਕਸ ਅਦਾ ਕੀਤਾ ਜਾਂਦਾ ਹੈ, ਇਸ ਨੂੰ ਜਨਤਕ ਕਰਨ ਦਾ ਫੈਸਲਾ ਦੋਵਾਂ ਦਾ ਨਿੱਜੀ ਫੈਸਲਾ ਸੀ। ਬਕਿੰਘਮ ਪੈਲੇਸ ਨੇ ਇਸ ਕਦਮ ਨੂੰ ਪਾਰਦਰਸ਼ਤਾ ਵਧਾਉਣ ਵਾਲਾ ਦੱਸਿਆ ਅਤੇ ਕਿਹਾ ਕਿ ਇਸਦਾ ਉਦੇਸ਼ “ਸਾਡੀ ਜਵਾਬਦੇਹੀ ਬਾਰੇ ਵਿਆਪਕ ਸਮਝ ਨੂੰ ਉਤਸ਼ਾਹਿਤ ਕਰਨਾ” ਹੈ।
ਸਾਲ 2022 ਵਿੱਚ ਜਦੋਂ ਤੋਂ ਕਿੰਗ ਚਾਰਲਸ ਰਾਜਾ ਬਣੇ ਹਨ ਅਤੇ ਵਿਲੀਅਮ ਪ੍ਰਿੰਸ ਆਫ਼ ਵੇਲਜ਼ ਬਣੇ ਹਨ, ਉਦੋਂ ਤੋਂ ਪਿਓ-ਪੁੱਤ ਦੁਆਰਾ ਐਚਐਮ ਰੈਵੇਨਿਊ ਐਂਡ ਕਸਟਮਜ਼ ਨੂੰ ਦਿੱਤਾ ਗਿਆ ਸਾਂਝਾ ਟੈਕਸ ਬਿੱਲ 50 ਮਿਲੀਅਨ ਪੌਂਡ ਤੋਂ ਵੱਧ ਰਿਹਾ ਹੈ। ਮਹਾਰਾਜੇ ਨੂੰ ਆਪਣੀ ‘ਡਚੀ ਆਫ਼ ਲੈਨਕਾਸਟਰ’ ਜਾਇਦਾਦ ਤੋਂ ਸਾਲਾਨਾ ਆਮਦਨ ਮਿਲਦੀ ਹੈ, ਜੋ ਕਿ ਮਹਾਰਾਜੇ ਨੂੰ ਅਧਿਕਾਰਤ ਅਤੇ ਨਿੱਜੀ ਖ਼ਰਚਿਆਂ ਲਈ ਫੰਡਾਂ ਦਾ ਇੱਕ ਸੁਤੰਤਰ ਸਰੋਤ ਪ੍ਰਦਾਨ ਕਰਨ ਲਈ ਬਣਾਈ ਗਈ ਸੀ। ਇਹ ਜ਼ਮੀਨ, ਨਿਵੇਸ਼ਾਂ ਅਤੇ ਜਾਇਦਾਦਾਂ ਦਾ ਇੱਕ ਢਾਂਚਾ ਹੈ, ਜਿਸ ਤੋਂ 2025-26 ਵਿੱਚ ਰਾਜੇ ਨੂੰ 2.52 ਕਰੋੜ ਪੌਂਡ ਦੀ ਸਾਲਾਨਾ ਆਮਦਨ ਹੋਈ। ਪ੍ਰਿੰਸ ਵਿਲੀਅਮ ਨੇ ਵੀ ਟੈਕਸ ਦੇ ਭੁਗਤਾਨ ਨੂੰ ਜਨਤਕ ਕਰ ਦਿੱਤਾ ਹੈ। ਪ੍ਰਿੰਸ ਵਿਲੀਅਮ ਨੂੰ ‘ਡਚੀ ਆਫ਼ ਕੌਰਨਵਾਲ’ ਤੋਂ ਆਮਦਨ ਮਿਲਦੀ ਹੈ। ਜੋ ਕਿ ਇੱਕ ਅਰਬ ਪੌਂਡ ਦੀ, 130,000 ਏਕੜ ਦੀ ਜੱਦੀ ਜਾਇਦਾਦ ਹੈ ਜਿਸ ਵਿੱਚ ਲੰਡਨ ਦਾ ਓਵਲ ਕ੍ਰਿਕਟ ਮੈਦਾਨ ਵੀ ਸ਼ਾਮਲ ਹੈ।
