ਨਹਿਲੇ 'ਤੇ ਦਹਿਲਾ

ਮਸ਼ਹੂਰ ਲੇਖਕ ਜਨਾਬ ਵਜ਼ੀਰ ਆਗਾ ਸਾਹਿਬ ਹਮੇਸ਼ਾ ਛਪਦੀਆਂ ਅਖ਼ਬਾਰਾਂ ਅਤੇ ਰਿਸਾਲਿਆਂ ਦੇ ਦਫਤਰਾਂ ਵਿਚ ਜਾ ਕੇ ਉਥੋਂ ਦੇ ਸਟਾਫ਼ ਅਤੇ ਖਾਸ ਤੌਰ 'ਤੇ ਸੰਪਾਦਕ, ਸਹਿ-ਸੰਪਾਦਕ, ਨੂੰ ਮਿਲ ਕੇ ਬੜੇ ਖੁਸ਼ ਹੁੰਦੇ ਸਨ, ਉਹ ਹਮੇਸ਼ਾ ਆਪਣੀ ਕਾਰ 'ਤੇ ਸਫਰ ਕਰਦੇ ਸਨ। ਉਨ੍ਹਾਂ ਦਾ ਡਰਾਈਵਰ ਕਾਫੀ ਸਿਆਣਾ ਸੀ। ਇਕ ਵਾਰੀ ਉਹ ਉਰਦੂ ਦੇ ਰਿਸਾਲੇ 'ਅਦਬੀ ਦੁਨੀਆ' ਦੇ ਦਫਤਰ ਜਾਣ ਲਈ ਘਰੋਂ ਤੁਰੇ ਸਨ। ਅਦਬੀ ਦੁਨੀਆ ਦੇ ਦਫਤਰ ਲਾਗੇ ਉਨ੍ਹਾਂ ਦੀ ਕਾਰ ਇਕ ਟਾਂਗੇ ਨਾਲ ਟਕਰਾ ਗਈ। ਵਜ਼ੀਰ ਆਗਾ ਸਾਹਿਬ ਕਾਰ ਤੋਂ ਉੱਤਰ ਕੇ ਅਦਬੀ ਦੁਨੀਆ ਦੇ ਦਫਤਰ ਦੇ ਅੰਦਰ ਚਲੇ ਗਏ। ਉਥੇ ਇਕ ਪੁਲਿਸ ਸਿਪਾਹੀ ਖੜ੍ਹਾ ਸੀ। ਉਸ ਨੇ ਕਾਰ ਦੇ ਡਰਾਈਵਰ ਨੂੰ ਪੁੱਛਿਆ, 'ਇਹ ਕਾਰ ਕਿਸ ਦੀ ਹੈ?' ਕਾਰ ਡਰਾਈਵਰ ਨੇ ਬੜੀ ਹਲੀਮੀ ਨਾਲ ਜਵਾਬ ਦਿੱਤਾ, 'ਇਹ ਕਾਰ ਵਜ਼ੀਰ ਸਾਹਿਬ ਦੀ ਹੈ।' ਇਹ ਸੁਣ ਕੇ ਸਿਪਾਹੀ ਤਾਂਗੇ ਦੇ ਕੋਚਵਾਨ ਨੂੰ ਥਾਣੇ ਲੈ ਗਿਆ। ਇਸ ਦੌਰਾਨ ਜਨਾਬ ਵਜ਼ੀਰ ਆਗਾ ਵੀ ਥਾਣੇ ਪਹੁੰਚ ਗਏ। ਛਾਣਬੀਨ ਤੋਂ ਬਾਅਦ ਜਦੋਂ ਅਫਸਰ ਨੂੰ ਪਤਾ ਲੱਗਿਆ ਕਿ ਕਾਰ ਕਿਸੇ ਵਜ਼ੀਰ ਦੀ ਨਹੀਂ, ਵਜ਼ੀਰ ਆਗਾ ਦੀ ਹੈ ਤਾਂ ਉਹ ਕੋਚਵਾਨ ਤੋਂ ਹਟ ਕੇ ਕਾਰ ਡਰਾਈਵਰ ਨੂੰ ਡਾਂਟਣ ਲੱਗ ਪਿਆ। 'ਤੂੰ ਹੀ ਤਾਂਗੇ ਵਾਲੇ ਦਾ ਨੁਕਸਾਨ ਕੀਤਾ ਹੈ, ਇਸ ਲਈ ਤੈਨੂੰ ਜੁਰਮਾਨਾ ਭਰਨਾ ਪਵੇਗਾ।' ਇਹ ਸੁਣ ਕੇ ਜਨਾਬ ਵਜ਼ੀਰ ਆਗਾ ਨੇ ਆਪਣੀ ਛਪੀ ਹੋਈ ਪੁਸਤਕ ਸਿਪਾਹੀ ਨੂੰ ਫੜਾ ਕੇ ਕਿਹਾ, 'ਲੈ ਜੁਰਮਾਨਾ ਲੈ ਲੈ।'

-ਜੇਠੀ ਨਗਰ, ਮਾਲੇਰਕੋਟਲਾ ਰੋਡ, ਖੰਨਾ-141401 (ਪੰਜਾਬ)।
ਮੋਬਾਈਲ : 94170-91668