ਅੱਜ ਵਿਸਾਖੀ ਦਾ ਆਗਮ ਹੈ,
ਮਹਿਕ ਰਿਹਾ ਸਾਰਾ ਆਲਮ ਹੈ।
ਹਰ ਪਾਸੇ ਖੇੜਾ ਖੁਸ਼ਹਾਲੀ,
ਕਿੰਨਾ ਪਿਆਰਾ ਇਹ ਮੌਸਮ ਹੈ।
ਪੌਣਾਂ ਵਿਚ ਸੰਗੀਤ ਲਹਿਰੀਆਂ,
ਨਾਦ ਤੇਰਾ ਕਿੰਨਾ ਸੂਖਮ ਹੈ।
ਦਿਲ ਦੇ ਵਿਹੜੇ ਖਿੜੇ ਸ਼ਗੂਫੇ,
ਸਾਹਾਂ ਵਿਚ ਤੇਰੀ ਸਰਗਮ ਹੈ।
ਇਸ ਦਿਨ ਦਾ ਇਤਿਹਾਸ ਨਿਆਰਾ,
ਇਸ ਦਿਨ ਵਿਚ ਵੱਖਰਾ ਹੀ ਦਮ ਹੈ।
ਦਸਮ ਪਿਤਾ ਨੇ ਪੰਥ ਸਾਜਿਆ,
ਅਰਸ਼ਾਂ ਤੱਕ ਜਿਸਦਾ ਪਰਚਮ ਹੈ।
ਜਲ੍ਹਿਆਂਵਾਲਾ ਬਾਗ਼ ਦੇਖ ਕੇ,
ਹਰ ਅੱਖ ਹੀ ਹੋਈ ਪੁਰਨਮ ਹੈ।
ਕਿਰਸਾਣੀ ਦਾ ਦਰਦ ਦੇਖ ਕੇ,
ਨੈਣਾਂ ਨੇ ਲਾਈ ਛਮਛਮ ਹੈ।
ਸੁਖ ਵੀ ਤੇਰੇ, ਦੁਖ ਵੀ ਤੇਰੇ,
ਫੁੱਲ ਤੇਰੇ, ਤੇਰੀ ਸ਼ਬਨਮ ਹੈ।
ਅੰਦਰ ਤੂੰ ਹੈਂ, ਬਾਹਰ ਤੂੰ ਹੈਂ,
ਹਰ ਪਾਸੇ ਤੇਰੀ ਰਿਮਝਿਮ ਹੈ।
ਹਿਰਦੇ ਵਿਚ ਝਰਨਾਟਾਂ ਛੇੜੇ,
ਇਸ਼ਕ ਮੇਰਾ ਬਣਿਆ ਮਹਿਰਮ ਹੈ।
