ਗੁਰ ਨਾਨਕ ਸਭ ਕੇ ਸਿਰਤਾਜ

* ਡਾ. ਸਰਬਜੀਤ ਕੌਰ ਸੰਧਾਵਾਲੀਆ *
ਅੱਜ ਹਰ ਪਾਸਿਉਂ ਵਧਾਈਆਂ ਆਉਣ ਲੱਗੀਆਂ
ਪੌਣਾਂ ਪਹਿਲੇ ਪਾਤਸ਼ਾਹ ਦੇ ਗੀਤ ਗਾਉਣ ਲੱਗੀਆਂ।
ਸੱਚੇ ਪਾਤਸ਼ਾਹ ਦੇ ਪ੍ਰਕਾਸ਼ ਦਾ ਦਿਹਾੜਾ ਆਇਆ
ਖੁਸ਼ੀ ਵਿਚ ਝੂਮ ਰੂਹਾਂ ਪੈਲਾਂ ਪਾਉਣ ਲੱਗੀਆਂ।
ਸਾਰੀ ਕਾਇਨਾਤ ਵਿਚ ਛਾ ਗਿਆ ਖੁਮਾਰ ਕੋਈ
ਝੂਮ ਝੂਮ ਆਤਮਾਵਾਂ ਨਸ਼ਿਆਉਣ ਲੱਗੀਆਂ।
ਚੰਨ ਅਤੇ ਤਾਰਿਆਂ ਨੇ ਝਿਲਮਿਲੀ ਨਾਚ ਪਾਇਆ
ਸੂਰਜੀ ਸੁਆਵਾਂ ਚਾਨਣੀ ਵਿਛਾਉਣ ਲੱਗੀਆਂ।
ਸਾਰਿਆਂ ਦੇ ਸਾਂਝੇ ਸਤਿਗੁਰੂ ਜੀ ਦੇ ਪਿਆਰ ਵਿਚ
ਯਾਦਾਂ ਦੀਆਂ ਸੀਤਲ ਘਟਾਵਾਂ ਛਾਉਣ ਲੱਗੀਆਂ।
ਰੰਗ ਰਸ ਰੂਪ ਖੁਸ਼ਬੂਆਂ ਅਤੇ ਰੌਸ਼ਨੀਆਂ
ਧੰਨ ਨਿਰੰਕਾਰ ਦੀਆਂ ਬਾਤਾਂ ਪਾਉਣ ਲੱਗੀਆਂ।
ਸਾਰੀ ਹੀ ਮਨੁੱਖਤਾ ਹੈ ਸ਼ੁਕਰਾਂ 'ਚ ਭਰੀ ਹੋਈ
ਅਦਬਾਂ ਦੇ ਮੋਤੀ ਅੱਖਾਂ ਬਰਸਾਉਣ ਲੱਗੀਆਂ।
ਧਰਤੀ ਦਾ ਕੋਨਾ ਕੋਨਾ ਮਹਿਕ ਰਿਹਾ ਯਾਦ ਵਿਚ
ਅੱਜ ਵੀ ਉਡੀਕਾਂ ਸੁੱਚਾ ਪੀੜ੍ਹਾ ਡਾਹੁਣ ਲੱਗੀਆਂ।
ਭਿੱਜ ਗਈਆਂ ਰੂਹਾਂ ਸੱਚੇ ਪਾਤਸ਼ਾਹ ਦੇ ਪਿਆਰ ਵਿਚ
ਮਿਹਰਾਂ ਤੇ ਮੁਹੱਬਤਾਂ ਨੇ ਯਾਦ ਆਉਣ ਲੱਗੀਆਂ।
ਲੱਖਾਂ ਹੀ ਦੰਡਉਤਾਂ ਮੇਰੇ ਸਾਹਿਬਾਂ ਦੇ ਚਰਨਾਂ 'ਚ
ਸਾਰੀਆਂ ਫ਼ਿਜ਼ਾਵਾਂ ਅੱਜ ਮੁਸਕਾਉਣ ਲੱਗੀਆਂ।
**